Javid Jabbarli

Javid Jabbarli

Nardaran hadisələrindən sonra həbs olunub, terrorçuluq, dövlət çevrilişinə cəhd və başqa 10-dan artıq ağır maddələrlə suçlanan daha bir qrupun bir ilə yaxındır davam edən məhkəməsi yekunlaşmaq üzrədir.

Aralarında “Müsəlman Birliyi” Hərəkatının sədr müavini, ilahiyyatçı Elçin Qasımovun da olduğu 12 nəfərə prokuror ümumilikdə 166 il həbs cəzası istəyib.

Şərti olaraq, “Nardaran işi-2” adlandırılan bu məhkəmə prosesi 2017-ci ilin yanvarından başlayıb. Bu işə Bakı Ağır Cinayətlər Məhkəməsində Mayıl Bayramovun sədrlik etdiyi hakimlər kollegiyası baxır.

Dekabrın 15-də məhkəmədə prokuror çıxış edib. Deyib ki, təqsirləndirilən şəxslərə elan olunmuş ittihamlar məhkəmədə sübuta yetirilib. İttihama görə, onlar Azərbaycanda dövlət çevrilişinə cəhd ediblər, silah-sursat saxlayıblar.

Dövlət ittihamçısı çıxışının sonunda təqsirləndirilən şəxslərdən Elçin Qasımov və Ağaəli Yəhyayevin hər birinə 16 il, Nahid Qəhrəmanov, Ramil Əliyev, Elgün Axundov və İsa İbrahimovun hərəsinə 14 il, qalan 6 nəfərə – Vüsal Alışlı, Fərhad Muradov, Seymur Aslanov, Seyfəddin Şirvanov, Əli Şahmazov və Əmirəli Əliyevə isə 13 il həbs cəzası verilməsini təklif edib.

Məhkəmə dekabrın 22-də vəkillərin müdafiə çıxışı ilə davam edəcək (azadliq.org).


2014-cü ildə fəaliyyəti dayandırılmış “Ayna” və “Zerkalo” qəzetlərinin baş redaktoru Elçin Şıxlının xəbər portallarından birinə müsahibəsi sosial şəbəkələrdə müzakirə və mübahisə obyektinə çevrildi. E.Şıxlının hakim ailə barədə fikirləri birmənalı qarşılanmadı və suallar doğurdu.

Meydan TV sual yaradan məqamlarla bağlı Elçin Şıxlının qonağı olub. 

- Elçin bəy, müsahibəniz müzakirələrə səbəb oldu, müxtəlif fikirlər və ittihamlar da var. Əsasən də prezident İlham Əliyev və xanımı, Birinci vitse-prezident Mehriban Əliyeva barədə dediklərinizdir. Birinci sualım ölkə başçısı haqqında fikirlərinizlə bağlıdır. İlham Əliyev 2003-cü ilin avqustunda Milli Məclisdə Baş nazir təyin olunanda siz də zaldaydınız və hətta təyinatı alqışlayanlardan oldunuz. Ötən 14 ildə gözləntiləriniz doğruldumu?

- Bəli, iclasda olmuşam, o zaman dövlət tədbirlərinə dəvət olunurdum. Və alqışlayanlardan biri idim. O mənada ki, hakimiyyətə cavan adam gəlirdi, nəsə yeni şeylər gözləyirdim. Çünki o cavan adam dünyanı görüb, Moskva Dövlət Universitetini bitirib, bir neçə xarici dil bilir... Hər halda gözləntilərim ondan ibarət idi ki, bu insan Şərq dünyasını yox, Qərbi daha yaxşı tanıyır və Avropadakı dəyərlər Azərbaycanda daha asan, daha geniş olacaq. Təəssüf ki, gözləntilərimin hamısı həyata keçməyib.

- Narazı qaldıqlarınızı tezis şəklində sadalaya bilərsinizmi?

- Media adamı olduğum üçün bu barədə danışa bilərəm. Azərbaycanda media yoxdur, jurnalistika məhv olmuş şəkildədir, tək-tük kimsə nəsə deyir, onların da səsi artıq eşidilmir, kəmiyyət var, keyfiyyət yoxdur. Sərbəst söz söyləməyin özü də problemdir, məsələn, mən hətta prezident İlham Əliyev, yaxud xanımı, Birinci vitse-prezident Mehriban xanım Əliyeva haqqında müsbətəbənzər fikir işlədəndə belə çox adamın xoşuna gəlmir. Bu, Azərbaycanda fikir rəngarəngliyinin problemli olduğunun göstəricisidir, hər iki tərəfdən.

- Dediyiniz çox adam haqlı, yoxsa haqsızdır?

-  Haqlı, yaxud haqsız deyə bilmərəm, hər adamın öz fikri ola bilər. Problem ondan ibarətdir ki, hamı başqalarının özü kimi düşünməsini istəyir və bunu tələb edir.

- Amma ortada gerçəklik də var…

- Bəli, var, amma mən bu tələbi heç bir tərəfdən qəbul etmirəm. Çünki mənim öz fikrim var. Ola bilsin, müəyyən məqamda bəlkə də nəyisə yanlış deyirəm, amma fikir mənimdir və bu baxımdan da fikrimin üstündə dayanıram. Ancaq fikri dəyişə də bilərəm. O mənada ki, sabah indiki kimi deyil, tamam fərqli bir şey ola bilər, o zaman sabaha uyğun fikir deyəcəm.

- ReAL-ın həbsdə olan sədri İlqar Məmmədov barədə dediklərinizə gəlmək istərdim. Bir çox beynəlxalq təşkilatın hakimiyyətdən onun buraxılması barədə tələblərini bilirsiniz. Avropa Məhkəməsinin məlum qərarı var və bu qərar Avropa Şurası ilə Azərbaycan arasında skandal yaradıb, artıq prosedur başlayıb. Doğrudanmı, prezidentin bu skandaldan xəbəri olmadığını düşünürsünüz? Əgər Rusiyapərəstlər həbs edibsə, azadlığa buraxmırsa, bu, prezident üçün daha pis deyilmi?

