Bazar ertəsi, 19 Fevral 2018 00:00

Maliyyə Nazirliyində nə baş verir?

Yazan

Azər Bayramov və Nadir Qarayev Samir Şərifova qarşı...

Bu ilin aprelində keçiriləcək prezident seçkisindən sonra hakim komandada radikal dəyişikliklərin olacağına dair xəbərlər var. 

Mediada yer alan məlumatlara görə, hakimiyyətin yaxa qurtarmağa çalışdığı bir neçə mühüm post sahibi var və prezident seçkisindən dərhal sonra onların adları İlham Əliyevin yeni komandasının siyahısında olmayacaq. Belə ki, vurulacağı deyilən şəxslərin əksəriyyətinin iqtisadi blokda təmsil olunan məmurlar olacağı gözlənilir.

Bu məlumatı AFN.Az məlumat yayıb.

Sayt xəbər verir ki, hakimiyyət üçün arzuolunmaz sayılan kadrlar arasında maliyyə naziri Samir Şərifovun, eyni zamanda Mərkəzi Bankın İdarə Heyətinin sədri Elman Rüstəmovun adı çəkilir. Ölkənin maliyyə və bank sektorundakı vəziyyətdən sorumlu olan bu şəxslər neftin dünya bazar qiymətinin düşdüyü dövrdə qeyri-peşəkar yanaşmalarıyla iqtisadiyyatda böyük problemlərin yaranmasına rəvac veriblər. Belə ki, böhranın başlandığı ilkin dövrdə yerli və xarici ekspertlərin təkidli çağırışlarına rəğmən Azərbaycanda manatın məzənnəsi sərbəst buraxılmadı. 

Maliyyə-bank sektorunun başbilənləri Mərkəzi Bankın vəsaitləri hesabına manatın məzənnəsini süni surətdə saxlamağa cəhd göstərdilər. Nəticədə, qısa bir müddətdə Mərkəzi Bankın 18 milyard dollar təşkil edən valyuta ehtiyatları 4 milyard dollara düşdü. 

Manatın devalvasiyalarından sonra məlum oldu ki, manatın məzənnəsinin böyük zərər hesabına saxlanması heç də səbəbsiz deyilmiş: müəyyən qüvvələr Azərbaycanda dolların ucuz olmasından istifadə edərək milyardlarla dollar qazanc əldə ediblər. Dövlət başçısı səviyyəsində açıqlanan məlumatlardan aydın oldu ki, bu qüvvələr gündə yüz milyonlarla dollar əldə etməyi bacarıblar. 

Bu haqda bir neçə gün əvvəl "Yeni Müsavat” qəzeti yazıb.

"Eyni zamanda aydın məsələdir ki, uzun illər Mərkəzi Banka rəhbərlik etməklə ölkənin bank sektorunu əlinin içi kimi tanıyan E.Rüstəmov, maliyyə sisteminə rəhbərlik edən S.Şərifov proseslərin belə xarakter alacağını görməmiş deyildilər. Bu halda onların hansı maraqlardan çıxış edərək dolları ucuz saxlamağa çalışdıqları sıravi vətəndaşlardan tutmuş, ölkə rəhbərliyinə qədər hamını düşündürəcək sualdır.

Baş bankirlə baş maliyyəçinin mütləq və mütləq görməli olduqları digər cinayət, əlbəttə ki, Beynəlxalq Bankdan oğurlanan on milyardlarla manat dövlət vəsaitidir. Biri bank sektorunun, digəri isə maliyyə sisteminin tənzimləyicisi, biri banklardan verilən kreditlərə, digəri birbaşa Beynəlxalq Bankdan verilən kreditlərə nəzarət edən iki məmurun gözləri önündəcə dövlətin pulu talan edilirsə və onlar bunu görmürlərsə, demək ki, ya tutduqları vəzifəyə uyğun bilik-bacarıqları yoxdur, ya da baş verənlərdə hansısa maraqları və iştirakları olub. Bu, sübuta ehtiyacı olmayan aksiomdur”, – deyə qəzetin yazdığı məqalədə bildirilir.

