Əli Əliyev: “AXC-Müsavat iqtidarının aparıcı fiqurları ilə AMİP rəhbərlərinin qarşıdurmasının kökü xeyli əvvələ-1989-cu ilin sonlarına gedir...”

4 iyun qiyamının ildönümü günlərində vaxtilə AMİP-in lideri və funksioneri Əli Orucovla sabiq prezident Əbülfəz Elçibəyin yaxın silahdaşı olmuş Ülvi Həkimoğlu arasında qarşılıqlı ittihamlarla dolu söz atışması gedir. Tərəflər bir-birini haqsız çıxarmağa çalışır. 

AMİP-in keçmiş sədri, hazırda Vətəndaş və İnkişaf Partiyasının sədri olan Əli Əliyevin baş verənlərə münasibətini öyrəndik. VİP sədrinə “Sizcə, Elçibəy tərəfdarları, yoxsa Əli Orucov-E.Məmmədov cəbhəsi haqlıdır” və “Elçibəy iqtidarının 4 iyun qiyamından sonra siyasi müxalifətdən kömək gözləməsi normal sayıla bilərmi” sualları ilə müraciət etdik. 

Ə.Əliyev bu məsələyə münasibəti mübahisə aparan tərəflərdən hansının haqlı, hansının səhv olduğu kontekstindən bildirmək fikrindən uzaq olduğunu dedi. VİP sədri qeyd etdi ki, 4 iyun hadisələrinə onun öz qiyməti mövcuddur: “Həmin hadisələr zamanı AMİP üzvü olsam da, fəal siyasətdə deyildim. Elmi fəaliyyətlə məşğul olduğumdan, operativ fəaliyyətim yox idi. Lakin təbii ki, prosesləri izləmişəm, məlumat almağa çalışmışam. Fikrimcə, 4 iyun hadisələrinə 1993-cü il dövründən qiymət vermək doğru deyil. 4 iyunda baş verənləri məhz bu ilin içindən dəyərləndirmək əvvəldən təhrif olunmuş nəticələrə yuvarlanmaq deməkdir. Çünki AXC- Müsavat iqtidar komandasının aparıcı fiqurları ilə AMİP rəhbərlərinin qarşıdurmasının kökü xeyli əvvələ-1989-cu ilin sonlarına gedir. Hadisələri o dövrdən analiz etmədikcə, yanlış mənzərə yaranacaq. Xalq hərəkatının ”yol cızmaq" iqtidarında olan liderlərinin ideoloji fikir ayrılığı 1990-cı ilin yanvarında keçirilən AXC-nin 3-cü konfransında açıq şəkildə ortaya çıxdı. Konfransa qədərki dövrdə də “Tətil dalğa”sının təşkilində liderlər arasındakı fikir ayrılığı apogey səviyyədə idi. Adıçəkilən konfransda “Əvvəl milli istiqlaliyyət, sonra demokratiya” deyənlərlə “SSRİ çərçivəsində demokratiyadan milli istiqlaliyyətə” keçidi nəzərdə tutan mövqeli siyasilər arasında fikir toqquşması ortaya çıxdı. Hadisələrin sonrakı inkişafında 1-ci şüar tərəfdarlarının daha uzaqgörən və haqlı olduqlarını həyat təsdiq etdi. Buna baxmayaraq, 1992-ci ildə hakimiyyətə gələn komanda əsasən 2-ci mövqeyin tərəfdarlarından ibarət oldu. Bu azmış kimi, hərəkatın daxilindəki prinsipial “istiqlalçılar” hakimiyyətin içərisinə buraxılmadılar".

Ə.Əliyevin sözlərinə görə, ən səhv qərarın-Əbülfəz Elçibəyin 1992-ci ildə prezidentliyə namizəd olmasının səbəbi də hərəkat liderindən aşağıda duranların intriqaları idi: “Onların hamısı anlayırdı ki, Elçibəyi namizəd edə bilməsələr, hakimiyyətə onların ən ciddi opponenti gələcək. Hesab edirəm ki, bugünkü çətin vəziyyətimizin ən böyük səhv səbəbi də o zaman baş verdi. Ən yüksək instansiyada duran hərəkatın ideoloqu və rəhbərinin çirkli siyasi oyunlara cəlb edilməsi oldu. Onun bu qərarda rolunu azaltmamaqla, qeyd etmək istəyirəm ki, Elçibəyin prezident olması ilə hərəkatın arbitri sıradan çıxdı və bununla da qarşıdurmanın bünövrəsi rəsmi səviyyədə bərqərar oldu.Belə olduğu halda ana müxalifət funksiyasını daşıyan AMİP-in vəzifəsi nə idi? Təbii ki, hakimiyyətə gəlmək. Necə? İqtidara qarşı mübarizə aparmaqla. Burada qəribə və ya qeyri-adi nə var ki? Bu gün biz YAP-a qarşı mübarizə aparmırıqmı? Bu gün həmin təşkilatı başqa qüvvələrlə iş birliyində ittiham edənlər 2013-cü ildə AXCP və Müsavatın timsalında Kreml agenti İbrahimbəyovu dost tutmadılarmı, Putinin yaratdığı “milyarderlər klubu” ilə əlaqədə olmadılarmı? Hərçənd ki, AMİP açıq şəkildə kənar qüvvələrin heç biri ilə əlaqə qurmamışdı. Sadəcə olaraq, kənar dəstəyi olanlarla mövqeləri üst-üstə düşüb. Ölkədaxili proseslərdə kənar qüvvələrlə işbirliyinin ən qəti əleyhdarı olaraq deyə bilərəm ki, AMİP-i kənar dəstəkdə suçlayanlar 1992-ci ildə parlament iclasından açıq şəkildə deyirdilər ki, gəlişləri 9 ölkə ilə razılaşdırılıb. 1992 -ci ilin 15 may tarixində parlament hansı yolla götürülmüşdü? Özlərinə rəva bildiklərində başqalarını günahlandırmaq yanlış yoldur".