- Daha pisdir və təbii ki, prezidentin bundan xəbəri var. Vəziyyət o dərəcəyə çatıb ki… Bayaq dedim, bu gün bir fikirdə ola bilərəm, sabah vəziyyət dəyişsə, başqa fikirdə. Mənə asandır, amma prezident olduğu üçün bu adam deyə bilməz ki, olmamalıydı, oldu. Adam dirənir…

-  Söhbət prezidentdən gedir?

- Təbii, hər bir adam, o cümlədən prezident. Mən indi sadə adamam, bağışlayın, vəssalam. Amma biri də var prezident səviyyəsində bağışlayın deyəsən. İlqar Məmmədov tutulmamalı idi, ümumiyyətlə, o, heç bir əməl də törətməyib, sübuta yetirilməyib. Bizim məhkəmələri tanıyıram. Ümumiyyətlə, siyasi-ictimai nöqteyi-nəzərdən İlqar Məmmədov həbs olunmamalıydı. Onu tutmaq olmazdı, bu, burnundan o yanı görməmək deməkdir.

- Sabiq prezident Heydər Əliyev nümunəsi də var. 1998-ci ildə Baş prokuror Eldar Həsənova göstəriş verdi, Pənah Hüseyni həbsxanadan çıxartdırıb birbaşa kabinetinə gətizdirdi və söhbət etdi. Əgər onun varisi İlham Əliyev atasının kursunu davam etdirirsə, bu variantdan istifadə edə bilməzmi?

- Etmək olar. Müsahibəmdə demişdim ki, hər bir rəhbər şəxsin, təbii ki, prezidentin müxtəlif sahələr üzrə yardımçıları, köməkçiləri olur. Onlar həmişə öz sahələri ilə bağlı hesabatı prezidentə təqdim edirlər. Hesabatın necə hazırlanmasından və orada nə yazılmasından da çox şey asılıdır. Heydər Əliyev başqa adam idi, siyasi cəhətdən həddən artıq böyük adam idi. Hətta özü üçün çətin və pis məqamları belə xeyrinə çevirməyi bacarırdı. Məsələn, Pənah Hüseyni kabinetinə gətirib söhbət edir. Sovet dövründən belə bir siyasəti vardı: onu tənqid edənə, hansısa sahəni hədəfə alana həmin sahəni tapşırırdı və deyirdi: “İşlə”. Sonra da biabır edib kənarlaşdırırdı. Biz dəfələlərlə bunun şahidi də olduq.

- “Azərbaycanda müxalifət keçmişdə qalıb” söyləyən Elçin Şıxlıya həm də hakim komandanın əksər üzvlərinin sovet nomenklaturasının yetirmələri olduğu məlumdur. Ötən 14 ildə bir sıra nazirlər dəyişsə də, idarəetmə dəyişmədisə, hakimiyyətin özü  keçmişdə qalmayıbmı?

- Elə mən də müsahibəmdə keçmişlə bağlı kiminsə fikrini təkrarlaya biləcəyimi demişdim. O cümlədən, sovet nomenklaturasının işçiləri olduğunu bildirmişəm. Bilirsiniz, sistem dəyişməyib.

- Nazirlər Kabinetinin sədri Artur Rasizadə 21 ildir...

- Yenə rəhmətlik Heydər Əliyevdən misal gətirəcəm, o, bizi qəbul edəndə Rauf Arifoğlu onun qardaşından şikayət etdi. Heydər Əliyev dedi ki, gəl, o məsələnin üstündən keçək. İndi də Baş nazir məsələsinin üstündən keçək, danışılası deyil. Sistem və sxem dəyişməlidir.       

- Kim dəyişməlidir?

- Təbii ki, rəhbərlikdə olan etməlidir. Amma biri var kiminsə gücü çatır, kiminsə çatmır.

-  İlham Əliyevin gücü çatmırmı?

-  Görünür, çatmır. Bu adamın atasından qalma işçilərin qarşısında hansısa mənəvi öhdəliyi ola bilər.

- Yalnız mənəvimi?

- Yalnız mənəvi, başqa nə ola bilər?

- Mehriban Əliyevanın özünə komanda seçdiyini bildirmisiniz, konkret kimləri göstərə bilərsiniz ki, mütərəqqi adamlar sayıla bilər?

- Hələ heç kimi deyə bilmərəm. Çünki özünün inzibati idarəsini hazırlayır, Birinci-vitse prezidentin də aparatı olur. Aparata yığdığı gənc adamlar var, amma normal tanınmır, bir-ikisinin adını bilirik. Mən ikisini şəxsən tanıyıram, üçüncüsünü bir az.

- Konkret adlarını çəkə bilərsiniz?

- Bəli, birinci köməkçisi Anar Ələkbərov, İsveçrədə səfirimiz olan Əmirbəyov və hüquqi məsələlər üzrə gənc oğlan var, savadlıdır, səhv etmirəmsə, Gündüzdür.

- Bu adamlar sistemin içində əriyə bilməzlərmi, məsələn, Mikayıl Cabbarovu təhsil naziri qoydular, amma dəyişiklik olmadı...

- Bəli, onlar sistemin içində əriyə bilərlər. Bu saat məni təhsil naziri qoysalar, heç nə edə bilməyəcəm. Müəyyən şərtlər var, normal ölkələrdə universitetlər müstəqildir, rektoru kollektiv seçir, AMEA bizim anlamımızda olduğu kimi deyil, sistem dəyişməlidir. Sovet dövründə üç il Maarif Nazirliyində kollegiya katibi və nazirin köməkçisi işləmişəm, ancaq orta məktəb sisteminin öhdəsindən gəlmək üçün güc çatmırdı, çox dəhşətliydi, böyük sahəydi.

- Doğrudanmı, sizdə belə təsəvvür var ki, Mehriban xanım komandanı dəyişmək istəyir?

-  Bəli, var.

-  İnformasiyaya, yoxsa təhlilə əsaslanırsınız?

- Görünür də. Mən deyə bilmərəm ki, dəyişdiyi adamların hamısı idealdır, amma hər halda dəyişmək istəyir və dəyişir də.  

