Çərşənbə axşamı, 14 Mart 2017 00:00

Hacı Zeynalabdin Tağıyevin qəbrinə məktub

Yazan

Eşitmişəm ki, Sovet dövründə Leninin qəbrinə məktub yazmaq dəbdə imiş. Məmur özbaşınalığına tuş gələn vətəndaş Leninin qəbrinə şikayət yazırmış. İnsafən, Lenin də dərhal cavab verirmiş. Qudruğu dövlətin ən ucqarda yaşayan vətəndaşını belə cavabsız qoymur, problemlərinin həlli üçün əlindən gələni edirmiş.

Bu günlərdə də Ağdam rayonunun bir kəndində tarix müəllimi işləyən, Qarabağ uğrundan gedən savaşlarda iştirak etmiş İntiqam Əsədov xeyriyyəçi Hacı Zeynalabidin Tağıyevin qəbrinə məktub yazaraq, mərhumdan bir xahişdə bulunub. Tarix müəlliminin məhrum Hacıya ünvanladığı məktubu dərc edirik:  

"....Axşamın xeyir, ay Hacı. Əvvəl-əvvəl hamınızın ruhuna bir "Salavat" xətm eləyir və Sizə Allahdan rəhmət diləyirəm. Sual eliyə bilərsən ki, xeyirdimi gecənin bu vaxtı məni yad eləməkdə? Amma, səni biz tarix müəllimləri həmişə - V sinifdən XI sinifə kimi yad edirik. Bakıya çəkdirdiyin Şollar suyu, açdırdığın kişi və qadın gimnaziyaları, ticarət gəmiçiliyi, Muğanda tikdirdiyin toxuculuq fabriki, pulunla oxutdurduğun azərbaycanlı uşaqlar, neft buruqları, hətta Cənubi Azərbaycandakı Səttar xan hərəkatına dəstəyin, Pakistanda xəstələrə pul yardımın, İmama Hüseynin türbəsinə bağışladığın çilçıraq, hamısı tərəfimizdən yad edilir və ehtiramla xatırlanır. Şəxsən müraciət etməkdə məqsədim odur ki, iki il 6 aya dizlərim üstündə Azərbaycan tarixində özünəməxsus yeri olan Qacarlar sülaləsinin davamçısı məşhur Ağa Məhəmməd şah Qacara həsr olunan "Ağa Məhəmməd şah Qacar" kitabını fars dilindən tərcümə etmişəm. Ancaq çap etdirməyə maddi imkanım çatmır. Kitab tarixi məlumatlarla zəngindir ki, bizim tarix kitablarında bunlar yoxdur. Səndən iltimasım odur ki, imkan olsa bizim bəzi tanıdığın və sözünü eşidən varlıların yuxusuna gir və büründüyün ağ kəfəni onlara göstər ki, mən də bura 12 metr ağdan başqa bir şey gətirmədim. Amma bütün ölkə xeyriyyəçiliyimə görə mənə rəhmət oxuyur. Və mən həmin rəhmətlərin örtüyündə cəhənnəm alovunun tutmadığı cənnət məkandayam. Siz də o biçarə müəllimin kitabının çapına kömək edin, qoy millətimiz savadlansın, öz tarixi barədə məlumatlansın. Bəlkə hansısa sözünü eşitdi. Hamısı kafir deyil ha. Ayrı heç bir təvəqqəm yoxdur. Özündən muğayat ol. Ölüsü çox dirilərdən dəyərli insan. Allah sizə rəhmət eləsin!"

Xeber.İnfo

Bazar ertəsi, 13 Mart 2017 00:00

Tanınmış iqtisadçı vəfat etdi

Yazan

Azərbaycan Respublikası Nazirlər Kabinetinin Maliyyə-kredit şöbəsinin sabiq müdiri, iqtisadiyyat nazirinin keçmiş müavini, iqtisadçı-ekspert Oqtay Haqverdiyev martın 12-də 81 yaşında vəfat edib.

Allah rəhmət eləsin.

Bəziləri onu fitri istedad hesab edir, bəziləri isə deyir, Zirəddin qara magiya ilə məşğuldur

Dosye: Zirəddin Telman oğlu Rzayev

Doğum tarixi: 11 (yaxud 10) noyabr 1981

Doğum yeri: Şəmkir, Azərbaycan

Peşəsi: Ekstrasens. “Ekstrasenslərin döyüşü” tök-şousunun finalisti ( 6-cı sezon, 2008-ci il)

ÜNVANI-MOSKVA, “LİNİYA JİZNİ” ŞƏFA MƏRKƏZİ

Qiyməti: Saatı 1000 dollar ( 50 MİN RUBL).

