Javid Jabbarli

Javid Jabbarli

Yunanıstanla Türkiyə sərhədində iki alman jurnalist həbs edilib.

Bu barədə məlumatı “Xəbərtürk” yayıb.

Məlumata görə, Almaniyanın ARD kanalında çalışan jurnalistlər iki ölkə sərhədində yerləşən “qadağan olunmuş” əraziyə daxil olduqları üçün həbs ediliblər.

Almaniyanın “Der Şpigel” jurnalı jurnalistlərin Almaniyadan qanunsuz yolla Türkiyəyə geri dönmək istəyən türklərin Meriç çayından necə keçdiklərini görüntüləmək məqsədi ilə bölgəyə daxil olduqlarını bildirib.


Azərbaycan Mətbuat Şurasının (MŞ) VII qurultayında Şuranın sədri seçilib

“Report”un xəbərinə görə, qurultayda səsvermə ilə MŞ sədri vəzifəsinə növbəti dəfə Əflatun Amaşov seçilib.

Bundan başqa, səsvermənin nəticələrinə əsasən, aşağıdakı tərkibdə Şuranın İdarə Heyəti formalaşıb.

Jurnalistlər:

Əflatun Amaşov,

Vüqar Rəhimzadə,

Umud Rəhimoğlu,

Rəşad Məcid,

Aydın Quliyev,

Akif Aşırlı,

Rauf Arifoğlu,

Elçin Mirzəbəyli,

Aynur Camalqızı,

Bəxtiyar Sadıqov,

Bahəddin Həziyev

İctimaiyyət nümayəndələri:

Vüqar Səfərli,

Müşfiq Ələsgərli,

Aqil Abbas,

Cavanşir Feyziyev,

Hikmət Babaoğlu,

İlham İsmayılov,

Yadigar Məmmədli

İnternet informasiya resursu təmsilçisi

Vüsalə Mahirqızı,

Azər Həsrət,

Niyaz Niftiyev,

Rəhman Hacıyev,

Anar İmanov

Xatırladaq ki, qurultayda Mətbuat Şurasının Nizamnaməsinə İdarə Heyətinin tərkibinin genişləndirilməsi ilə bağlı dəyişiklik edilib. Dəyişikliklə üzvlərin sayı 17-dən 23-ə çatdırılıb.


Bu gün, martın 10-da Gələcək Azərbaycan Partiyasının bir qrup gənc fəalı Bakının Fəvvarələr meydanında “Azad seçki” şüarı ilə etiraz aksiyası keçirməyə cəhd göstərib.

Aksiya zamanı saxlananların olduğu bildirilir.

Partiyanın sədri Ağasif Şakiroğlunun Azadlıq Radiosuna bildirməsinə görə, aksiyada 10-dan çox fəal saxlanıb.

A.Şakiroğlu axşam saatlarında isə deyib ki, saxlananlardan bəziləri buraxılsa da 5-i hələ də, Səabail Rayon Polis İdarəsinin 9-cu Polis Bölməsindədir.

“Görünür, onlara inzibati həbs vermək istəyirlər”, deyə A.Şakiroğlu vurğulayıb.

Ancaq bu deyilənləri, hələlik, Daxili İşlər Nazirliyindən dəqiqləşdirmək mümkün olmayıb.

Ağasif Şakiroğlu habelə bildirib ki, onlar prezident seçkilərinin 6 ay irəli çəkilməsinə və prezidentlik müddətinin 5 ildən 7 ilə artırılmasına etiraz edirlər.

Qeyd edək ki, bu il Azərbaycanda prezident seçkisi dövlət başçısı İ.Əliyevin istəyi ilə 6 ay önə çəkilib. Aprelin 11-nə təyin edilən seçkilər oktyabrda keçirilməli idi.Mərkəzi Seçki Komissiyasından verilən məlumata görə, 15-ə yaxın şəxs namizədliyini irəli sürüb.Omnlardan, hələılik, 7-nin namizədliyi qeydiyyata alınıb

Bir sıra müxalif qüvvələri isə seçkilərin azad və ədalətli keçirilməsindən ötrü şəraitin olmadığını bəyan edərək onu boykot ediblər.