Samir Şərifovun da yeni komandada yer almayacağını yazan afn.az saytı qeyd edir ki, artıq nazirlikdə onun yerinə hazırlaşanlar da var: "Maliyyə nazirinin birinci müavini Azər Bayramov və 1 saylı Xəzinədarlıq idarəsinin rəisi Nadir Qarayev birincinin nazir postuna gətirilməsi uğrunda fəaliyyətə başlayıblar. Yaxın günlərdə Samir Şərifov haqda mediaya kompromatların ötürülməsi planlaşdırılır. Artıq bunun əlamətləri görünməkdədir. Belə ki, hər iki şəxs, özləri haqda mediada yüngül tənqidi yazılar yazdırmağa başlayıblar. Belə təəssürat yaratmağa çalışırlar ki, guya onlar rəhbərliyin tələbi ilə qanundankənar işlər görməyə məcbur edilirlər. Bu barədə hər iki məmur yaxın ətrafları vasitəsilə də məlumat yayır. Azər Bayramov maliyyə idarələrinin əksəriyyətinə öz adamlarını yerləşdirib. Onlar da Samir Şərifovun adından yerlərdə qanunsuz işlər görür, idarələrə işi düşən adamları incidirlər. Bütün fəaliyyət hazırkı naziri gözdən salmağa, onun haqqında mənfi rəy yaratmağa yönəlib. Düzdür, Samir Şərifov da təmiz adam deyil, o da bilərəkdən, yaxud bilməyərəkdən yaxşı rəhbərlik edə bilməyib maliyyə sahəsinə. Amma Azər Bayramovun etdiyi arxadan zərbədir. Onun isə bütün bu işlərdə bir nömrəli əlaltısı Nadir Qarayevdir. Onlar yaxın qohumdurlar, səhv etmirəmsə qudadırlar. Azər Bayramov qohumunu Dövlət Xəzinədarlıq Agentliyinə baş direktor gətirmək istəsə də, bacarmadı. Bunun əvəzində isə Nadir Qarayev məclislərin birində demişdi ki, "Azərin (Azər Bayramov nəzərdə tutulur-red.) canı sağ olsun, o nazir olanda mənin vəzifəm agentlik rəhbərliyindən də yüksək olacaq”. 

N.Qarayevin DXA-ya baş direktor gətirilməməsinin səbəbləri haqda bir neçə gün əvvəl mediada məlumat gedib. Bildirilir ki, N.Qarayev "MTN işi” ilə bağlı təqsirləndirilən tərəf olaraq istintaqda dindirildiyi üçün Samir Şərifovun yanında etimadını itirib və bu səbəbdən də vəzifədə irəli gedə bilməyib. 

N.Qarayev haqda yayılan məlumatlarda daha sonra qeyd edilir ki, o, tikinti işinə girişib və hazırda Bakıda tanınmış iş adamı ilə birgə çoxmərtəbəli bina tikdirir.

"Bu günlərdə AFN-də də dərc edilən daha bir yazıda qeyd edilirdi ki, rabitə Rabitə və Texnologiyalar Nazirliyinin keçmiş aparat rəhbəri, hazırda isə dövlət əmlakının mənimsənilməsinə görə həbs edilən Vidadi Zeynalov Nadir Qarayevlə yaxın dost olub. Elə Nadir Qarayevi Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovla əməkdaşlığa cəlb edən də məhz Vidadi Zeynalovun olduğu qeyd olunur. Bildirilir ki, Akif Çovdarov böyük maliyyə maxinasiyalarına görə Nadir Qarayevi həbs edib. Bundan sonra isə dövriyyəyə Vidadi Zeynalov girib. Dostunu Akif Çovdarovun caynaqlarından qurtaran Vidadi Zeynalov onu Akif Çovdarovla əməkdaşlığa da sövq edib", - sayt yazır. 

Məlumatda iddia edilir ki, Nadir Qarayev MTN-ə Maliyyə Nazirliyi və nazir Samir Şərifovla bağlı çoxlu sayda faktlar ötürüb. Həmin məlumatlar sayəsində isə MTN-də Maliyyə Nazirliyində bəzi şəxsləri qısa müddətdə həbs edərək onlardan külli miqdarda pul alıblar. Məlumatda qeyd edilir ki, 1 saylı Xəzinadarlıq İdarəsi rəisinin bu xəyanəti barədə Samir Şərifovu məlumatlandırıblar və bundan sonra nazir onun üstündən xətt çəkib. Nazirin bu qərarına etiraz etdikdən isə Nadir Qarayevə qarşı yoxlama təşkil edilib və çox ciddi maliyyə yeyintiləri ortaya çıxıb. Ancaq nazir müavini, N.Qarayevin yaxın qohumu Azər Bayramovun məsələyə müdaxiləsi nəticəsində Nadir Qarayevin cinayəti qabardılmayıb və o öz vəzifəsini qoruyub saxlaya bilib.