Hobbisi-ixtisasca Kinoloqdur. Moskvadakı şəxsi it damında Türkiyədən gətirilmiş “Qanqal” cins köpəklərini yetişdirib, küçüklərin birini 10 min dollardan satır.

Evlidi, 3 uşaq atasıdır.

Xidmətləri, Rusiya təhlükəsizlik qurumlarının iki medalıyla mükafatlandırılıb.

Ekstrasensliyə iddialı şəxslər, hamı kimi təkcə gözləri ilə deyil, eyni halda öz kürəkləri ilə də görməyi bacarmalıdırlar. Heyvanlar, həşəratlar arasında bu nadir istedada cırcıramalar malikdi, insan dünyasında isə...

İnsan dünyasında isə, eşidin-bilin, xüsusi kəramət sahibləri. Müasir dillə desək, “ekstrasens”lər. Bu cür “kürəyi ilə görən”lərin kiçik siyahısında adətən bircə nəfərin adı həmişə xüsusi olaraq qabardılır. Altından qırmızı xətt çəkilir. “Həmin müəmmalı şəxs kimdi?” sualına, bəribaşdan bilirəm, hamı bir ağızdan eyni anda eyni cavabı verəcək - həmyerlimiz, xalq loğmanı, Şəmkir doğumlu, Moskva qeydiyyatlı Rzayev Zirəddin Telman oğlu!

***

2008-ci ilin baharı, Moskva şəhəri. “TNT” telekanalında yayımlanan “Ekstrasenslərin döyüşü” tok-şousu neçə vaxtı paytaxt sakinlərinin yuxusuna haram qatır, yazıqları qoymur rahat yatmağa. Şou iştirakçılarının biri - sakit təbiətli, mülayim baxışlı Zirəddin Razayev diqqət mərkəzindədir. Yarışın 3-cü mərhələsindən sonra o, ildırım sürəti ilə irəli sıçrayıb digərlərini xeyli geridə buraxır. 4-cü seriyada sübut edir ki, Yaroslavl şəhərindəki dörd yeniyetmənin qətli yerli satanistlərin əməlidir. 11-ci seriyada, kürəyi ekrana tərəf otuzdurulan Zirəddin Rzayev, yenə də digərlərini bütün şanslardan məhrum edir.

Ekrandakı səhnələri bitdə-bitdə, kadr-kadr görməyi bacarır. Yarış iştirakçıları - Yelena Smelova, Yekaterina Əhmədcanova, Liliya Bull, Vlad Kadoni, Aleksandr Ozeryanski, Nikolay Çumak, Lana Sinyavskaya, Asiyat Şabanova rəqabətə dözməyərək tezliklə müsabiqəni tərk edirlər. Səhnədə qalır ikicə yenilməz qəhrəman - azərbaycanlı Zirəddin Rzayevlə rusiyalı hərbi həkim Aleksandr Litvin.

Açıq səsvermə prosesi öz dramatizmi ilə yadda qalır. Tərəzinin bir gözü gah həmyerlimizə tərəf əyilir, gah o biri tərəfə. Son nəticədə səsvermə, Aleksandr Litvinə 31 min səs bəxş edir, Zirəddinə 17 min.

***

Ancaq bu müsabiqə təkcə öz finalistləri ilə deyil, bəzi digər müəmmaları ilə, pərdəarxası sirlərilə də məşhurdu mütəxəssislər arasında. Yarış zamanı Zirəddinin rəqibi Aleksandr Litvinov çox faciəli anlar yaşayıb - öz arvadını itirib. Normal təcrübəli ekstrasens bunu, uca göylərin əmri, yaxud... yaxud cəzası bilib qələbə iddialarından elə yarış əsnasında birdəfəlik əl çəkərdi. 

Bəli...burası adi məntiq dünyası deyil. Müəmma dolu mistik məkandı. Görünür, qələbə simvolu - “Büllür əl” heykəlini qazanmaq xoşbəxtliyi, bir bədbəxtçilik faktı ilə də müşayiət olunur burda.

Xüsusən, əgər sən bu qələbəni haqsız qazanıbsansa.

***

XÜSUSİ QEYD: Zirəddin Rzayevin bircə zəif cəhəti var - itləri, köpəkləri gördümü, vəssalam, anında mum kimi əriyəcək. Girişəcək bu itin tüklərini tumarlayıb, sığallamağa. Kürəyi ilə görmək istedadını da bəlkə məhz it tayfasından öyrənib o.