- Heydər Əliyev Fondunda işləmiş şəxslər var ki, onlar son illərdə nazir vəzifəsinədək irəli çəkiliblər. Məsələn, rabitə və informasiya texnologiyaları naziri Ramin Quluzadə. Ancaq Azərbaycan və xarici mətbuatdakı yazılarda fondun maliyyə mənbələri sualı aktual olaraq qalır. Niyə fondun maliyyə mənbələri qapalıdır? Düzdür, fond Azərbaycanda və xaricdə böyük işlər görür, kilsələr təmir edir, məktəblər tikir, bəs bunların maliyyə mənbələri hardandır? Yaxud Heydər Əliyev Fondunun adı beynəlxalq hesabatlarda ofşor zonalarda çəkilir, araşdırmaların nəticəsi olaraq, amma təkzib də olunmur. Belə olduqda Mehriban Əliyeva və onun komandaslı barədə nikbin düşüncələriniz hardandır?

- Birinci, bizdə nə açıqdır ki, o da açıq olsun? Hər şey qapalıdır. İkinci, bu, sistemdən irəli gəlir. Üçüncü, nikbin olmağım, sözün doğrusu, Mehriban Əliyevanı uşaqlıqdan tanıyıram. Yazıçılar mühitində böyümüşəm, Süleyman Rüstəmin oğlundan başlamış Mirmehdi Seyidzadə, Əliağa Kürçaylı, Bəxtiyar Vahabzadə, Qabil, onların uşaqları ilə bir yerdə böyümüşük, ünsiyyətdə olmuşuq, hər birini tanıyıram. Dostlarım arasında olanda çox vaxt deyirəm ki, mənim yanımda yazıçılardan danışmayın, yəni hamısını tanıyıram. Mehriban xanım da elə, Mircəlal Paşayevin nəvəsidir, həm də eyvan qonşusu olmuşuq, bir-birimizi görüb böyümüşük. İndi də küçədə məni görsə, o saat salamlaşıb hal-əhval tutacaq. Rəhmətlik anası Aida xanımı da tanımışam, atasını da tanıyıram, ziyalı ailədir. İndi çox şeylər deyilir, hakimiyyətə gəlmək, hakimiyyətdəki geniş imkanlar tamam başqa şeylərdir. Adamı tanıdığıma görə müəyyən mənada nikbinəm, həm də nəyəsə ümid etmək lazımdır. Hətta çox çətin və mənfi situasiyada adam işıqlı bir şey axtarmaq istəyir, onu etməsən, yaşamaq çox çətin olur.

- Doğrudanmı, Mehriban Əliyevanın Azərbaycanı dəyişmək istədiyinə inanırsınız?  

- Bəli, ola bilsin mənimlə bir çox adam razı olmayacaq. Deyəcəklər ki, indiyə qədər niyə dəyişmirdi? Ona görə ki, vəzifəsi yox idi. Hətta mənim həyat yoldaşım evdə deyəndə ki, işdə filan məsələni niyə belə etdin. Bir az dinləyib cavab verirəm ki, özüm bilərəm. Amma indi Mehriban xanımın vəzifəsi var, prezidentdən sonra ikinci adamdır və məsuliyyət var. Həm də ona görə nikbinəm ki, mən bu adama bədə-bəddə nə olsa müraciət edə bilərəm və fikrimi deyə bilərəm.

-  Bəs ölkə mətbuatı haqda niyə müraciət etmirsiniz?

-  Kim sizə deyib ki, müraciət etməmişəm?  

-  Cavab almısınızmı?

-  Yox, cavab almamışam. Yəni o səviyyədə müraciət olmayıb, amma hər gün yazdıqlarım, “Ayna”dakı yazılar elə müraciətdir, nə deyiriksə, müraciətdir. Mən hər gün həmkarlarımın bir neçə sualına cavab verirəm, bunlar hamısı müraciətdir. Sadəcə, masanın üstünə hesabat qoyanlar var. Həmin hesabatı masanın üstünə qoyanlar dediklərimizi ora daxil edir, ya etmir, bu, başqa məsələdir. Sistemdə olanlar vaxtilə mənə deyirdilər ki, necə istəyiriksə, hesabatı hazırlayır və lazım gələndə birinin üstünə beşini də qoyuruq.  


Vergilər naziri vəzifəsindən uzaqlaşdırılan Fazil Məmmədovun ətrafında müəmma davam edir. Sabiq nazirin səhhətində yaranan problemə görə vəzifəsindən çıxarıldığı deyilsə də, onunla bağlı ciddi araşdırmaların başladıldığı barədə məlumatlar başqa mətləblərdən xəbər verir.  Modern.az-a sabiq nazirlə bağlı yeni məlumatlar daxil olub. 

Sayt yazır ki, Şəmkir rayonunda inşa edilmiş "Şəmkir Aqropark” Logistika Mərkəzi Fazil Məmmədovun korrupsiya şəbəkəsinin bir qolu olub. Qeyd edilir ki, həmin kompleksin tikintisini kurasiya edənlər Fazil Məmmədovun birbaşa yaxın adamları olan Şəmkirin hazırkı icra başçısı Alimpaşa Məmmədov və Fazil Məmmədovun müşaviri işləmiş Qüdrət Seyfullayevdir.

İddialara görə, "Şəmkir Aqropark” kompleksinin inşasından tutmuş fəaliyyətinə qədər bütün dövrləri əhatə edən iri maliyyə mənimsəmələri həyata keçirilib. Bu prosesin Fazil Məmmədovun havadarılığı altında gerçəkləşdiyi söylənilir. Kompleksdə olan soyuducu anbarların qurulmasında mənimsənilən vəsaitin milyonlarla manatla ölçüldüyü vurğulanır.

Məlumata görə, Qüdrət Seyfullayev "Şəmkir Aqropark”ın direktoru işlədiyi müddətdə müxtəlif adlar altında minlərlə ton meyvə və tərəvəz alınaraq qəsdən korlanıb, yararsız məhsul kimi silinib. Məqsəd isə ayrılan pulların yeyintisini ört-basdır etmək olub. 