VİP sədri qeyd etdi ki, burada bir məsələdə hər iki tərəfin günahı aşkardır: “1993-cü ilin hakimiyyət böhranının aradan qaldırılmasında 3-lü bloka nail olunmalıydı-hakimiyyət-AMİP-Heydər Əliyev. Buna isə nail olunmadı. Yeri gəlmişkən, mərhum Heydər Əliyevin Bakıya dəvət edilməsində AMİP-in heç bir rəsmi mövqeyi olmayıb. Qarşılığında isə rəsmi səviyyədə iqtidar nümayəndələri onu paytaxta ard-arda dəvət edir, gəlməsi üçün nəqliyyat göndərmişdilər. 

Siyasətçilərimiz etirafı öyrənməyə qədər inkişaf edə bilməzlər. Səhvlərin aradan qaldırılması yolunda birinci addım etirafdır. Hansı nöqtədən baxırsan bax, əlindən hakimiyyəti təhvil verənlər, çevrilişə yol açanlar yanlışdırlar. Bu yolda başqasında günah axtarmaq, öz səhv və günahlarını gizlətməkdən başqa bir iş deyil". 

“125-lər” Siyasi Klubunun sədr müavini olmuş, hüquqşünas Günel Səfərova öz facebook səhifəsində 90 saylı Ağdaş seçki dairəsi üzrə Azərbaycan Respublikasının Milli Məclisinə keçiriləcək təkrar seçkilərdə dəstəklədiyi namizədi tərəfdarlarına bəyan edib.

Günel Səfərovanın statusunu təqdim edirik:

"Seçki hər bir ölkənin tarixində ciddi imtahandır. 18 iyun 2016-ci ildə 90 saylı Ağdaş seçki dairəsi üzrə Azərbaycan Respublikasının Milli Məclisinə təkrar seçkilər keçiriləcək.

Agdaş rayonu ilə sıx əlaqəmin olmasına, uzun müddət layihələr icra etməyimə və regiondan çoxlu dostlarımın, dəstək qrupumun, qohumlarımın olmasına rəğmən seçkilərdə iştirak etmədim. Baxmayaraq ki, bəzi qruplar cəmiyyətə və dostlara fərqli informasiyalar ötürməklə məşğuldur. Amma seçkidə iştirak etməməyimin səbəbi var. YAP tərəfindən namizəliyi irəli sürülən Cavid Osmanova seçkilərdə dəstək verirəm və bir gənc kimi onun təmsil etdiyi rayona daha çox töhvə verəcəyi qənaətindəyəm.

Agdaşda yaşayan qohumlarım, dostlarım, tələbələrim və tanıdığım insanların əksəriyyəti onun haqqında yalnız müsbət danışır. O rayonu daha yaxşı tanıyır, yerli sakinlərin problemlərinə bələddi. Əksəriyyət kimi mən də inanıram ki, Cavid Osmanov Ağdaş üçün daha çox iş görəcək. Seçkilərdə Cavid müəllimə uğurlar arzulayıram!"

Ermənistan Azərbaycan ərazilərini güc yolu ilə işğal edib.

Bunu Azərbaycan Prezidenti İlham Əliyev Berlində Almaniya Kansleri Angela Merkel ilə görüşdən sonra birgə mətbuat konfransında deyib.

İlham Əliyev bildirib: "Kimin təcavüzkar, kimin təcavüz qurbanı olduğunu görmək üçün regionun xəritəsinə baxmaq kifayətdir".

Prezident İlham Əliyev əlavə edib ki, Dağlıq Qarabağ Azərbaycanın tarixi ərazisidir.

Dövlət başçısı qeyd edib ki, Ermənistan Xocalıda hərbi cinayət, soyqırım törədib və hazırda Xocalı faciəsi 10 ölkə tərəfindən soyqırım kimi tanınıb. Prezident İlham Əliyev, həmçinin vurğulayıb ki, Xocalı soyqırımı zamanı 106-sı qadın, 63-ü uşaq olmaqla, 613 nəfər öldürülüb və bütün bunlar beynəlxalq ictimaiyyətin gözü qarşısında baş verib.

Prezident İlham Əliyev bildirib ki, Ermənistan təkcə Dağlıq Qarabağı deyil, həm də Azərbaycanın digər yeddi rayonunu işğal edib, Azərbaycanın tarixi abidələrini, məscidlərini dağıdıb. İşğalçı beynəlxalq vasitəçilərin münaqişəni sülh yolu ilə nizamlanması çağırışlarına məhəl qoymur.