Hakimiyyət təmsilçiləri prezident seçkisinin 6 ay önə çəkilməsini bu il Azərbaycan Xalq Cümhuriyyətinin 100 illiyi ilə bağlı bir sıra tədbirlərin və beynəlxalq əhəmiyyətli toplantıların keçiriləcəyi ilə izah edib

Dövlət başçısı İ.Əliyev də son çıxışlarının birində qarşıdan gələn prezident seçkilərinin şəffaf, ədalətli, Azərbaycan qanunlarına tam uyğun şəkildə keçiriləcəyinə əmin olduğunu bildirib.


Hakim Yeni Azərbaycan Partiyası (YAP) icra katibinin müavini Siyavuş Novruzov bu gün Milli Şuranın və Müsavat Partiyasının birgə təşkil etdiyi mitinqə münasibət bildirib

S.Novruzov “Report”a açıqlamasında deyib ki, bu mitinq bir daha Azərbaycanda demokratik, hüquqi islahatlar həyata keçirildiyini, sərbəst toplaşma azadlığının tam təmin olunduğunu göstərdi: “Mitinq iştirakçılarının təhlükəsizliyi polis tərəfindən qorunurdu. Bu istiqamətdə bütün işlər görülür. Aksiyada eyni adamlar iştirak etdilər, eyni fikirləri də səsləndirdilər. Bundan əvvəlki mitinqdə hansı fikirləri səsləndirirdilərsə, bu mitinqdə də həmin fikirləri səsləndirirdilər. Mitinq iştirakçılarının sayında da dəyişiklik yox idi. Yenə də mitinqdə kütləvilik təmin olunmamışdı, çünki xalqın belə mitinqlərə marağı yoxdur”.
YAP rəsmisi belə mitinqlərin uğursuz olduğunu qeyd edib.
Qeyd edək ki, Bakının Yasamal rayonunda yerləşən İdman Sağlamlıq Kompleksinin stadionunda (keçmiş "Məhsul" stadionu) keçirilən mitinq Bakı Şəhər İcra Hakimiyyəti ilə razılaşdırılıb.


Vətəndaş və İnkişaf Partiyasının (VİP) sədri Əli Əliyevə ağır itki üz verib.

Ə.Əliyevin qaynanası Ramizə xanım vəfat edib.

Mərhumə Azərbaycan xalçaçılıq sənətinin görkəmli nümayəndəsi, xalq rəssamı Kamil Əliyevin xanımı idi.

Qeyd edək ki, Ramizə xanım uzun müddət xəstə idi.

Allah rəhmət eləsin!


Hökumət yaxşı bilir, ancaq tədbir görmür, niyə?

Uzun alınacaq….ancaq ürəyimin sızıltısını paylaşmaq istədim sizlərlə…

Qanı qanımdan olan bir əzizim uzun illərdir ruhi xəstəlikdən əziyyət çəkib(ir). Aylarla Bayıl qəsəbəsində yerləşən disponserə hər fəsildə sürünmüşəm…məhz sürünmüşəm… (eynən həbsxana yollarında sürünənlər kimi).

Yalnız ilk dəfə xəstəxananın qapısını şəstlə, tələsik açdım ki boynuna sarılım, yanında əyləşib gətirdiyim sovqatlarla sevindirım… danışaq, gülək, könlünü alım əzizimin…

Mən bir stolun küncündə süfrə hazırlamaqla məşğul idim. Başımı qaldıranda nitqim qurudu. Əlində boşqab mənə sarı uzanmış bir neçə xəstəni görəndə özümü necə itirdimsə az qala yıxılacaqdım. Eşitdiyim səslər sanki quyunun dibindən gəlirdi: “ay gözəl, sən canin, o armuddan bir dənə ver də, iki dənə də konfet, ALLAH  balavu saxlasın”, “anaş, o dolmadan beş-altı dənə ver də…”

Birdən bütün xəstəxananın eşidə biləcəyi cingiltili, tükürpədici səs məni diksindirdi: “ay sürtüklər, ay yalaqlar, ölürsüz acından, indi yemədiz ki?? Ay boğmanız ölsun, gözdüyün də,  sizinkilər də gələcey də,  boğmalanarsız nə olub??”