"Şəmkir Aqropark” kompleksində istehsal sahəsində baş verən bəzi hadisələrin ört-basdır edilməsində, milyonlarla manat vəsaitin sovrulmasında və mənimsənilməsində kompleksin digər rəhbər şəxslərinin də adı keçir. Bu səbəbdən də Qüdrət Seyfullayevin müavinləri işləmiş şəxslərin də mənimsəmə və israf etmə maddələri ilə cinayət məsuliyyətinə cəlb oluna biləcəyi iddia olunur.

Digər məlumata görə, hazırda Şəmkir rayonunda Fazil Məmmədova görə ciddi yoxlamalar aparılır. O da bildirilir ki, Fazil Məmmədovun kurasiyasında olmuş "Snerjy Group”, "Ata Holdinq”, "XX əsr” şirkətlərini yoxlayırlar.  Hətta sabiq nazirin Şəmkir şəhər icra nümayəndəsi işləyən yeznəsinin də artıq işdən çıxarıldığı bildirilir.

"Yeni Müsavat”a daxil olan məlumatda deyilir ki, Şəmkir şəhər icra nümayəndəsi Çingiz  Həsənov Fazil Məmmədov işdən çıxarılmazdan əvvəl ölkədən gedib. Onun özü ilə 10 milyon manat apardığı da iddia olunur. Bildirilir ki, həmin pullar Şəmkirdə mücərrəd bir layihənin gerçəkləşməsi üçün Çingiz Həsənova ötürülüb. Büdcə vəsaiti olan həmin məbləğin nəğdləşdirilərək götürüldüyü də gələn məlumatlar sırasındadır. Həmin məbləği Ç.Həsənov konkret hesaba köçürməli olub, lakin bunu etməyib və ölkədən həmin pullarla bərabər çıxıb.

Bildirilir ki, hazırda Fazil Məmmədov həm də kadrlarına görə gərginlik içindədir. O hesab edir ki, işdən çıxarılmasında ətrafında olan və etimad göstərdiyi kadrların ona qarşı fəaliyyətdə olmaları əsas rol oynayıb. Vergi Nazirliyinin arxa kabinetlərində cərəyan edən gizli sövdələşmələr haqda məlumatlar hakimiyyətdəki müxtəlif çevrələrə sızıb.

Böyük məbləğlərin ölkədən çıxarılması zamanı yol verilən yeyintilər haqda məlumatlar kənara çıxıb. Fazil Məmmədov hələ 2013-cü ilin sonlarında, 2014-cü ilin əvvəllərində Vergilər Nazirliyində əcinnələri müəyyən etmək üçün o dövrdə vəzifədə olan Eldar Mahmudova üz tutmuşdu. Həmin vaxt Eldar Mahmudovun xəfiyyələri Vergilər Nazirliyində çalışan hər kəsi nəzarətə götürmüş, bütün şübhələr nazirlikdə çalışan Fazil Məmmədovun qohumlarının üzərində cəmlənmişdi. Həmin günlərdən birində xəbər yayılmışdı ki, Vergilər Nazirliyinin təhlükəsizlik xidməti rəisi Samir Qurbanov işdən çıxarılıb. Bundan qəzəblənən Samir Qurbanov nazirliyin əsas giriş qapısını və təhlükəsizlik kamerasını atəşə tutmuşdu. Samir Qurbanov vergilər nazirinin müavini Namiq Əliyevin bacanağıdır.

S.Qurbanovun vergilər naziri Fazil Məmmədovun ən yaxın və inanılmış adamlarından biri, nazirin xaricdəki biznesinin  idarəçiliyi ilə məşğul olan, "ATA-Holdinq”in Müşahidə Şurasının üzvü Qafar Qurbanovun qardaşıdır. O dövrdə belə xəbər də vardı ki,  Samir Qurbanov sələfi məzhəbini qəbul edib və icmanın nüfuzlu üzvlərindən biridir. İddiada o da bildirilir ki, onun nüfuz dairəsində 300 nəfər sələfi olub. S.Qurbanov bir neçə il Vergilər Nazirliyinin təhlükəsizlik xidmətinin rəhbəri vəzifəsində çalışıb. O, mühafizə xidmətinin rəhbəri kimi hər ay nazirlikdən rəsmi maaşından əlavə 50 min manat "paket” də (qeyri-rəsmi maaş) alırmış.

Bu pul icmanın ehtiyaclarına xərclənirmiş. Bu hadisədə gizlində qalan bir ad-soyad da vardı –  Rafael Qurbanov! Nazir Fazil Məmmədovla bibioğlu-dayıoğlu kimi qan qohumu olan Rafael Qurbanov da vəhhabi olan və nazirliyi güllələyən Samir Qurbanovun doğmaca əmisi oğlu imiş.  Fazil Məmmədov hər ay vəhhabilərə 50 min manat pul ödəyirmiş. Ta ki, onun yaxın qohumu Samir Qurbanov onun özünə qarşı çıxana qədər…

Fazil Məmmədovun Rafael Qurbanovun təşkilatçılıq imkanlarından və əlaqələrindən ölkə xaricində işlərini aşırmaq üçün istifadə etdiyi də bildirilir. Qeyd olunur ki, Samir Qurbanov Vergilər Nazirliyində "qoçuluq” edəndən sonra Fazil Məmmədov onu həbsə aldırılıb. Amma onu çox da həbsdə saxlaya bilməyib. Belə ki, Samir Qurbanov və qardaşı, əmisi  Fazil Məmmədovu və Binəqədinin İcra Hakimiyyətinin başçısı Xaləddin İsgəndərovu gizlinlərini ictimailəşdirməklə təhdid ediblər.