Dövlət başçısının sözlərinə görə, sonsuz danışıqları uzatmaq üçün Ermənistan tərəfi, məsələn, aprelin əvvəlində olduğu kimi danışıqlar prosesini pozmaq məqsədilə bəzən təxribatlar törədir. Lakin bu dəfə Ermənistan tərəfi nəticələrlə bağlı yanıldı, Azərbaycan Ordusunun əks-hücumü nəticəsində Azərbaycan öz torpaqlarının bir hissəsini geri qaytara bildi.

Azərbaycan Prezidenti bildirib ki, Ermənistan hökuməti beynəlxalq hüquq normalarına riayət etməlidir, digər ölkələrin qanunsuz işğalı tamamilə qəbuledilməzdir. Dövlət başçısı, həmçinin qeyd edib ki, Ermənistan işğalı dayandırmağa başlamalıdır, bundan sonra bütün əlaqələr açılacaq, nəqliyyat əlaqəsi bərpa ediləcək, həmçinin istənilən hərbi ssenari ehtimalı aradan qalxacaq.

Prezident İlham Əliyev qeyd edib ki, Azərbaycan münaqişənin sülh yolu ilə həllinə sadiqdir: "Biz hərbi əməliyyatları dayandırdıq, çünki müharibə istəmirik, bizə sülh lazımdır. Azərbaycan ərazilərini geri qaytarmaq istəyir".

Ermənistan regionun autsayderinə çevrilir; Erməni XİN başçısının qəfil Tehran səfərinin sirri; Əliyev-Putin-Ruhani görüşünün Qarabağ məsələsində razılaşma ilə tarixə düşmə ehtimalı İrəvanı çevik addımlar atmağa sövq edir...

Xəbər verdiyimiz kimi,  Azərbaycan, Rusiya və İran prezidentlərinin bu ilin ikinci yarısında Bakıda üçtərəfli görüşünün olacağı barədə məlumatlar rəsmən təsdiqini tapıb. Üçtərəfli formatda və ən yüksək səviyyədə belə bir təmasın keçirilməsi, üstəlik, Bakıda keçirilməsi, sözsüz ki, mühüm əhəmiyyət daşıyır və Azərbaycanın bölgədəki artan nüfuzundan xəbər verir.

Məlumatlara görə, Bakı görüşündə ilk növbədə üçtərəfli iqtisadi əlaqələrin inkişafı, o sırada Şimal-Cənub dəhlizi (dəmir yolu) ilə bağlı layihənin reallaşmasının gedişi müzakirə olunacaq. Azərbaycanın Avropa, Rusiya və İran üçün iqtisadi-kommunikasiya əhəmiyyətini daha da gücləndirəcək bu layihə ilin sonunadək işə düşməlidir. 

Lakin şübhə yox ki, üç prezidentin görüşündə başqa ciddi regional, geosiyasi məsələlər, o cümlədən Dağlıq Qarabağ məsələsi diqqətdə olacaq. Bəzi siyasi müşahidəçilərə görə, Qarabağ düyününün açılması ilə bağlı prezidentlər İlham Əliyevlə Putin arasında Bakıda əhatəli müzakirələr olacaq və mümkündür ki, bu danışıqların gedişində həlledici qərarlar da verilsin, tarixi razılaşmalar əldə olunsun. 

*    *   *  

İstisna deyil ki, prezidentlərin Bakı zirvəsi həm də Qarabağ münaqişəsinin gərgin bir mərhələsinə, hətta hərbi əməliyyatların bərpa olunduğu dövrə təsadüf eləsin. İrəvanı ən çox narahat edən də odur ki, Bakı Qarabağla bağlı təbliğati müstəvidə də önə çıxa bilər. 

İş həm də ondadır ki, İran bölgədə Rusiyadan sonra Ermənistanın ikinci etibarlı tərəfdaşı sayılır. Amma son zamanlar İrəvanla Moskva arasında aprel olaylarına görə bir soyuqluq yaranıbsa, İran da beynəlxalq sanksiyalardan qurtulmasına rəğmən, Ermənistanla iqtisadi əməkdaşlığı genişləndirməyə can atmır. Daha çox Azərbaycan və Türkiyə ilə əlaqələri inkişaf etdirməyə maraq göstərir. 

Bu ilin əvvəlində Gürcüstanın Ermənistan vasitəsilə İran təbii qazını almaq planlarının fiasko olması da bunu əyani nümayiş etdirdi. Səbəb bir yandan, işğalçı ölkənin Rusiyadan güclü siyasi-hərbi və iqtisadi-energetik asılılığıdırsa, o biri yandan şübhəsiz ki, Ermənistanın İran üçün sanballı iqtisadi dəyər daşımaması, o cümlədən tranzit ölkə kimi önəm kəsb etməməsi və zəngin təbii resurslardan məhrum olmasıdır. 

Bakıda prezidentlərin üçlü zirvəsinin keçiriləcəyi haqda xəbər təsdiqlənəndən sonra xarici işlər naziri Edvard Nalbəndyanın tələsik Tehrana səfər etməsi və orada prezident Həsən Ruhani ilə görüşməsini ilk növbədə bu kontekstdə, son baş verənlər fonunda izah eləmək lazım gəlir. 