Deyərdim bu uşaqlıq hissiyyatını Zirəddin günün kommersiya qanunlarına uyğunlaşdırmağı da bacarıb. Türkiyənin məşhur Aksaray köpəklərini min cür əzab-əziyyətdən sonra Rusiyaya gətirməyi bacarıb.

Moskva ətrafında böyük bir ərazini hasarlayaraq oradakı it damını çöndərib bu cins itlərin bir növ damazlıq mərkəzinə. Burdakı Aslan, Toni, Xırsız, Onur, Sultan kimi törədici erkəklər Moni, Dilbər, Binnas kimi qancıqlarla vaxtaşırı cütləşdirilərək yaxşı nəsil artımı nümayiş etdirir, vallah. Küçükləri 10 min dollardan aşağı satılmır. Bəzən dəfələrlə baha qiymətə satılır hətta.

Türkiyə dövləti bu cins köpəklərin xaricə satışını çoxdan yasaqlasa da, Zirəddinə göz yumub nədənsə. İcazə verib Rusiyada bu nadir köpəklərin nəslini artırsın.

“Təsadüfmü bu? Qanunauyğunluqmu? Yoxsa bir şıltaqlıq?” sualına belə cavab verərdim indi mən. Qədim sufilər ağ, yaxud qara dərviş olmaqla iki qismə bölünərdi adətən. Ağlar, göyərçin bəslərdi, qaralar nəhəng qara köpəkləri. Zirəddin, görünür qara dərviş, müasir dillə desək qara maqdı. İtlərə sevgisi də bax, bu gizli cəhətindən qaynaqlanır. Gücünü, enerji qaynağını da məhz bu dörd ayaqlı dostlarından - Aksaray cinsli nəhəng köpəklərdən alıb qidalanır o. Xüsusən “Binnas” adlı nəhəng qara köpəkdən bəzən günlərlə əlini ayırmır.

Həmin it damında küçüklər deyilənə görə 40 gün qatı zülmət içində saxlanılır. Bu da mənə bilirsinizmi nəyi xatırladır, hə? Dərvişlərimizin 40 gün çiləxanada oturmağını!

Zirəddində, ola bilsin, bu hər iki təcrübə birləşib. Kəramətini də o, qədim sufilər kimi, deyəsən, vaxtilə zülmətxanalarda qazanıb özünə.

***

Rəsmi Ankara “Aksaray köpəkləri” məsələsində hədsiz qısqancdı. Bir köpəkoğluna indiyədək icazə verməyib bu it xılını Türkiyədən kənara çıxartsın. Zirəddin bu oyunda istisnadır. Əlində rəsmi lisenziyası var. “Kim verib ona bu ixtiyarı, kimdi onun Türkiyədəki havadarı?” sualının cavabını Zirəddinin son öncəgörmələrində axtarın. Orda deyilir: “Ərdoğan, bütün səylərinə rəğmən, Fətullah Güləni həbs edə bilməyəcək. Fətullah, qəfil keçirdiyi infarkt nəticəsində öz əcəli ilə öləcək. Hiss edirəm onun qan-damar dövriyyəsində ciddi problemlər mövcuddu”.

***

Zirəddinin bu itbazlığı sadaladığımız çox saylı faktlarla məhdudlaşmır. Hər gün özünə yeni-yeni məzmun qazanır Rusiyada. 

Bu ölkə son vaxtlar yeni təhlükəylə üzləşib. Adına “doqhanter” deyilən əli silahlı şəxslər şəhər küçələrindəki kimsəsiz itlərin kütləvi ovuna başlayıblar. Qəfil, turp kimi yerdən pıtlayıb çıxır, gördükləri itləri amansızcasına, fərq qoymadan ucdantutma qırırlar. Bir nəfər də onlara irad tuta bilmir, “gözünüz üstə qaşınız var” demir.

“Doqhanterlər” bir Amerika brendidir. İrqçiləri, hər cür sado-mazaxistləri, aşırı millətçiləri, müxtəlif psixopatları öz sıralarında birləşdirən bu hərəkat Rusiyaya Ukraynadan gəlib sızıb. Kiyevdəki son narıncı inqilabın, meydan hadisələrinin fəal iştirakçısı kimi tanınan “doqhanter”lər Rusiyada elə ilk günlərdən ciddi müqavimətlə qarşılaşıblar.