Bildiriblər ki, onların iştirakı və üzərlərindən gerçəkləşdirilən maxinasiyalar haqda danışacaqlar. Həmin vaxt mətbuatda  Fazil Məmmədovun özəl və biznes xəbərləri, o cümlədən hətta xaricdəki bank hesabları barədə təfərrüatlar mətbuata sızdırılmağa başlamışdı. Bundan sonra vergilər naziri çetesi daxilində yaranan ciddi problemin sülh yolu ilə həlli istiqamətində addımlar atdı, Samir Qurbanovu həbsə yollayan Fazil Məmmədov özü onu oradan xilas etdi. Vaxtilə Bakı Şəhər Baş Polis İdarəsində Cinayət-Axtarış İdarəsinin rəisi işləmiş Samir Qurbanovun azad olunandan sonra ölkədən getdiyi haqda da xəbərlər var. Mümkündür ki, Fazil Məmmədovla əlaqəli aparılan səssiz araşdırmaların bir elementi də bu məsələ olsun.  

Hazırda Fazil Məmmədovun qubernatorluğuna daxil olan rayonlarda – Şəmkir, Gədəbəy, Binəqədi, Yardımlıda icra hakimiyyəti başçıları da çıxılmaz durumdadır. Fazil Məmmədovun qəfil işdən çıxarılması ona arxalanıb qanunsuzluqlara qol qoyan icra başçılarının durumunu kəskin şəkildə ağırlaşdırıb. Bu gün bu rayonlardan istənilən birinə prokurorluğun yoxlama qrupu göndərilsə, çoxsaylı qanunsuzluqların müyyən olunacağı şübhəsizdir.

Gədəbəydən aldığımız son məlumatlara görə, icra başçısı Ramiz Yediyarov qeyri-müəyyənlikdən istifadə edərək idarə və təşkilatlardan pul yığdırır. Başçı pulun hansı məqsəd üçün yığıldığını demir, tələsik şəkildə pul yığımı ilə bağlı tapşırığının icra olunmasını istəyir. Bu tələskənliyin nə ilə əlaqəli olmasını isə bilən yoxdur. Belə xəbərlər var ki, R.Yediyarov patronu Fazil Məmmədiov kimi qəfildən işdən çıxarılacağını ehtimal etdiyindən tələskənliyə düşüb. Bu həm də onu göstərir ki, Fazil Məmmədovun kadrları olan icra başçıları çamadan ab-havasındadırlar…(musavat.com) 


Bu gün Bakı Ağır Cinayətlər Məhkəməsində "Kanal-13" internet televiziyasının həbsdə olan icraçı direktoru Əziz Orucovun cinayət işi üzrə məhkəmə prosesi davam etdirilib.

APA-nın məlumatına görə, hakim Mirzə Xankişiyevin sədrlik etdiyi iclasda Ə. Orucovun vəkilləri çıxış edərək, ona bəraət istəyiblər.

Sonra Ə. Orucov son sözlə çıxış edib. O da çıxışında barəsində bəarət hökmünün çıxarılmasını istəyib.

Hakimlər kollegiyası hökmü elan etmək üçün müşavirəyə gedib.

Müşavirədən sonra hökm oxunub. Hökmə əsasən, Ə. Orucov 6 il müddətinə azadlıqdan məhrum edilib.

Əziz Orucov mayın 2-də polisə müqavimət ittihamı ilə saxlanılıb, ona 30 sutka inzibati həbs cəzası verilib. Azadlığa buraxılmalı olduğu gün – iyunun 1-də Baş Prokurorluğun Ağır cinayətlərə dair işlər üzrə İstintaq İdarəsində barəsində cinayət işi başlanıb, ona Cinayət Məcəlləsinin 192-ci (qanunsuz sahibkarlıq) və 308-ci (vəzifə səlahiyyətlərindən sui-istifadə) maddələri ilə ittiham verilib. Elə həmin gün Nəsimi Rayon Məhkəməsinin qərarı ilə onun barəsində 4 aylıq həbs-qətimkan tədbiri seçilib.

Ə.Orucov ittihamları qəbul etmir. «Kanal 13»ün rəhbəri, Almaniyada mühacir olan Anar Orucov da bildirib ki, qardaşı onun özünün və rəhbərlik etdiyi media orqanının tənqidçi fəaliyyətinə görə həbs olunub.


Müsavat Partiyası başqanının müavini Tofiq Yaqublu digər müavin Elman Fəttahın vəzifəsindən istefa verməsinə münasibət bildirib. 

T. Yaqublu açıqlamasında E. Fəttahın haqlı olduğunu bildirib: "Çünki partiyada fikir ayrılığı var. Düzdür, Elman Fəttah mənim Milli Şurada olmağımı istəmir. Ancaq bu istefa mənimlə bağlı deyil, onun dediyi fikir ayrılığı ilə əlaqədardır".
T. Yaqublu partiyadakı fikir ayrılığının nədən ibarət olduğunu şərh etmək istəməyib. 
Qeyd edək ki, E. Fəttah
Müsavat Partiyasındakı vəzifəsindən istefa verib. O, istefasını partiyanın idarəçiliyində yaranan fikir ayrılığı ilə əsaslandırıb.


Vəkil: “Əfqanın dəmir barmaqlıqlar arxasından çıxarılmasına icazə verilmədi”

Dekabrın 14-də Balakən Rayon Məhkəməsində hakim Hümbət Səlimovun sədrliyi ilə jurnalist Əfqan Muxtarlının məhkəməsi davam edib. Prosesi işıqlandırmağa gələn jurnalistlər içəriyə buraxılmayıb. Təqsirləndirilən tərəf bunu açıq məhkəmə formatının pozuntusu kimi qeyd etsələr də, etirazları nəzərə alınmayıb.

Prosesdə baş verənlər barədə məlumat verən vəkil Elçin Sadıqov Meydan TV-yə deyib ki, məhkəmə baxışından əvvəl vəkillər yenə də Əfqan Muxtarlının dəmir barmaqlıqlar arxasından çıxarılıb vəkillərin yanında oturması üçün vəsatət qaldırıb. Lakin vəsatət təmin olunmayıb. Halbuki noyabrın 30-da keçirilən prosesdə bu vəsatətə təmin edilmişdi.

Vəkillərdən Nemət Kərimli məhkəmə zalında polis əməkdaşlarının iştirakına etiraz edib. Bildirib ki, açıq məhkəmə prosesinin polis nəzarəti altında aparılması təzyiqdir. Müdafiəçi polislərin çıxarılmasını istəsə də, hakim razılaşmayıb.