1 saylı Xəzinədarlıq İdarəsi rəisinin macəraları bununla da bitmir. Bəzi məlumatlara görə, N.Qarayev indi də bütün fəaliyyətini Dövlət Xəzinədarlıq Agentliyinin baş direktoru Elman Piriyevə qarşı yönəldib. Onun hər addımda baş direktor haqda mənfi rəy yaratmağa çalışması haqda məlumatlar da yayılıb. 

Maliyyə Nazirliyi isə yayılan məlumatlara və yazıya hər hansı bir rəsmi reaksiya verməyib. 

Rusiyanın Orenburq şəhərində yanğın nəticəsində yaralananlar azərbaycanlılardan biri xəstəxanada ölüb.

Bu barədə APA-nın Rusiya bürosuna Orenburqdakı Azərbaycan icmasının rəhbəri Yaşar Məsimov bildirib.

Fevralın 12-də Orenburq şəhərinin Salmışskaya küçəsi 58/1 ünvanında yerləşən binanın 9-cu mərtəbəsində baş verən yanğın nəticəsində ağır yanıq xəsarəti alan 1992-ci il təvəllüdlü Quliyeva Sədaqət Eysevər qızı bu gün xəstəxanada ölüb.

Diaspor rəhbəri yanğın nəticəsində yaralanan şəxslərdən hazırda dörd nəfərinin xəstəxanada olduğunu, onlardan 82 yaşlı İzzət Quliyevanın vəziyyətinin olduqca ağır olduğunu söyləyib.

Qeyd edək ki,  fevralın 12-də günorta saatlarında Orenburq şəhərinin Salmışskaya küçəsi 58/1 ünvanında yerləşən binanın 9-cu mərtəbəsində yanğın baş verib.

Nəticədə 1980-ci il təvəllüdlü Quliyev Hatəm (Namiq) Akif oğlu, onun 3 yaşlı qızı Leyla və 6 yaşlı oğlu Eysevər, 1967-ci il təvəllüdlü Qabil Qarayev ölüblər.

Yanğın zamanı 2009-cu il təvəllüdlü Sevinc Quliyeva, 1995-ci il təvəllüdlü Aytən Quliyeva, 1969-cu il təvəllüdlü Sevinc Quliyeva və 1936-cı il təvəllüdlü İzzət Quliyeva, o cümlədən 1992-ci il təvəllüdlü Sədaqət Quluyeva ağır yanıq xəsarəti almışdı.

Məscidin imamının İlham Əliyevə səs istəməsi namaza gələnlər arasında narazılıq yaratdı.

Dünən Bakıda Əjdərbəy məscidində (Göy məscid) Cümə namazı zamanı xoşagəlməz, eyni zamanda qanunvericiliyə də zidd hadisə yaşanıb. Məscidin imamı əvvəlcə Cümənamazının fəzilətlərindən, məscid ədəb-ərkanından danışandan sonra prezident seçkilərinə keçib. Qafqaz Müsəlmanları İdarəsinin sədri Allahşükür Paşazadənin bir neçə gün əvvəlki çağırışını yada salıb. Bildirib ki, bir neçə gün öncə Şeyxin məscidlərin imamları ilə görüşü olub, həmin görüşdə prezident seçkiləri haqda ətraflı danışılıb.

Fevralın 14-də baş tutan həmin görüşdə A.Paşazadə axund və imamlara göstəriş vermişdi ki, bütün məscidlərdə bu həftənin cümə günü xütbələrdə seçkilərdə İlham Əliyevin namizədliyinə səs verilməsi üçün çağırış etsinlər.

Görünür, məscidin imamı A.Paşazadə ilə görüşü yada salaraq, demək istəyirdi ki, bundan sonrakı çıxışı onun öz təşəbbüsü yox, Şeyxin göstərişidir.