Ehtimal ki, Nalbəndyan üçlü Bakı görüşü ilə bağlı, bütövlükdə Azərbaycan-Rusiya-İran üçtərəfli formatının son zamanlar güclənməsindən ölkəsinin narahatlıq keçirməsi kontekstində İrəvanın bəzi gözləntilərini rəsmi Tehrana çatdırıb. Eyni zamanda İran-Ermənistan münasibətlərinin mümkün inkişaf perspektivlərini müzakirə edib.

Səfərlə bağlı erməni mənbələrinin yaydığı xəbərlər qənaətimizə - düşmən ölkənin təlaş keçirdiyinə şübhə yeri qoymur. Məsələn, lragir.am saytı bununla bağlı  yazıb: “Görüşdə prezident Həsən Ruhani sanksiyalardan sonra iki ölkə arasında əməkdaşlığı genişləndirməyin vacibliyini bəyan edib. Faktiki, İran təsdiq edir ki, ikitərəfli əməkdaşlığın genişlənməsi üçün nə Ermənistan tərəfdən, nə də İran tərəfdən səylər yoxdur. Fevralda prezident Serj Sərkisyan bir sıra xarici siyasət məsləhətləşmələrinə başlamışdı və həmin çərçivədə ilk görüş İranla iqtisadi əlaqələr məsələsinə həsr olunmuşdu. Əgər üstündən bir neçə ay keçəndən sonra prezident Ruhani deyirsə ki, bu addımlar kifayət deyil, demək, Sərkisyanın təşəbbüsü kağız üzərində qalıb və ikitərəfli əlaqələrin məzmununa hər hansı əlavələr edilməyib - Azərbaycan-İran əlaqələrindən fərqli olaraq, hansı ki, üstəlik, İran-Azərbaycan-Rusiya maraqlı bir formatında təşəkkül tapmaqdadır”.

*    *   *

Qeyd edək ki, İran prezidenti ilə görüşdə Nalbəndyan aprel döyüşlərindən də danışıb. Necə deyərlər, incə şəkildə Azərbaycandan İrana şikayət edib. Ruhani isə ölkəsinin Dağlıq Qarabağ məsələsinin müstəsna olaraq sülh yolu ilə həllinə tərəfdar olduğunu deyib. “İran bütün problemlərin sülh yolu ilə həll olunmasının tərəfdarıdır. Rəsmi Tehran Dağlıq Qarabağ münaqişəsinin də beynəlxalq hüququn prinsipləri əsasında sülh yolu ilə nizamlanmasını dəstəkləyir”, - deyə Ruhani bildirib.

Eyni fikri xarici işlər naziri Məhəmməd Zərif erməni həmkarının diqqətinə çatdırıb. Bundan əlavə, Həsən Ruhaninin yaxın zamanlarda İrəvana səfər etmək istəyi bəlli olub. 

Yəqin ki, belə bir səfər reallaşacaq. İstisna deyil ki, Ruhani hətta Bakıdan İrəvana getsin. Yaxud ayrıca bir tarixdə Ermənistan səfərini reallaşdırsın. Ancaq indidən aydındır ki, bu səfər Bakı görüşü qədər önəm və diqqət kəsb eləməyəcək. Ola-olsa, güclənən İran-Azərbaycan-Rusiya iqtisadi əməkdaşlıq formatı qarşısında işğalçı ölkənin təlaşını bir azca götürmək, gözdən pərdə asmaq niyyəti güdəcək. 

Sadə səbəbə, Azərbaycandan fərqli olaraq Ermənistan müstəqil dövlət statusunu itirib, regional məsələlərdə müstəqil söz sahibi deyil, Rusiyanın bir quberniyasıdır. Bunda isə İranın həqiqətən, heç bir günahı yoxdur. (musavat.com) 

İyunun 7-də Müdafiə, təhlükəsizlik və korrupsiya ilə mübarizə komitəsinin Elm və təhsil komitəsi ilə birgə keçirdikləri iclasda "Hərbi vəzifə və hərbi xidmət haqqında" Azərbaycan Respublikasının qanununda dəyişikliklər edilməsi barədə" məsələyə baxılıb

Qanun layihəsini Milli Məclis sədrinin birinci müavini, Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov təqdim edib.

I vitse-spiker deputatlara məlumat verib ki, hərbi xidmətə çağırışdan möhlət hüququ indiyədək ancaq bakalavriat pilləsində təhsil alanlara verilirdi.

Qanunun 21-ci maddəsinə edilən dəyişikliyə görə, bundan sonra həmin möhlət hüququ magistratura və doktorantura səviyyələrinə də şamil olunacaq. Həmçinin xarici ölkələrdə əyani təhsilalma formasında təhsil alanlara ali təhsil pilləsinin bakalavriat, magistratura və doktorantura səviyyələrində, tibb təhsili üçün ali baza tibb təhsili və rezidenturada (internaturada) təhsil alanlara müvafiq təhsilini bitirənədək çağırışdan möhlət hüququ veriləcək.