Mən əsə-əsə,  dilim tutula-tutula dedim: “siz allah, işiniz olmasın mən sabah yenə gələcəm, izn verin paylayım”. Tibb bacısı fırk eləyib otaqdan çıxdı.

Dispanseri tərk edəndə ayaqlarımı zorla sürüyüb taksiyə oturdum. Bu minvalla hər gün gördüklərim, eşitdiklərim artıq mənim özümü yatağa salmışdı.

Ancaq sürünməyə məcbur idim. Yavaş-yavaş özümü toparlamağa çalışırdım.

Bir gün baş həkimin qəbuluna getdim: “F.xanım, artıq iki aydı mən bura gedib-gəlirəm, xəstələrlə söhbət edirəm. Bunların arasında vaxtıyla müəllim olanı var, vəzifədə olanı var, bir sözlə, burdakı insanlar, əsasən, stressdən , sarsıntıdan bu hala düşüblər. Bu disponserdə insanı stresdən çıxara bilən heç nə yoxdu. Nə isti münasibət, nə məşğuliyyət üçün müxtəlif oyunlar. Üstəlik, hər addımda “əl vurma, çəkil, rədd ol” kimi yersiz təhqirlər. Sizcə, hansı güclü dərman bu xəstələrə kömək edə bilər? Heç biri, axı bunlar insandı, canlı insan. Mən gələndə ətrafıma doluşurlar. Sadəcə, xoş danışıram ,vəssalam, çox üzülürəm, inanın, özüm artıq dəli olmaq dərəcəsinə çatmişam deyəsən”

Baş həkimin cavabı neştər kimi məni didib-parçaladı: “Get, qızım, ailənlə uşaqlarınla məşğ ol. Hökümət bilmir ki, bunlara nə lazımdı, nə lazım deyil? Tankdilar ee bunlar, tank,  eşşək kimi nə versən üyüdəcəklər. Bunlara nə yaraşır televezor, oyun-moyun? Sənə bura gəlmək pis təsir edir? Gəlmə…”

Daha nələr dedi, eşitmirdim. İki aydan sonra: “xəstəniz sağalıb, apara bilərsiz”–dedilər.

“Sağlam” xəstəmizin başında bit-sirkə ayaq tutub yeriyirdi, bədənində neçə yerdə döyülməkdən qançır izləri, uzanmış saçların əyri-üyrü kəsimi. Yox, daha sadalamayım… Artıq, yaza-yaza ağlayıram.

Üstündən bir qədər keçdi.

Bir neçə mənim kimi narazı valideynlə söhbət etdim. İnandırmağa çalışdım ki: “baxın, bina taxtadan, nə vəziyyətdə, burdakı münasibət və daha nələr, nələr. Gəlin səsimizi qaldıraq”.

Heç kəs, bir nəfər də olsun, səsimə səs vermədi.

P.S.

İllər keçsə də, xəstələr dəyişsə də, o dispanserdəki vəziyyət haqda elə hey bir-birindən acınacaqlı hadisələrin baş verdiyini eşidirdim və bütün bunları məharətlə ört-basdır da edə bilirlər.  Nədənsə,  “Narkoloji disponser”dəki faciədən sonra bu üzücü həyat hekayəmi sizlərlə bölüşmək istədim.

Vallah, heç bilmirəm niyə !

Jalə Cəfərova

Milli Mədəniyyətin Təbliği İctimai Birliyinin sədri


28537116 1622331857832264 332990241 nAlmaniyada yaşayan Murad Mirzəyevin ailəsinə təzyiqlər olur. Bu barədə M.Mirzəyev özü məlumat verib.