Bundan sonra vəkil Elçin Sadıqovun Əfqan Muxtarlının təqsirsizlik prezumpsiyası ilə bağlı sənədlərin işə əlavə olunması barədə vəsatəti müzakirə edilib və təmin olunub. Bu vəsatətdə Ə.Muxtarlının həbsindən dərhal sonra Dövlət Sərhəd Xidməti və Baş Prokurorluğun onun haqqında yaydığı bəyanatdan bəhs olunur. Bəyanatda Əfqanın sərhədi qanunsuz keçmək istərkən saxlandığı, üzərindən pul tapıldığı iddia olunur. Bu bəyanatla dövlət orqanlarının Ə.Muxtarlının təqsirsizlik prezumpsiyası hüququnu pozduğunu deyən vəkil sənədin iş materiallarına əlavə olunmasını və sənədlərin tədqiqi mərhələsində araşdırılmasını istəyirdi.

Dövlət ittihamçısı Qürbət Məmmədov ittihamı elan etdikdən sonra Əfqan Muxtarlı ifadə verib. Bildirib ki, onu Gürcüstandan oğurlayaraq Azərbaycana gətiriblər. O, oğurlanan zaman işgəncəyə məruz qaldığını vurğulayıb:

“Mən prezidentin ailəsinin biznesi haqqında araşdırma yazdığıma görə həbs olunmuşam. Həbsimin sifarişi də şəxsən İlham Əliyevdən gəlib”.

Əfqan Muxtarlı həbs olunduğu günü belə təsvir edib:“Evə tərəf gedəndə üç nəfər mülki geyimli yaxınlaşdı. Məni zorla maşına mindirmək istəyəndə müqavimət göstərdim. Məni döyə-döyə maşına mindirdilər. Şəhərdən çıxanda başıma torba keçirdilər. Bir müddət gedəndən sonra maşını saxladılar. Başımdan torbanı çıxartdılar. Fikirləşirdim ki, məni öldürəcəklər. Həmin anda Rasimi, Rafiq Tağını xatırladım. Ona görə də onlara dedim ki, xahiş edirəm, məni bıçaqla yox, güllə ilə öldürün. Dedilər ki, narahat olma, sənə heç nə etməyəcəyik. Ardınca yenə başıma torba keçirdilər, ağzımı “skoçladılar”, bir qədər də sürdülər. Sonra maşını dəyişdilər. Bu maşındakı Azərbaycan mahnısından başa düşdüm ki, deyəsən, Azərbaycandayam. Yolda maşındakılardan biri kiməsə zəng eləyib dedi ki, “cənab general, mollanı gətirdik, yas yerinə gedirik”. Bir qədər də gedəndən sonra məni düşürüb, bir yerə saldılar, başımdan torbanı çıxartılar. Otaqdan başa düşdüm ki, hərbi hissəyə gətiriblər. Oradan da Bakıya gətirdilər”.

Daha sonra zərərçəkmiş və şahidlər ifadə verib.

Elçin Sadıqovun verdiyi məlumata görə, 4 şahid və 1 zərərçəkənin ifadəsi dinlənilib:

“Şahid və zərərçəkənlərin bir-birindən fərqli, ziddiyyətli ifadə verməsi cinayət işinin açıq-aşkar saxta olmasını sübut edir. Bundan başqa, proses gedərkən zalın qapısı açıq qoyulmuşdu və şahidlər içəridə baş verənləri eşidirdi. Bizim etirazımızdan sonra cəmi bir şahidin ifadəsi zamanı etirazımız təmin olundu. Əfqan həmin ifadələrin yalan olduğunu deyirdi və onları doğru danışmağa çağırırdı”.

Fasilədən sonra hakim məhkəmənin 28 dekabr 10:30-a qədər təxirə salındığını elan edib.

Oturum izni ilə Gürcüstanda yaşayan jurnalist mayın 29-u Azərbaycanda həbs edilib. Dediyinə görə, Tbilisidə saxlanıb, ona işgəncə verilib, zorla sərhədə gətirilərək Azərbaycan tərəfinə təhvil verilib. Üstəlik, cibinə 10 min avro pul qoyulub.

Azərbaycan hökuməti isə jurnalisti Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət və ya zor tətbiq etmədə ittiham edir. Bundan başqa, ona 318.1, 206.1 maddələr ilə – sərhədi qanunsuz keçmə və qaçaqmalçılığa görə də ittiham irəli sürülüb. Beynəlxalq hüquq müdafiə təşkilatları Əfqan Muxtarlının siyasi məhbus kimi tanıyır.


Kamal Heydərov adlı sosial şəbəkə istifadəçisi Bakıda uşaqlar üçün satılan dərmanla bağlı şok iddia irəli sürüb.

O, sosial şəbəkədə apteklərdə satılan və Fransa istehsalı olduğu bildirilən "Aquadok” dərmanının saxta olduğunu yazıb:"Aptekdən uşaqlara burun üçün sprey "Aqualor” alıram. Satıcı deyir "Aqualor” yoxdur, gəl "Aquadok” verim. Deyir Fransanındır bu, yaxşıdır. Üstünə baxıram "Made in France”. Üstündə sayt da var: www.aquadok.com. Evdə baxıram dərmandan gözüm su içmir. Sayta girirəm sayt açılmır, sayt expired. GoDaddy hostinqdə search edirəm saytı, registrasiya edənin adı İlqar İskəndərli. Bu da sənə "made in France”. Çinin hansısa kəndində dərman düzəltdirib "Aqualor”a oxşadıb, dizaynını, adını, satıcıya həkimə pul verib 10 AZN-ə satdırırlar, içində isə adi duzlu su”.(Bakupost.az)


Azərbaycan Baş nazirinin köməkçilərinin sayı azaldılıb.

Bununla bağlı Baş nazir Artur Rasi-zadə "Azərbaycan Respublikası Nazirlər Kabineti Aparatının strukturunun ştat cədvəli”ndə dəyişiklik edilməsi barədə qərar imzalayıb.