Sonra Elm və təhsil komitəsinin sədri İsa Həbibbəyli qanun layihəsinə dair fikirlərini bölüşüb. "Hərbi vəzifə və hərbi xidmət haqqında" qanunda bu mütərəqqi dəyişikliyə görə ölkənin elmi ictimaiyyəti və təhsil ictimaiyyəti adından Azərbaycan Prezidentinə minnətdarlıq bildirən komitə sədri qeyd edib ki, magistr və doktorantlara çağırışdan möhlət hüququnun verilməsi təhsilin fasiləsizliyini təmin edəcək, gənclərin elmə gəlişinə təkan verəcək.

Hər iki komitədən deputatlar rəylərini bildirdikdən sonra "Hərbi vəzifə və hərbi xidmət haqqında" Azərbaycan Respublikasının qanununda dəyişikliklər edilməsi barədə" qanun layihəsi Milli Məclisin plenar iclasına tövsiyə olunub.

Gündəlikdəki digər məsələlərin şərhi zamanı bildirilib ki, "Hərbi qulluqçuların statusu haqqında" qanuna edilən texniki xarakterli dəyişiklik vətəndaşların hüquq və mənafelərinin qorunması baxımından çox vacibdir. "Azərbaycan Respublikasının dövlət sərhədi haqqında" və "Sərhəd qoşunları haqqında" qanunlara təklif olunan dəyişikliklər isə qanunvericiliyin uyğunlaşdırılması məqsədini daşıyır.

Yekunda qərara alınıb ki, komitədə baxılan bütün məsələlər Milli Məclisin plenar iclasının müzakirəsinə təqdim olunsun.

Çərşənbə axşamı, 07 İyun 2016 00:00

Azərbaycanlı qadın Ermənistan tərəfə keçdi

Yazan

Bü gün Azərbaycan vətəndaşı olan qadın sərhədi pozaraq Ermənistana keçib. 

Bu barədə "NEWS.am" saytına Ermənistanın Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi qrupunun rəhbəri Armen Kaprielyan bildirib.

Armen Kaprielyan bildirib ki, Z. Vəliyeva ilə bağlı Beynəlxalq Qızıl Xaç Komitəsinin İrəvan nümayəndəliyinə məlumat verilib.

“İyunun 7-də Azərbaycan - Ermənistan sərhədinin Mehrab istiqamətində Azərbaycan vətəndaşı, Tovuz rayonunu Yanıxlı kənd sakini, 1977-ci il təvəllüdlü Vəliyeva Zöhrə Vardzor qızı Ermənistan tərəfə keçib”, - deyə o bildirib.

Hazırda Z.Vəliyeva barəsində əlavə məlumatların toplanması və onun erməni tərəfə hansı şəraitdə keçməsi ilə bağlı dəqiqləşdirilmələr aparılır. 

Çərşənbə axşamı, 07 İyun 2016 00:00

Şamaxıda qardaş qardaşı güllələdi

Yazan

Şamaxı rayonunda qardaş qardaşını odlu silahla qətlə yetirib

APA-nın xəbərinə görə, hadisə bu gün axşam saatlarında Şamaxı şəhərinin Hüseyn Ciddi küçəsindəki 74 saylı evdə qeydə alınıb. 

1971-ci il təvəllüdlü Rəşidzadə Azad Əli oğlu ailə münaqişəsi zəminində aralarında baş verən dava zamanı ov tüfəngi ilə qardaşı,1967-ci il təvəllüdlü Rəşidov Azər Əli oğlunu güllələyib. Ağır xəsarətlər alan iki uşaq atası Azər Rəşidov hadisə yerində dünyasını dəyişib.

Məlumata görə, uzun illərdir ki, Rusiyada yaşayan Azad Rəşidzadə bu günlərdə bacısı oğlunun toy mərasimində iştirak etmək üçün Şamaxıya gəlib və ev üstündə dava edərək qardaşını öldürüb. Hazırda rayonun hüquq-mühafizə orqanlarının əməkdaşları hadisə yerindədir. Hadisəni törədən Azad Rəşidzadənin tutularaq istintaqa cəlb edilməsi istiqamətində əməliyyat-axtarış tədbirləri davam etdirilir.

Faktla bağlı Şamaxı Rayon Prokurorluğu tərəfindən cinayət işi açılıb, araşdırma aparılır.

Çərşənbə axşamı, 07 İyun 2016 00:00

Əsədullayev-Çovdarov birliyinin gizli kadrı kimdir?

Yazan

“MTN çetesi”nin Ağdaşda seçki planı: Əsədullayev-Çovdarov birliyinin gizli kadrı kimdir?

Məlum olduğu kimi, iyunun 18-də 90 saylı Ağdaş seçki dairəsində Milli Məclisə təkrar seçkilər keçiriləcək

Artıq seçki təbliğatı start götürüb. 

İlkin müşahidələr əsas mübarizənin Ümüd partiyasının sədri İqbal Ağazadə və Ağdaş rayon icra hakimiyyətinin başçısınin birinci müavini Cavid Osmanov arasında gedir.