Şeyxlə görüş haqda bir qədər danışandan sonra isə konkret ad çəkməsə də, dolayısıyla İlham Əliyevə səs verməyə belə çağırış edib: "Bu məscidləri tikən, təmir etdirən, azan səslərinin ucalmasına şərait yaradan, torpaqları işğaldan azad edən, bizə yaxşı yaşamağa şərait yaradan adama siz də arxa durmalısınız, bu, sizin borcunuzdur…"

İmamın bu cür çıxışı namaza gələnlərin bir çoxunun narazılığına səbəb olub. O, ad çəkmədən "məscidləri tikən, yaşamağa şərait yaradan şəxs" haqqında danışanda Cümənamazına gələnlərdən biri yerindən müdaxilə edib: "Bunları eləyən Allahdır…"

Daha bir nəfər isə dinin siyasətə qatılmasına etiraz edib: "Adamların heysiyyəti ilə oynamayın…"

Hətta bir neçə nəfər bundan sonra həmin məscidə namaza gəlməyəcəyini bildirib. (azadliq.info)

Bu gün İranda sərnişin təyyarəsi qəzaya uğrayıb.

Verilən xəbərlərə görə, İranda Tehran aerportundan havaya qalxdıqdan təxminən 30 dəqiqə sonra İsfahan əyalətinin Semirem rayonunda Dena dağına çırpılan sərnişin təyyarəsində 60 sərnişin və 6 ekipaj üzvü olub. Qəza nəticəsində təyyarədə heç kəs sağ qalmayıb.

Təyyarənin Tehran-Yasuc aviareysini yerinə yetirdiyi açıqlanıb.

Qəzanın səbəbləri hələlik müəyyən edilməyib. Ehtimallara görə təyyarə pis hava şəraitinə görə dağa dəyib. Hadisə yerinə axtarış-xilasetmə briqadası göndərilib, lakin briqadanı aparan vertolyot pis hava şəraitindən eniş edə bilməyib. Təyyarənin qalıqlarının yeri hələ müəyyən deyil.

“Fars” agentliyi bildirir ki, qəzaya uğrayan təyyarənin komandiri Höccət Fulad peşəkar pilot olub. O, 2013-cü ildə Tehran-Yəsuc reysi ilə uçarkən havada təyyarənin mühərrikləri sıradan çıxıb. Komandir bu vəziyyətdə təyyarəni yerə endirə bilib və sərnişinlərin, heyət üzvlərinin həyatını xilas edib. Bu dəfə isə görünür komandirin heç bir şansı olmayıb.

Aviaşirkət bildirir ki, ATR 72-500 tipli təyyarə Tehran-Yəsuc reysini həyata keçirərkən İsfahan vilayətində radarlardan itib. Təyyarə Dena dağına dəyərək partlayıb. 

İran səfərindən qayıdan Vətəndaş və İnkişaf Partiyasının sədri Əli Əliyev mətbuata danışıb.

- İran səfəriniz necə keçdi? İrana bundan əvvəl getmişdinizmi? Səfərdə rəsmi dairələrlə görüşlər oldu?