O, Azərbaycan siyasi hakimiyyətini tənqid etdiyi üçün ailəsinə təzyiqlərin olduğunu deyir: “Hər şey Berlin mitinqindən sonra başladı. İlk dəfə qardaşım Bəxtiyar Mirzəyev fevral ayının 10-da icra nümayəndələri tərəfindən təhdid olunub. Sonra atam Mirzəyev Rahibi iş yerindən polis şöbəsinə aparıblar və təhdid ediblər. Təhdidlər fevralın 23-də də davam edib, atamı işdən çıxaracaqları ilə hədələyiblər. Hətta bacım üçün universitetdə ciddi problemlərin yaradılacağını bildiriblər. Bu hədədən sonra atamı həbs edəcəkləri ilə qorxudublar”.


Azərbacyan Respublikasının Prezidenti İlham Əliyev cənablarına

Surəti: Azərbaycan Respublikasının Birinci Vitse-prezidenti Mehriban xanım Əliyevaya

Azərbaycan Respublikası Prezidentinin hüquq mühafizə orqanları ilə iş və hərbi məsələlər üzrə köməkçi cənab Fuad Ələsgərova

Azərbaycan Respublikası Prezident Administrasiyasının rəhbəri cənab Ramiz Mehdiyevə

Azərbacyan Respublikası Dövlət Təhləkəsizlik Xidmətinin rəisi cənab Mədət Quliyevə

Azərbaycan Respublikasının Baş Prokuroru cənab Zakir Qaralova

Fəaliyyətdə olan bütün Kütləvi İnformasiya Vasitələrinin rəhbərlərinə

Bakı şəhəri, Xətai rayonu, Nəsrəddin Tusi 31, m. 71 ünvanında yaşayan, Qarabağ müharibəsi veteranı, sahibkar Nəcəfov Adil Əli oğlu tərəfindən

Təkrar Şikayət Ərizəsi

Dövlət iki şeydən sarsıla bilər. Günahkar cəzasız qalanda, günahsıza cəza veriləndə. (Heydər Əliyev)

Hörmətli cənab Prezident!

Sizə dəfələrlə müraciət etmək məcburiyyətində qaldığım üçün məni üzrlü sayın. Təkrarən diqqətinizə çatdırmaq istəyirəm ki, kiçik sahibkar kimi uzun müddətdir ki, Bakı şəhərində sərnişin daşıma sektorunda sahibkarlıq fəaliyyəti ilə məşğulam. Biz marşrut işlədən sahibkarlar Bakı şəhər İcra Hakimiyyəti nəzdində fəaliyyət göstərən vaxtı hec bir problemlə üzləşməmişdik. Lakin bizi Bakı şəhəri İcra Hakimyyətindən alıb Nəqliyyat Nazirliyinin nəzarətinə verdikdən sonra problemlərimiz başladı.

“Bakı sərnişin nəqliyyat” MMC-nin müəyyən əməkdaşları və onların qoçuları marşrut xətlərimizi işlətmək üçün bizi məcbur edirdilər ki, onlara pul verək. Onların qanunsuz əməlləri nəticəsində bizim küllü miqdarda kredit borclarımız yaranmışdır, hamımızın əmlakımız və evlərimiz girovdadır. Biz onların dediklərini etmədikdə marşurutu əlimizdən alacaqları ilə hədələyirdilər. Tələb etdikləri pulu almaq üçün reket kimi vaxt qoyurdular. Ona görə də biz məcbur olurduq ki, gedib faizə pul götürüb, onlara verək. Buqanunsuz hərəkətləri nəticəsində mənə 1.500.000 manat ziyan dəymişdir. Bundan 700.000 manat banklara kredit borcum təşkil edir. Bu kredit borcumu da ödəyə bilmirəm.