Dəyişikliyə əsasən, Baş nazirin köməkçilərinin sayı 7-dən 3-ə endirilib.

Bundan başqa, Baş nazirin birinci müavininin köməkçilərinin sayı artırılaraq 2-yə çatdırılıb. Ştat cədvəlinin "Baş nazirin birinci müavininin xidməti” bölməsinə isə 4 baş məsləhətçi ştatı əlavə edilib. Nazirlər Kabinetinin Hüquq şöbəsində də aparıcı məsləhətçi ştatı yaradılıb. 

Dəyişikliyə əsasən, Normativ hüquqi aktların sistemləşdirilməsi və arxiv işi üzrə sektor şöbəsində böyük məsləhətçilərin sayı 1-dən 2-yə, məsləhətçilərin də sayı 1-dən 2-yə çatdırılıb.(report.az)


"Qüdsdə, bu qədim şəhərin küçələrində dolanan hər kəs oranın işğal altında olduğunu anlayacaq".

BusözləriTürkiyə prezidentiRəcəbTayyib Ərdoğan İslam ƏməkdaşlıqTəşkilatının (İƏT) Qüdsməsələsiilə bağlı İstanbuldakeçirilənfövqəladə sammitində çıxışı zamanı deyib.
O bildirib ki, dekabrın 6-da ABŞ beynəlxalq hüquqa məhəl qoymayaraq Qüdsü İsrailin paytaxtı kimi tanıdığını açıqlayıb: “Bu şəhərlə bağlı belə qərarın açıqlanmasının heç bir hökmü ola bilməz. ABŞ-ın da veto hüququna malik olduğu BMT TŞ qərarına əsasən heç bir ölkə Qüdsdə səfirlik aça bilməz. ABŞ-ın bu hüquqsuz qərarına yalnız Qüdsü işğal altında saxlayan İsrail dəstək verib. İslam ölkələri ilk andan açıq şəkildə bu qərarı tamamilə rədd edib. Bu qərarın vicdan, hüquq, əxlaq və tarix önündə hökmsüz olduğunu elan etdik. Bu barışı istəyən fələstlinlilərin cəzalandırılması mənasına gəlir.
1947-ci ildə və indi İsrail və Fələstinin ərazilərini müqayisə etdikdə, İsrailin işğalçı və terrorçu dövlət olduğu aydın görünür".


Fəridə İsmayılova: "Rektor mənə deyir ki, məsələni ictimailəşdirməklə özünü çətinə salmısan”

Bakı Qızlar Universitetinin Sosial Pedaqoji fakültəsinin 3-cü kurs tələbəsi Fəridə İsmayılovanın təhsil aldığı müəssisədə təzyiqlə üzləşməsi haqda məlumat vermişdik. 

F.İsmayılova bir neçə gün əvvəl mətbuata müraciət edərək bildirib ki, qaib limiti bitmədiyi halda universitetə getmədiyi üçün rektor Sevinc Rəhimova tərəfindən dərsdən çıxarılması tələb edilib: "5 qaibim var və limiti aşmamışam. Birinci dərsin yarısında dekanlığa çağırıldım. Dekan mən və digər qrup yoldaşımdan dərsdən çıxmağımızı tələb etdi. 

Biz isə dərsdə iştirak etmək istədiyimizi deyib sinfə geri döndük. Bir neçə dəqiqə sonra rektor sinif otağına daxil olaraq bizi məcburi formada çölə çıxarmaq istədi. Müəllimə də tapşırdı ki, qaib yazsın. Hətta qrup yoldaşımın halı pisləşdi. Əvvəlcə yalandan etdiyini deyib bizə icazə vermədi ki, qıza kömək edək. Daha sonra qrup yoldaşımın halı pisləşdiyi üçün təcili yardım gəldi. 

Sevinc xanımın atası Ağarəhim Rəhimov (sabiq rektor) gəldi və bizə qarşı hamının içində alçaldıcı ifadələr işlətdi. Limiti aşmadığım təqdirdə dərsə necə gəlib-getdiyimin heç kimə aidiyyəti yoxdur. Özü də Baloniya sistemində təhsil alırıqsa, ümumiyyətlə, bir söz deyə bilməzlər. Mən də artıq emosiyalarıma sahib çıxa bilmədim. Odur ki, universitetdə avtoritar sistem olduğunu dedim. İndi bizə şər atırlar, universitetdə başqa bir cənublu qızla dövlət əleyhinə hansısa bir təşkilata üzv olduğumuzu və separatçılıq etdiyimizi iddia edirlər. DTX ilə qorxudurlar. Saxta şahidlər tutaraq etmədiyim bir şeyi boynuma qoymaq istəyirlər.

Atamı universitetə çağırıb yanımda təhqir ediblər. "Qızın 6 ay universitetdən uzaq qalsın, ağlı başına gəlsin” deyiblər”.

Məsələ ictimailəşdikdən sonra müxtəlif reaksiyalar oldu. İnsanlar gənclərə qarşı ali təhsil müəssisəsində baş verən haqsızlıqdan hiddət ifadə etdilər. AFN olaraq biz də məsələni dərindən araşdırmaq, F.İsmayılovanın özünü, atasını, tələbə yoldaşlarını bir daha dinləmək qərarına gəldik. 

Gənc tələbənin atası İldırım İsmayılovun sözlərinə görə, ona universitetdə bildiriblər ki, guya qızı hansısa təşkilatın üzvüdür, ona görə 6 aylığa uzaqlaşdırılır: 

"Mən Ağarəhim Rəhimovun yanına gedəndə ayağını stulun üstünə qaldırıb oturmuşdu, iki dəfə qapını döydüm ki, müəllim, olar gəlim? Axırda qayıtdı ki, gəl da, daha gəlmisən. Qapıdan uşaq da girəndə adam ixtiyarsız olaraq tərpənir, özünü qaydasına salır, o isə heç vecinə də almadı ki, valideyn girib otağa, özü də yaşlı adamdır. Neçə dəfə getdim yanına, eyni sözü dedi mənə. Hadisə təzə olanda mən qızımı tənbeh etdim ki, get üzr istə, ağsaqqal adamdır, qızı təhqir etmişdi, üstəlik, mənim də barəmdə təhqiramiz ifadə işlədim qızımın yanında”. 