- Bu, İrana ilk səfərim idi. Səfər İran İslam Respublikasının Xarici İşlər Nazirliyi tərəfindən təşkil edilmiş, İranın Azərbaycandakı səfirliyi vasitəsilə bizə çatdırılmışdı. Qeyd edim ki, səfər boyu İran hökümətinin yüksək diqqətini üzərimizdə duymuşuq. Tehran hava limanında qarşılanmadan son ana qədər xüsusi ehtiram və hörmət gördük. Qəzetiniz vasitəsilə bu səfəri təşkil etmiş və əziyyəti keçmiş bütün iranlı dostlarımıza minnətdarlıq bildirməyi özümə borc bilirəm. Görüşlərimiz bizə verilmiş proqrama tam uyğun olmasa da, normal səviyyədə hazırlanmışdı. İlk təqdim olunmuş proqramda prezident Ruhaninin təşkil edəcəyi qəbulda iştirak, deputatlar və Parlament rəsmiləri ilə görüşlər nəzərdə tutulsa da, səfər zamanı bir sıra korrektələrin şahidi olduq. Misal üçün, bayram tədbirləri ilə əlaqədar qəbulda deyil, mitinq zamanı dövlət lojasında prezident Ruhani başda olmaqla İran siyasi və dini rəhbərliyinin iştirakını izlədik. Parlamentdə İnsan haqları komissiyasının sədri ilə görüş nəzərdə tutulsa da, parlament sədrinin beynəlxalq məsələlər üzrə köməkçisi, yüksək diplomatik nəzakət qaydalarına sahib Hüseyn Amirabdullahiyanla görüşdük. Parlamentdə türkdilli deputatlarla görüş planlaşdırılsa da, görüşümüz İran qanunverici orqanında 50 deputat, o cümlədən Azərbaycan bölgələrindən olan millət vəkillərinin təmsil olunduğu fraksiyanın mənsub olduğu Motalefeh partiyasında rəhbərliklə görüşdük. İran Dövlət televiziyasının türkdilli proqramlarında canlı yayıma çıxdıq. 90-cı illərdə Qarabağ müharibəsində iştirak etmiş 2 iranlı türk əsilli generalla görüşümüz oldu. Məşhəd şəhərinə maraqlı ziyarətimiz oldu. Bu proqram dəyişiklərinin səbəbi İranda bayram tədbirləri ilə bağlı idi. İranlıların öz milli çıxarlarına münasibətinin canlı şahidi olduq. Xüsusən 11 fevral İnqilab günü münasibətilə sadə insanların küçələrdə izdihamına baxdıq. Son hadisələr fonunda iranlılar potensial rəqiblərinə etirazlarını göstərirdilər. Çox möhtəşəm və həsəd aparılası mənzərə idi. Ümumiləşdirərək onu deyə bilərəm ki, səfər haqda rəyim və təəssüratlarım çox müsbətdir.

- ADP sədrindən və sizdən başqa hansı partiya sədrlərinin dəvət olunduğu haqda məlumatınız var idi?

- Bu dəvət 2 partiyanın-ADP və VİP-in dəvəti idi. Məlumat aldıq ki, səfərdə olduğumuz zaman mətbuatda qeyri-dəqiq məlumatlar yayılmışdı. Bu bizim 2 partiyanın İrana rəsmi dəvəti idi.

- Azərbaycandakı seçkilər barədə hansısa formada fikir mübadiləsi oldumu?

- Seçkilər müzakirə olunmadı. Heç bir təmasda Azərbaycanın daxilindəki məsələlər müzakirə edilmədi

- Seçki öncəsi prezidentliyə namizəd Əli Əliyev İrana getməklə risk etmiş sayıla bilərmi? Bir də gördün sizə qarşı “İrana işləyir” kampaniyası aparıla biləcəyindən narahat deyilsiniz?

- Heç bir risk görmürəm bu səfərdə. Biz kimin nə deyəcəyi ilə hərəkət etmirik, düz bildiyimizi edirik. Dəvət olunmuşuq, sayılmışıq, getmişik. Hara dəvət alsaq, eyni münasibəti göstərəcəyik. Seçki gündəliyi dəyişdiyindən planlarımızı aça bilərəm. Qərargahımızın mənim namizəd olaraq 5 paytaxta nəzərdə tutulan planı var idi. 5-indən 3-ü qonşu dövlətlərin əsas şəhərləri-Ankara, Tehran, Moskva idi. Daha 2 şəhər Vaşinqton və Brüssel idi. Planlayırdıq ki, seçki təqviminin normal gedişində hər 5 paytaxtı ziyarət edək. Tehran baş tutdu. Görək seçkidə iştirak qərarımız olsa, daha hansı səfəri reallaşdıracayıq. Harasa işləməyə gəldikdə, biz fəaliyyətimizlə sübut etmişik ki, yalnız Azərbaycana və onun maraqlarına xidmət edirik. Belə fikirləri yalnız özləri casusluq edənlər söyləyə bilər. Çünki təhtəlşüurlarında kim olduqlarını bildiklərindən, başqalarını da eyni görməyə cəhd edirlər. Biz belələrindən çəkinmirik. Bu səfər haqda bir fikri də bildirmək istəyirəm. Hökümətimiz Azərbaycanda müxalifətin olmadığını bildirsə də, rəsmi dəvət almağımız qonşu dövlət tərəfindən bu fikrin yanlış olduğunun sübutudur. Bizim yalnız dəvət olunmağımız isə sübut edir ki, kifayət qədər potensiala və gücə malik ən çox azərbaycanlının yaşadığı və idarə olunmasında yaxından iştirak edən dövlət bizim partiya və siyasətçilər olaraq potensialımızı qəbul və etiraf edir. Buna yalnız sevinə bilərik.