2015-ci ildə Respublika Prokurorluğuna vəziyyətlə bağlı müraciət etdim. Mənim işimi Korrupsiyaya Qarşı Mübarizə Baş İdarəsinə göndərdilər. Bundan sonra Korrupsiyaya Qarşı Mübarizə Baş İdarəsində müstəntiq Heydər Məmmədov və Daxili Təhqiqat Şöbəsinin rəisi Anar Nəsibov dəymiş ziyanın 10%-ni təklif edərək məndən alınmış 1 milyon 500 min manatın verilməsi ilə bağlı kağıza imza atmağımı istədilər. Əlbəttə mən razı olmadım. Bunlarla “danışığa” getmədiyimə görə təhqir olunub idarədən qovuldum. Sonra bir daha məni qəbul etmədilər. Nəticədə “iş təsdiqini tapmadı” qərarını qəbul edib mənə təqdim etdilər.

Bununla əlaqədar hüquq-mühafizə orqanlarının hamısına etdiyim 200-dən çox müraciətimə baxmayaraq, Baş Prokurorluq buna göz yumaraq bütün şikayətlərimi Korrupsiya İdarəsinə göndərmişdilər. Mənə bildirildi ki, bu işlər Korrupsiya İdarəsinin monopoliyasında olduğu üçün Baş Prokurorluqda buna heç kim baxa bilməz. Mən bu gün də başa düşmürəm ki, cinayətkara, mənim pulumu alan adama ərizələrimi yönəltmək hansı məntiqə uyğundur. Pulumu alan adam özü-özü barəsində nə tədbir görə bilər?

Azərbaycan Respublikası Baş Prokurorluq yanında Korrupsiyaya Qarşı Mübarizə Baş İdarəsinin rəhbəri Kamran Əliyev davamlı müraciətlərimdən (30 dəfə məktubla, 6 dəfə teleqramla müraciət etmişəm) sonra məni fevralın 6-da qəbul etdi. Kaş Kamran müəllim məni qəbul etməyəydi. Söz vermişdisə, gərək ona əməl edəydi. Onunla görüşə gedəndə elə bilirdim ki, dövlət tərbiyyəsi almış adamla görüşüb, ondan hikmətli sözlər öyrənib, ailəmiz və özümüz üçün xərcləyərik. Amma Kamran Əliyev sözünü tutmadığı üçün ailəmin və dostlarımın yanında danışmağa utanıram ki, Kamran müəllim məni yola verdi. Daha konkret sözünü tutmadı. İnsaf naminə deməliyəm ki, Kamran Əliyev məni səmimi qarşılayıb, səmimi də yola saldı. Tabeliyində olan işçilərinin mənlə necə davrandığını onun nəzərinə çatdırdım. Daxili Təhqiqat Şöbəsinin rəisi Anar Nəsibovun mənə 10 faiz, yəni 150 min manatın hansı əsasla təklif etməsini də Kamran Əliyevdən soruşdum. Kamran Əliyev buna reaksiya verərək qeyd etdi, işçilərini danlamayım. Çünki Kamran Əliyev yaxşı bilirdi ki, mənə dəymiş ziyan Anar Nəsibov tərəfindən alınıb. Ona görə də Kamran Əliyev ya Anar Nəsibovu cəzalandırmalı idi, ya da məni qurbanlıq qoyun kimi seçməli idi. Təəssüf ki, Kamran Əliyev məni cinayətkarları himayə edən işçilərinə qurban verdi. Görüşdə Kamran Əliyevdən müraciətimin obyektiv araşdırılmasını xahiş etdim. Kamran Əliyev işin yenidən araşdırılacağı ilə bağlı məni arxayın etdi. Daha sonra Korrupsiya İdarəsindən mənə bildirildi ki, işi araşdırmaq üçün Rəşad İskəndərov adlı əməkdaşa tapşırıq verilib. Fevralın 20-də Korrupsiya İdarəsinə gedib, işlə maraqlandım. Rəşad İskəndərov mənlə görüşməkdən imtina edərək bildirdi ki, guya bunu qanun qadağan edir. Daha sonra növbətçi prokuror Arif Əyyubov məni qəbul edərək bildirdi ki, müraciətim əsasında Rəşad İskəndərovun apardığı araşdırmanın nəticəsi təsdiqini tapmayıb. Daha sonra Rəşad İskəndərov özü mənə məlumat verdi ki, sənədlər ona ancaq arayış hazırlamaq üçün təqdim olunubmuş. Və açıq şəkildə mənə bildirdi, rəhbəırlik nə deyibsə, onu etmişəm. Nəticədə mənə müraciətimin araşdırılması ilə bağlı qərar yox, arayış verildi. Bunları deməkdə məqsədim odur ki, sadəcə Kamran Əliyev məni qəbul etməklə, yola vermək istəyib.