Çingiz Əsədullayevin Ağdaş mandatını nəzarətdə saxlamaq planı

Bildirək ki, sözügedən dairə ötən il noyabrın 1-də keçirilən seçkilərdən qalmaqalla yadda qalmışdı. Bu da həmin dairədən deputat olmuş Çingiz Əsədullayevə bağlı idi. Belə ki, məlum “MTN işi”ndə adı hallanan, daha sonra isə bir çox maliyyə maxinasiyalarında imzası olduğu Ç.Əsədullayevin “qələmi qırıldı” və Mərkəsi Seçki Komissiyası DSK-nın Əsədullayevin qələbəsi haqda qərarını ləğv etdi. İndi isə cumhuriyyet.az-a daxil olan məlumatlar Çingiz Əsədullayevin sözügedən dairənin dgər vasitələrlə nəzarətdə saxlamaq planları üzə çıxıb. Belə ki, 90 saylı Ağdaş seçki dairəsindən hakim partiyanın namizədi kimi seçkiyə qatılmış Cavid Osmanovun sabiq “Mahmudovçu deputat”la uzun keçmişə dayanan geniş əlaqələri varmış.

Cavid Osmanov Çingiz Əsədullayevin adamı imiş?

Etibarlı mənbəən cumhuriyyet.az-a daxil olan məlumata görə C.Osmanov 2005-ci il parlament seçkilərində Ç.Əsədullayevin seçki qərərgahının sədr müavini olub. Bu seçki prosesindəki xidmətləri bankir deputatla Osmanovu yaxınlaşdırıb və xidmətlərin qarşılığı olaraq icra nümayəndəsi təyin edilib. Bunun ardınca isə yenə də Ç.Əsədullayevin dəstəyi ilə Osmanov icra başçısının müavini postunu ələ keçirib. Əsədullyevin himayəsi altında Osmanov daha sonra YAP Ağdaş rayon təşkilatının sədri postunu da ələ keçirir.  Amma Əsədullayev-Osmanov  birliyi bununla yekunlaşmır. Bu gün əslində “bankir deputat”ın gizli fiquru kimi seçkiyə qatılan YAP sədinin əlaqələri bir az da dərinə gedir.

YAP-ın Ağdaşda deputatlığa namizədi Akif Çovdarova da çıxa bilib

90 saylı Ağdaş seçki dairəsindən YAP-ın namizədi kimi seçkiyə qatılmış Cavid Osmanovun keçmişi ilə bağlı qalmaqallı olaylar bununla yekunlaşmır. Bir neçə il bundan əvvəl baş vermiş bir hadisə ilə bağlı cumhuriyyet.az-a daxil olan məlumatda ilginc məqamlar yer alıb. Mənbənin bildirdiyinə görə xarakteri ilə tutduğu mühüm postlar arasında ziddiyyətlər olan Osmanov 2013-cü ildə Mingəçevir şəhərində qumar məclisində hüquq-mühafizə orqanları tərəfindən saxlanılıb. İki gün nəzarətdə saxlanılan C.Osmanov məhz Ç.Əsədullayevin köməkliyi ilə azadlığa çıxa bilib. Bundan sonra yaanan qalmaqalın Ağdaş rayon icra hakimiyyətində şöbə müdiri postunda olan Əsgərxan Həsənov tərəfindən təşkil olunduğunu öyrənən Osmanov bunun cəzasını vermək qərarına gəlir. Mənbənin sözlərinə görə, Ə.Həsənov bu olayydan sonra MTN-nin generalı Akif Çovdarov tərəfindən bəlli üsulla oğurlanır və iddiaya görə 3 gün Masazırdakı məlum məkanda saxlanılan şöbə müdiri külli miqdarda ödənişlə azad olunur.

İnzibati resurslar qalmaqall namizədə qarşı

Maraqlıdır ki, belə bir keçmişə malik şəxs hazırda YAP tərəfindən dəstəklənib və rayon icra hakimiyyətinin inzibati resursları onun seçki kompaniyasına cəlb olunub. Hətta keçmiş düşmənçilik unudulaaq Ə.Həsənov da müavinin aktiv yardımçılarına çevrilib. Prosesin gerçək mahiyyəti isə ortadadır. Əsədullayev və “MTN çetesi” 90 saylı Ağdaş seçki dairəsini dolayısı ilə əldə saxlamaq planı qurub.

Mövzunu davam etdirəcəyik. Qarşı tərəfin də fikirlərini dərc etməyə hazırıq.(AzMedia.info)

Şirzad Babayev: “Mövcud vəziyyət göstərir ki, Azərbaycanın müdafiə sistemi və beynəlxalq siyasəti yalnış qurulub

Xeber.İnfo-nun suallarını ictimai-siyasi fəal Şirzad Babayev cavablandırır.

-                     Orduda nə baş verir? Əsgər ölümlərinin səbəbi nədir?

-                     Müdafiə Nazirliyi ictimaiyyətə məqsədli şəklidə mövcud situasiya ilə bağlı ətraflı məlumat vermir. Belə başa düşürəm ki, bu cəmiyyətdə ajiotaj yaratmamaqla bağlıdır. Lakin biz özümüzün haqlı, düşmənin haqsız olduğunu göstərmək istəyiriksə ermənilərin atəşkəsə əməl etmədiklərini və əsgərlərimizin həyatına son qoymasını yerli və beynəlxalq ictimaiyyətə açıqlamalıyıq. Bu durumda biz mətbuat orqanlarından, ayrı-ayrı bölgələrdə olan şəxslərdən, hərbi hissələrdən baş verənlərin nədən ibarət olduğunu öyrənməyə çalışırıq. Eyni zamanda ekspert rəyləri və çıxışları da bu işimizə kömək edir. Bu cür araşdırmalar nəticəsində müəyyən olunmuşdur ki, bu il, yəni 2015-ci ilin ilk iki ayı ərzində 15 nəfər hərbi qulluqçu dünyasını dəyişmişdir. Bu deyilənlər məhz bizdə kimlikləri məlum olan və yuxarıda qeyd etdiyimiz vasitələrlə öyrəndiyimiz faktlardır. Ola bilər ki, bir neçə ölən və yaralanan var ki, biz onları öyrənə bilməmişik.