İrana münasibətə gəldikdə isə onu deyə bilərəm ki, bu beynəlxalq vektora münasibət müxalifətimizin iqtidara uduzduğu mühüm istiqamətlərdən biridir. Mənim isə bu hakimiyyətə, yəni YAP-a uduzmaq fikrim yoxdur.

- Azərbaycan türkləri ilə təmaslarınız oldu? İrandakı prosesləri necə gördünüz?

- Təmaslarımız oldu. Rəsmi də söhbətlərimiz oldu. İran reallığı fərqlidir. Hər iş biz düşündüyümüz kimi deyil. Fərqli nüanslar var İran reallığında. Biz siyasətdə emosiyalarla deyil, real situasiya ilə hesablaşmalıyıq. Siyasət şer yazmaq deyil. Bu sənət daha soyuq yanaşma sevir. Bu yanaşma isə, Cənubda olanları düzgün təhlildən keçir. İran dünya siyasətində öz yeri və təsiri olan nəhəng dövlətdir. Orada ən yüksək vəzifədə-İranın Ali dini rəhbəri Xameneyi Azərbaycan türküdür. Bu faktı diqqətdən qaçırmamalıyıq. İran bizim tarixən bağlı olduğumuz ən yaxın siyasi coğrafiyadır. Unutmayaq ki, orada son minillikdən yaradılmış nəhəng imperiyalar bizlərin qurduğu siyasi quruluşlardır. Oranın əsas sülalələri və imperatorları türklər-soydaşlarımız olublar. Ona görə də İran İslam respublikası daha fərqli münasibət istəyir. Azərbaycanın dövlətçilik maraqları bunu tələb edir.

- Seçkidə namizədliyinizi verməklə bağlı son qərarınız nə vaxt olacaq?

- Özüm bir mənalı şəkildə seçkidə iştirakın tərəfdarıyam. Lakin prezident seçkiləri miqyaslı işdir. Burada yüzlərlə insan imza toplamalı, enerji məsrəf etməli, fəaliyyət göstərməlidir. 2013-cü ildə bu işi fəallarımız təkbaşına yüksək səviyyədə görə bildilər. Lakin həmişəki kimi yenə bizi haqsız olaraq kənarda saxladılar. Bizim opponentliyimiz onları narahat edir. Başqa izahat tapa bilmirəm onların davranışına. Ona görə də 11 fevral tarixində keçirilən Məclis toplantısında konsensus əldə edilməyib. İştirakçıların əhəmiyyətli hissəsi seçkiyə qatılmamaq mövqeyində olublar. Mən səfərdə olduğumdan prosesə qatılmamışdım, təsirə də cəhd göstərməmişdim. İstəyirdim ki, daxildə rəyi bilim. Çünki insanların fikri çox mühümdür. Sağ olsunlar, məni gözləməyə qərar veriblər. Fevralın 18-də iclas davam edəcək. Açığı əksəriyyətə təzyiq etməyəcəyəm. Belə şəraitdə, könülsüz fəaliyyət yalnız ziyan verə bilər. Ona görə də çalışacağam ki, əksəriyyət könüllü şəkildə münasibətini tam açıq şəkildə ortaya qoysun. Nə nəticə ərsəyə gələcək, həmin Məclis iclasından sonra biləcəyik.

Şənbə, 17 Fevral 2018 00:00

”Bibiheybət”də gəmi yandı

Yazan

16 fevralda “Bibiheybət” Gəmi Təmiri Zavodunun ərazisində yanğın olub.

Xeber.İnfo xəbər verir ki, “Azərbaycan Xəzər Dəniz Gəmiçiliyi” QSC-nin mətbuat katibi Mehman Mehdiyev “Qafqazinfo”ya açıqlamasında bildirib ki, yanan gəmi bu quruma məxsus deyil:

““Azərbaycan Xəzər Dəniz Gəmiçiliyi” QSC-yə aid hər hansı bir gəmi yanmayıb. Hadisə qeyd olunduğu kimi “Bibiheybət” Gəmi Təmiri Zavodunun ərazisində baş verməyib. Yanğının baş vermə sahəsinin də Gəmiçiliyin inzibati ərazisinə hər hansı bir aidiyyatı yoxdur”, – deyə M. Mehdiyev qeyd edib.