Dəhşətlisi odur ki, Korrupsiya İdarəsi bu işə baxıb qərar verdiyi üçün başqa hüquq-mühafizə orqanları şikayətlərimə baxmaqdan imtina edirlər. Məhkəmə də Korrupsiya İdarəsi ilə üz-üzə gəlməmək üçün şikayətimi təmin etmir.

Fevralın 23-də Baş Prokurorluqda oldum. Orda növbətçi prokuror Yaqut Əliyeva məni qəbul etdi. Prokurordan Baş Prokurorluğa göndərdiyim müraciət və ərizələrimin harda olmasını soruşdum. Yaqut Əliyeva mənə dedi ki, yazdığın bütün ərizə və müraciətlər Baş Prokurorluq yanında Korrupsiyaya Qarşı Mübarizə Baş İdarəsinə göndərilib. Mən Yaqut Əliyevanın nəzərinə çatdırdım ki, əgər mən Baş Prokurorluq yanında Korrupsiyaya Qarşı Mübarizə Baş İdarəsindən şikayət edirəmsə, niyə şikayətim bu quruma göndərilir. Şikayətlərimə yuxarı orqan olaraq Baş Prokurorluqda baxıb, mənə məlumat verilməlidir. Bu sualıma növbətçi prokuror sualıma düz-əməlli cavab verə bilmədi.

Düşdüyümüz vəziyyətdə nə edəcəyimi bilmirəm. Ona görə məcburam ki, gedib pul verdiyim adamları dədə-baba qaydası ilə öldürüm, ya da ölüm. Və bu baş verəcəksə, bunun bütün məsuliyyəti Korrupsiyaya Qarşı Mübarizə Baş İdarəsinin rəhbər işçilərinin üzərində qalacaq. 5 nəfərin ölümü Korrupsiyaya Qarşı Mübarizə Baş İdarəsinə lazımdırmı? Bunların hazırkı işi dövlətlə vətəndaş arasında ucurum yaratmaq, üz-üzə qoymaqdır.

Cənab Prezident!

Xahiş edirəm, Korrupsiyaya Qarşı Mübarizə Baş İdarəsinin cinayətkarları hansı səbəbdən himayə etməsini araşdırın. Korrupsiyaya bulaşmış Korrupsiyaya Qarşı Mübarizə Baş İdarəsinin əməkdaşları ilə bağlı tədbir görün. Mənim kimi yüzlərlə vətəndaş niyə dövlətindən incik düşməlidirlər. Bu şəxslər Siz başda olmaqla Azərbaycana xəyanət edirlər.

İmza: Adil Əli oğlu Nəcəfov

Tel: (070) 329 79 90) 26.02.2018


 “Moderator.az” saytının 02.03.2018 tarixli səhifəsini nəzərdən keçirərkən Soltan Laçın adlı jurnalistin “Bütün məsələlər gündəlikdən çıxarılsın, gündəliyə yalnız Qarabağ məsələsi salınsın…” başlıqlı kiçik bir yazısına rast gəldim. Soltan Laçın mənim nəzərimdə fantaziyalarının  miqyası ilə xüsusi seçilən bir jurnalistdir.