 

-                     Şirzadbəy, məncə bu kifayət qədər ciddi rəqəmdir. 15 nəfər doğrudanmı hərbi xidmət zamanı bu və ya digər səbəbdən dünyasını dəyişib?

-                     Təəssüf ki, bu rəqəm doğrudur. 2015-ci ilin yanvar-fevral aylarında 15 nəfər hərbçimizi itirmişik, eyni zamanda 6 nəfər də yaralanıb və ya xəsarət alıb. Bilirsiniz, biz araşdırma aparan zaman bu hadisələrin başvermə səbəblərini də öyrənirik. Belə ki, rəhmətə getmiş 15 nəfərdən 9-u məhz düşmən gülləsinə tuş gəlib, 2 nəfər qeyri-nizam hərəkətdən, 1 nəfər xəstəlikdən, 1 nəfər də silahla ehtiyatsız davranmadan dünyasını dəyişmişdir. Bunula yanaşı 1 nəfər mina partlayışına düçar olmuş, 1 nəfər isə intihar etmişdir. Yaralananlardan da 3 nəfəri qarşı tərəfdən vurulmuşlar.  Sualınız da səsləndirdiyiniz o ciddi rəqəm ifadəsinə gəlincə deyə bilərəm ki, bəli, bu çox ciddi və muqayisə baxımından ağır rəqəmdir. Müqayisə üçün deyək ki, 2005-2014-cü illər, yəni əvvəlki on ilin eyni müddətində heç vaxt bu qədər itki olmayıb. Paralel olaraq ötən 2014-cü il ərzində cəmi 29 nəfər hərbi qulluqçu dünyasını dəyişmişdir. Fərqə özünüz diqqət yetirin.

-                     Baş verənlər əsasən hansı struktura daha çox aiddir?

-                     Baş verənlərin hamısı Müdafiə Nazirliyinin tabeçiliyində olan hərbi hissələrin qulluqçu və əsgərləridir. Gördüyünüz kimi burada intihar, silahla ehtiyatsız davranma, qeyri-nizami hərəkət və s. səbəblər də vardır. Bu isə hərbi hissələrdə vəziyyətin o dərəcədə də yaxşı olmadığından xəbər verir. Təsəvvür edirsinizmi ki, hərbu hissə qapalı struktur olduğundan bir çox məsələlərin ictimaiyyətə açıqlanması qeyri-mümkündür.

-                     Vəziyyəti dəyişmək üçün nələr etmək lazımdır?

-                     Müdafiə Nazirliyi təcili təxirəsalınmaz tədbirlər görməlidir. Burada hərbi hissələrdə olan kadr məsələsi, sosial-rifah və psixoloji durumla bağlı məsələyə xüsusi diqqət yetirilməlidir. Nizamsız hərəkət və ya silahla ehtiyatsız davranmadan əsgər ölürsə bu qeyri-peşəkarlığın nəticəsidir.  Atəşkəs zamanı 9 nəfərin iki ayda ermənilər tərəfindən öldürülməsi isə müdafiə tədbirlərinin lazımi formada olmamasını göstərir.  Ümumiyyətlə, Azərbaycan ordusu bütün mənlarda uğursuzluqlardan ibarətdir.  20-ildən artıqdır ki, bir metr torpaq belə işğaldan azad olmur.  Atəşkəs dövründə ölənlərin sayı müharibə dövründəkindən dəfələrlə çoxdur.  Mövcud vəziyyət göstərir ki, Azərbaycan müdafiə sistemi və beynəlxalq siyasəti yalnış qurulub. Sabah döyüşə daha yaxşı vəziyyətdə başlamağımız üçün bu hallara da diqqət etməyimiz zəruridir. Azərbaycan ordusunda vəziyyəti yaxşılaşdırmaq və prosesslərdə şəffalığın təmin olunması üçün ictimai nəzarət lazımdır.

Xeber.İnfo,

Mövlud Abdulov

Çərşənbə axşamı, 07 İyun 2016 00:00

"Almaniya Türkiyədən üzr istəyəcək"

Yazan

Hakim Yeni Azərbaycan Partiyası (YAP) İcra Katibliyi Siyasi Təhlil və Proqnozlaşdırma şöbəsinin müdiri, Milli Məclisin deputatı, Müdafiə, Təhlükəsizlik və Korrupsiya ilə mübarizə Komitəsinin sədr müavini,  Aydın Mirzəzadə 2 iyunda Almaniya Bundestaqında Osmanlı İmperiyasında 1915-ci il hadisələrini "erməni soyqırımı" kimi tanıyan qətnamənin müəllifi və fəal dəstəkçisi, milliyətcə türk olan Cem Özdemirə alman dilində müraciət ünvanlayıb.