“Azərbaycanda doğulan hər körpə 2054 dollar və ya 3490 manat borcla dünyaya gəlir”.

Bunu iqtisadçı ekspert Qubad İbadoğlu yazıb. Maliyyə Nazirliyi xarici borcların həcmi ilə bağlı açıqladığı sson rəqəmləri şərh edən Q. İbadoğlu deyir ki, əgər həmin məlumata inansaq, 01 yanvar 2018-ci il tarixinə Azərbaycanın xarici dövlət borcu 9,398.3 milyon ABŞ dolları (15,978.1 milyon manat), xarici dövlət borcunun Ümumi Daxili Məhsula (ÜDM) olan nisbəti 22.8 faiz təşkil edib.

2017-ci ildə Azərbaycanın dövlət borcunun ÜDM-də payı 22,8 deyil, 48,8 faiz olub. 2017-ci il üçün hesablanmış ÜDM-in 70,135.1 milyon manat təşkil etdiyini nəzərə alanda, dövlət borcunun Maliyyə Nazirliyinin açıqladığı kimi 15,9 milyard manat deyil, 34,2 milyard manat və yaxud hazırkı məzənnə ilə 20,1 milyard dollar olduğu məlum olur. Belə olan halda Azərbaycanda doğulan hər körpə 2054 dollar və ya 3490 manat borcla dünyaya gəlir.

Şənbə, 17 Fevral 2018 00:00

Əziz Orucovla bağlı film - VİDEO

Yazan

Xeber.İnfo Kanal13 internet televiziyası Bakı bürosunun rəhbəri ziyasi məhbus Əziz Orucov barəsində çəkilən filmi təqdim edir:

Cümə, 16 Fevral 2018 00:00

İtanyanlardan təklif

Yazan

İtaliyalı memarlar Yanardağ kompleksinin restavrasiyası üzrə layihə hazırlayıb. 

Xeber.İnfo xəbər verir ki, bu barədə İtaliyanın Azərbaycandakı səfiri Auqusto Massari açıqlama verib.

İtaliya tərəfi layihəni təsdiqləsə də, son qərarı Azərbaycan hökuməti verəcək.

“Biz bu kompleksin vacib olduğunu bilirik. Bu, bizim əməkdaşlığın davam etdirilməsinə xidmət edəcək. Hesab edirəm ki, italiyalı sənətkarların işləri Azərbaycana daha çox turist cəlb etməyə kömək ola bilər”, – deyə A. Massari bildirib.

Xatırladaq ki, dekabrın sonlarında prezident İlham Əliyev dövlət tarix-mədəniyyət və təbiət qoruğu olan Yanardağa baş çəkib.

Xeber.İnfo 

Qasim Süleymani: “İsrail rejiminin bütün təməlini məhv etmək lazimdir”

“İsrail rejiminin dəlicəsinə həyata keçirdiyi əməliyyatların səbəbi onların dəhşətə düşməsidir”.
Xeber.
İnfo-nun NTV-yə istinadən verdiyi xəbərə görə, bu sözləri İran İnqilab Keçikçiləri Korpusunun Qüds qüvvələrinin komandanı Qasım Süleymani 10 il öncə sui-qəsd nəticəsində öldürülmüş "Hizbullah"ın yaradıcılarından biri - İmad Muğniyənin xatirəsinə həsr olunmuş mərasimdə deyib. "İmad Muğniyə və onun kimi İsrail tərəfindən öldürülənlərin qisasını bir raket atmaq və ya bir insanı öldürməklə almaq olmaz. Bəlkə də İsrail rejiminin bütün təməlini məhv etmək lazımdır", - deyə Q. Süleymani vurğulayıb.
Qeyd edək ki, İmad Muğniyə 2008-cı il fevralın 12-də İranın Suriyadakı səfirliyində islam inqilabının ildönümü ilə əlaqədar təşkil olunan tədbirdən qayıdarkən sui-qəsdə məruz qalıb. Onun avtomobili partladılıb. Hadisə nəticəsində Muğniyə və daha 2 nəfər ölüb. 

2 -dən səhifə 165