Əvvəla Soltan Laçına anlatmaq istəyirəm ki,  o qurumun adı  Milli Şura yox, Milli Məclis idi. İkincisi, Soltan Laçın bu başlığı, mənim Milli Məclisdə 1992- ci il martın 3 də etdiyim çıxışdan götürüb. Mən ORDA belə bir tələblə  çıxış etmişəm ki, “bütün digər məsələlər gündəlikdən çıxarılsın, yalnız Qarabağ məsələsinin müzakirəsi, həll yolları Milli Məclisin gündəliyinə salınsın.” Həmin dövrdə Milli Məclisin digər iclaslarında, ən əsası da 23, 24, 25, mart 1992 ci il tarixdə respublikada prezident seçkilərinin keçirilməsi ilə əlaqədar müzakirələr gedirdi. Həmin müzakirələr zamanı da mən çıxışlar etdim və təkliflərdə bulundum ki, əgər ölkədə bu ağır vəziyyət hökm sürürsə və Qarabağın ağır taleyinin göz önündə olduğu, ordumuzun, silahlı qüvvələrin hələ də formalaşmadığı bir dövrdə, yenidən prezident seçkiləri ortaya atılarsa, bu, daxildə hakimiyyət uğrunda mübarizəni daha da qızışdıracaq və biz torpaqlarımızı itirmək təhlükəsi ilə üz üzə qalacağıq. Həmin təkliflərimin gündəliyə salınmasını tələb etdim. Təəssüflər olsun ki, mənim gündəliyə salmaq üçün etdiyim təkliflər müzakirəyə çıxarılmadı.

Bundan başqa, Soltan Laçın, sən ilk dəfə deyil ki, mənim ünvanıma böhtan yazırsan. Həmin yazıda yazırsan ki, “Maraqlıdır ki, bu çağırışla, sonradan müdafiə naziri olduğu dövrdə, Şuşa və Laçın işğal edildiyi üçün vətənə xəyanətdə suçlanan sabiq deputat Rəhim Qazıyev, 1992-ci il martın 3-də Azərbaycan Ali Sovetində – Milli Şuranın  iclasında çıxış edib…” Soltan Laçın, ağlını başına topla. Sən jurnalistsən. Yazdığın hər kəlmənin məsuliyyətini dərk elə. Mənə heç vaxt nə ibtidai istintaqda nə  də məhkəmələrdə “Vətənə xəyanət” maddəsi verilməyib. Sənin bunu deməkdə məqsədin nədir? Yaxşı olar ki, həmin Milli Şura dediyin o Milli Məclisin 3 mart 1992–ci il və ondan sonrakı sadaladığım 23, 24, 25, mart 1992 ci il tarixdə keçirilən iclasların stenoqrammalardakı çıxışlarımı, təkliflərimi yazasan.

Sən, bir il bundan qabaq da konspiroloq adlanan hansısa şərəfsizlərin ünvanıma uydurub söylədikləri yalanları olmuş həqiqət kimi oxuculara sırımaq istəyirdin. Mən onda da sənə təklif etdim ki, həmin o konspiroloq deyilən şərəfsizləri dəyirmi masaya dəvət et. Sən bunu da etmədin. İndi məqsədin nədir? Ay, rayonu işğal altında olan, əlində qələm tutan Soltan Laçın. Doğurdanmı bu gün ölkədə bu qədər gərgin iqdisadi-siyasi-sosial-hərbi vəziyyətin hökm sürdüyü dövrdə 1992-ci ilin mart ayında olmuş hadisələr bu qədər aktualdırmı? Doğurdanmı, bu saat Qarabağın taleyinin çox təhlükəli bir məqamla üzləşdiyi vaxtda, 92-ci ilin mart ayında gedən debatlar xalqımız üçün daha önəmlidirmi? Mən sənə təklif edirəm və səndən tələb edirəm ki, yazdığın ifadələrin məsuliyyətini daşı. Yəqin arxayınsan ki, bu ölkədə indi nə hüquq var, nə məhkəmə, nə də istintaq. Sən ya öz ağlının kəsdiyi formada, ya da sifarişlə nə yazsan işə yarayacaq. Bunların hamısı olsun. Amma sən öz soy adını dəyişib, adnı  “Soltan Laçın” qoymusan. Laçın isə şərəfsiz düşmənlərin taptağı altındadır. Bu gün sənin kimi jurnalistlərin qələmindən çıxan yazılar, o torpaqların azad olunmasına həsr olunmalıbu istiqamətə yönəlməlidir. Mənim haqqımda nə yazsan, sübutlara söykənən faktlara, sənədlərə və stenaqlamlara istinad elə və yaz.  Diqqətə al ki, sonuncu dəfə sənə deyirəm, bir də sən mənə böhtan atsan, mən səninilə, hökmən, olan, olmayan məhkəmədə görüşəcəm. Sən hələ ki, nə hakim, nə prokuror, nə də müstəntiqsən ki, qələmini hökmlər çxarmağa, ittihamlar verməyə, günahkar elan etməyə işlədəsən. Jurnalistin işi isə faktlara, sənədlərə əsaslanaraq həqiqətləri yazmaqdır. Bir də bil ki, indi barəsində danışdığın məsələlər, o,  həbsə atılandan sonra, cəsarətə gəlib, müğənni Fədayə ilə “Laçın” adı üstündə davaya çxmaq qədər sadə məsələlər deyil. Fədayədən “Laçın”ı yox, ermənidən Laçını necə almaq barədə düşünmək və döyüşmək gərəkdi, Soltan kişi. Bunu da mütləq nəzərə al və nədən və niyə yazdğına diqqət elə.