F.İsmayılova bildirdi ki, artıq bir neçə dəfə təhsil aldığı universitetə getsə də, onu dərsə buraxmayıblar: "Dedilər ki, guya məni başqa qrupa keçiriblər, amma universitetdə başqa qrup deyə bir şey yoxdur. Heç məni universitetə də buraxmırlar, deyirlər, get 6 aydan sonra gələrsən. Bu, hansı qanunda yazılıb, hansı əsaslarla bunlar məni "cəzalandırırlar”, bilmirəm. Ağarəhim müəllim atama deyib ki, qızın ruhi xəstədir. Halbuki mən psixologiya oxuyuram, gələcəkdə kiməsə diaqnoz qoyacam. Gələcəyin mütəxəssisinə belə şər atmaq cinayətdir”.

F.İsmayılova ilə eyni qrupda oxuyan ondan çox tələbə saytımıza tələbə yoldaşları ilə bağlı danışıblar. Təzyiqlərdən ehtiyac edən tələbələr adlarının çəkilməməsi şərtilə F.İsmayılovanın universitetdəki davranışı, oxuması haqda fikir bildirdilər. Ümumi rəy olduqca müsbətdir. Tələbələr birmənalı olaraq yoldaşlarının haqsızlıqla üzləşdiyini deyirlər. Eyni zamanda onun heç bir təşkilata, quruma üzv olmadığını, F.İsmayılova haqda hər hansı bir şübhəyə düşmədiklərini bildirirlər. Söhbət zamanı o da məlum oldu ki, bütün müəllim və tələbə heyəti ilə F.İsmayılovanın münasibəti yüksək səviyyədə olub, hər zaman dərslərini yaxşı oxuyub: "Biz anlamırıq ki, təşkilat söhbəti nə məsələdir ki, ortaya atırlar. Fəridəyə qarşı bu haqsızlığa etiraz edirik”.

Tələbələrlə söhbətdən o da məlum oldu ki, S.Rəhimova bu ildən dekan olub: "Bu ilədək Nərminə xanım idi, o çıxarılandan sonra Sevinc xanım rektor ola-ola dekan qoyuldu, indi o, həm dekandır, həm də rektor”.

Hadisə baş verən gün auditoriyada olan tələbələrin hadisə haqda danışdırlaqından aydın olur ki, dekan 1-ci saatda keçirilən gender psixologiyası dərsinə girərək Bahar müəllimdən dərsdə ola-ola iki tələbəyə - F.İsmayılova və Sevinc adlı digər tələbəyə qaib yazılmasını, özlərinin isə dərsdən çıxarılmasını tələb edib. Lakin müəllim buna etiraz edib, tələbə dərsdə ola-ola qaib yaza bilməyəcəyini deyib. Hadisələrin gedişində Sevincin halı pisləşib, Fəridənin yardım etməsinə isə dekan icazə verməyib. Sonra o gedib və atası A.Rəhimovla birlikdə qayıdıb. A.Rəhimov öncə Bahar müəllimi qovub, sonra isə F.İsmayılovanı təhqir edərək sinifdən qovmağa çalışıb. Tələbələrin sözlərinə görə, digər tələbənin halı pisləşsə də, rektor və atası onun artistlik etdiyini deyib gediblər: "Biz təcili yardım çağırdıq və ona tibbi yardım göstərildi”.

F.İsmayılova deyir ki, bütün aidiyyatı rəsmi qurumlara üzünü tutaraq ona atılan böhtanın araşdırılmasını istəyir: "Onlar deyirlər ki, ola bilsin mən hansısa təşkilatın üzvüyəm, ölkə rəhbərliyinə, DTX-ya, hüquq-mühafizə orqanlarına üzümü tuturam, bu iddianı araşdırsınlar, mənə vurulan ləkəni təmizləsinlər”.

F.İsmayılova bu gün də universitetə gedərək S.Rəhimova ilə söhbət edib. Rektor ona bildirib ki, məsələni ictimailəşdirməklə işini çətinə salıb(?). Eyni zamanda tələbə hansısa təşkilata üzv olması barədə ona böhtan atılması məsələsini önə çəkərkən S.Rəhimova "nə isə deməliydik da” deyərək özünə haqq qazandırmağa çalışıb. Rektor tələbənin 6 ay müddətinə universitetdən uzaqlaşdırılması qərarına da şərh verə bilməyib və "mənlik deyil” deməklə canını qurtarıb.

Təhsil eksperti Almaz Həsrət məsələyə münasibət bildirərkən dedi ki, 6 ay müddətinə təhsildən uzaqlaşdırılmaq kimi bir cəza növünə hələ rast gəlməyib: "Bəlkə də, təhsil qanunvericiliyinə nə isə yenilik ediblər, yaxud ali təhsil müəssisəsinin daxili qaydalarında bu əksini tapıb. Amma bu zaman da tələbəyə yazılı formada təqdim olunmalıdır ki, filan qanuna, filan qaydaya əsasən, filan hərəkətə görə 6 ay müddətinə təhsildən kənarlaşdırılma ilə cəzalandırılır. Əks halda, baş verənlər tam bir hüquq pozuntusu, haqsızlıqdır”.

Qeyd edilənlərlə bağlı Sevinc Rəhimovanın mövqeyini almaq istəsək də, xanım rektoru yerində tapa bilmədik. Rəhbəri olduğu dekanlığın 012-596-20-39 saylı telefona zəng etdiyimiz zamanı cavab verən xanım S.Rəhimovanın yerində olmadığını deyib bizdən əlaqə nömrəsi götürsə də, sonradan nə əlaqə saxlandı, nə də həmin nömrəyə edilən zənglər cavablandırıldı. Hər bir halda qarşı tərəfin mövqeyini verməyə hazırıq.

Mövzunu diqqətdə saxlayacağıq.

afn.az


17 -dən səhifə 228