"Report"un məlumatına görə, müraciətdə deyilir: "Sizin təşəbbüsünzlə Almaniya palamentində Osmanlı İmperiyasında 1915-ci il hadisələrini soyqırım kimi nəzərdə tutan qanunun qəbul edilməsi sivil dünyada, o cümədlən türkdilli azərbaycan xalqında böyük təəccüb və təəssüf doğurdu.

Azərbaycan Türkiyə ilə qardaş ölkə, strateji müttəfiqdir və ona görə də onunla və istənilən türkdilli dövlətlə baş verənlərə həssaslıqla yanaşır. Eyni zamanda Azərbaycan torpaqlarının 20 faizi Ermənistan tərəfindən 1991-1994-cü illərdə işğal edilmiş, əhalimizin bir milyon nəfərindən çoxu Ermənistan qoşunları tərəfindən öz torpaqlarından çıxarılmış və məcburi köçkünə çevirlmişdir.

Ermənistan Silahli Qüvvələri tərəfindən 26 fevral 1992-ci ildə Xocalı şəhərində genosid törətmiş, bir gecədə 63-ü uşaq, 106-sı qadın, 70-i qoca və qarı olmaqla – 613 nəfər Xocalı sakini qətlə yetirildi, 8 ailə tamamilə məhv edildi, 25 uşaq hər iki valideynini, 130 uşaq valideynlərindən birini itirdi. Düşmən gülləsinə tuş gəlib yaralanan 487 nəfərdən 76-sı uşaq idi. 1275 xocalılı əsir, 150 xocalılı itkin düşdü.

BMT Təhlükəsizlik Şurasının 1992-1993-cü illərdə 822, 853, 874 və 884 saylı qətnamələrində Ermənistanın Azərbaycana qarşı təcavüzü pislənilmiş və ondan öz silahlı qüvvələrini Azərbaycan ərazisindən çıxartmq tələb edilmişdir. Qətnamələr indiyə qədər yerinə yetirilməmişdir".

A.Mirzəzadə müraciətdə bildirib ki, Cem Özdəmir  Ermənistan tərəfindən törədilən Xocalı faciəsi məsələsinə, Türkiyənin düçar olduğu terror hadisələrinə indiyədək münasibət bildirməyib: "Bütün dünyanın reaksiya verdiyi Azərbaycan torpaqlarının bir hissəsinin Ermənistan tərindən işğal edilməsi və bir mliyon azərbaycanlının məcburi köçkün düşməsi məsələsinə, nə Ermənistan tərəfindən törədilən Xocalı faciəsi məsələsinə, nə də Türkiyənin düçar olduğu terror hadisələrinə siz indiyədək münasibət bildirməmisiniz.

Siz uydurma "erməni soyqırımı” məsələsinin yalan və Türkiyəyə qarşı bir təzyiq vasitəsi olduğunu bir türk və Türkiyədə böyümüş bir insan kmi bilməli idiniz. Heç olmasa bu layihəni hazırlayarkən həmin dövr üzrə ixtisaslaşan dünya tarixçiləri ilə məsləhətləşə bilərdiniz. 

Siz bilməli idiniz ki, Tükiyə dəfələrlə Ermənistana birgə komissiya yaradaraq 1915-ci il hadisələrinə birdəfəlik aydınlıq gətirmək üçün arxivlərdə işlmək təklifi etsə də, təklif Ermənistan tərəfindən rədd edilmişdir. Çünki, erməni millətçilərinin soyqırım iddiası heç bir arxiv materialları ilə təsdiqlənmir və bu dəfələrlə ciddi elmi və siyasi dairələr tərəfindən səsləndirilib. Elə siz özünüz də 15 il əvvəl yazdığınız məqalənizdə Fransada soyqırımın tanınmasını tənqid edərək, "1915 və ondan əvvəl 1895-ci ildə baş verən hadisələrin ələ alınma yeri nə Vaşinqton, nə də Paris və Berlindir" deyə vurğulamışdınız.

Son dövrlər Türkiyə ilə Almaniya arasında münasibətlər heç də xoş günlərini yaşamırdı. Bu situasiyadan erməni milllətçi dairələri və antitürk mərkəzləri uğurla istifadə etdilər və heç bir tarixi fakta söykənməyən qərar münasibətlərin gərgin olduğu bir zamanda emosiyalar üzərində qəbul edildi. Ağrıdıcıdır ki, bu səlib yürüşünün önündə siz və türk millitindən olan daha 10 bundestaq deputatı getdiniz. Yeganə həqiqət müdafiçəsisi isə türk dünyası ilə heç bir bağlılığı olmayan xristian-demokrat Bettina Kudla oldu. Bu məqamda Türkiyə və türk dünyası siz 11 türk deputatından ədalət və müdafiə gösləyirdi. Amma ona ən ağır zərbəni isə elə sizlər, öz oğul və qızları vurdular.

Almaniya qüdrətli dövlət, alman xalqı müdrik xalqdır. Nə zamansa Almaniya bu məsələyə yenidən qayıdacaq və 2 iyunda buraxdığı səhvi düzəldərək Türkiyədən üzr istəyəcək. Ancaq sizlərin üzrü isə qəbul edilməyəcək, çünkü anaya xəyanət edən oğullar bağışlanmır".

137 -dən səhifə 182