Sabiq müdafiə naziri Rəhim Qazıyev


Babayeva Azərbaycan hakimiyyətinə və Almaniyadakı diasporaya yaxınlığı ilə tanınır

Xeber.İnfo goettinger-tageblatt.de-ə istinadən xəbər verir ki, Alamniyanın Düsseldorf hava limanında saxlanılan 51 yaşlı azərbaycanlı qadını Düsseldorf rayon məhkəməsi həbs edib. Sayt yazır ki, Azərbaycanda yaşayan qadının həbs qərarı Göttingen Respublika Prokuroru tərəfindən verilib.

Azərbaycanda yaşayan qadın Türkiyəyə gedərkən sərhəd polisi tərəfindən yoxlanılarkən saxlanılıb. Federal Polis Təşkilatının məlumatlarına görə, qadın 2016-cı ilin yanvar-sentyabr ayları arasında 7 (yeddi) fakt üzrə bəzi şəxslərin Almaniyaya icazəsiz girişinə verdiyi dəstəkdə günahlandırılır.

Mənbə bildirir ki, qanunsuz yollarla Almaniyaya gətirdiyi azərbaycanlılardan böyük məbləğlər, hətta bir fakta görə, müştərisindən 32 min avro alıb.

2016-cı ilin iyun ayında Pragadan gələn iki qurbanını Çexiya vizası ilə qeyri-qanuni olaraq Almaniyaya gətirmiş, sığınacaq mərkəzlərinə göndərdiyi üçün 2500 avro alıb.

2016-cı ilin sentyabrında isə üç nəfərlik ailəni Çex vizasıyla Almaniya Federal Respublikasına qaçaq yollarla 10 300 avro qarşısında gətirib.

İki azərbaycanlını Almaniyaya gətirmək üçün 19 200 ABŞ dolları aldığı da faktlar arasındadır.

Xeber.İnfo-nun əldə etdiyi məlumata görə, həmin qadın Bakı şəhər sakini Gülnarə Babayevadır. Etibarlı mənbədən əldə etdiyimiz digər xəbərə görə, Azərbaycan hakimiyyəti bu hadisədən Almaniyaya mühacirət edənlərə qarşı istifadə etməyə çalışır. Lakin, Babayeva Azərbaycan hakimiyyətinə və Almaniyadakı diasporaya yaxınlığı ilə tanınır. G.Babayevanın haqqında xoşagəlməz söhbətlər də dolaşır. Belə ki, o, istədiyi şəxsi müxtəlif vasitələrlə təhdid edirmiş.


17 -dən səhifə 245