Həmin bədnam doqhanterlərin Rusiyadakı ən ciddi əleyhdarı indi bax bu bizim Zirəddin Rzayevdi. Müsahibələrinin birində o, bu hərəkatla İŞİD arasında ciddi paralellər aparıb. İddia edib, bəs bu hər iki hərəkatın sponsorları, mənşəyi eynidir. Hardan götürüb o bu müqayisəni, niyə bunu Rusiya mətbuatında ilk dəfə səsləndirib? Həəə, bax bu çox dolaşıq düyünü açsaq, kələfin bir ucu bizi götürüb gətirəcək Rusiya Federal Təhlükəsizlik Xidmətinin Lyubankadakı məlum ünvanına.

Orda başımızı əyib qulağımıza pıçıldayacaqlar ki, bəs “doqhanter projesi” əslində bir təxribat layihəsidir. Məqsədi nədi? Heç nə, cəmiyyətdəki sado-mazaxist, irqçi, aşırı millətçiləri bir araya toplayıb təşkilatlandırmaq. Sonra silahlandırıb şəhər küçələrinə salmaq. Əvvəlcə ilk təcrübəni kimsəsiz itlər üzərində sınaqdan çıxarmaq. Sonra isə...

Sonra isə bütün bu tör-töküntünü, Kiyevdəki kimi, meydanlara çıxarıb son anda onu siyasiləşdirməyə cəhd göstərmək. Silahları bu dəfə itlərə qarşı deyil, cəmiyyətə qarşı çevirmək.

1944-cü ilin 23 fevralında Stalinin xüsusi əmriylə Şimali Qafqaz xalqları öz doğma yurdlarından zorla ayrılaraq uzaq Sibirə sürgün olunublar. Hadisənin ildönümündə - 2017-ci ilin 23 fevralında Mahaçqalada itlərin gəmirib öldürdüyü bir qız cəsədi tapılır. Yerli doqhanterlər, əslinə qalsa gizli vəhabilər, bunu bəhanə edib əllərində silah küçələrə çıxırlar. Başlayırlar əvvəlcə kimsəsiz itlərin kütləvi qırğınına...

Sonra işə FSB qatılır. Şəhərdə kütləvi həbslər start götürüb növbəti vəhabi şəbəkəsinin darmadağın edilməsi ilə nəticələnir.

Sonra Zirəddinin telefonuna Lyubankadan növbəti zəng gəlir. Doqhanterlərə qarşı mətbuatda açdığı cəbhəyə görə ona xüsusi minnətdarlıq bildirilir. Axırda deyilir ki, Aksaray küçüklərindən birini mütləq FSB rəhbərliyi üçün yetişdirsin. Bəs güc strukturları içində bu küçüklərin yaxşı müştəriləri var.

***

İlahi möcüzələr həmişə əvvəlcə yuxu aləmində baş verir, sonra real dünyada. Müqəddəs heyvanların əvvəl ruzisi peyda olur yox yerdən, sonra özləri...

Zirəddin Rzayev Rusiya mətbuatına verdiyi çoxsaylı müsahibələrində həmişə ilk olaraq oxşar hadisəni danışır. Qeyd edir ki, hələ bətndə ikən, anası yuxuda Şəmkirin məşhur kəramət sahibi Seyid Əkbəri görüb. Nəcib seyid, anasına deyir, bəs ərin Telman evdədi? “Yox!” eşidincə, deyir, ona çatdırarsan, Zirəddinin kirvəsi gəlmişdi.

Bəli, ekstrasensorikada bu, ən vacib şərtdi - əvvəl pişiyin ruzisi gəlir yox yerdən, sonra özü qapıda görsənir. Əvvəl, gözəgörünməz kirvəsi gəlir Zirəddin kimilərin, sonra özləri.

İndi bu Zirəddin Moskva ətrafında cins köpəklər yetişdirərək bütün mehrini yönəldib bu istiqamətə. Müsahibələrində hansı mövzudan danışsa, mütləq axırda köpək söhbətinə qayıdacaq. Deyəcək:

“Gördüyünüz bax bu küçük Rusiya ərazisində doğulmuş ilk türk küçüyü, Aksaray cinsli malaklı köpəyidir. Atası ”Aslandı", anası “Dilbər”. 11 küçükdən biri də hələ satışa çıxarılmayacaq. Bu siftədi. Sonrası Allah kərimdi. Alıcı ilə xüsusi müqavilə bağlayırıq. Müqavilədə o, bizə boyun olur ki, bəs it boğuşdurmalarda iştirak etməyəcək. Daimi qida ilə təmin edəcək bu möcüzəli köpəklərimizi".

Fikirləşirəm, bu, Zirəddinlə tanışlığımızın qəşəng sonluğudur.

Gəlin söhbətimizin bu nöqtəsində onunla sağollaşıb vidalaşaq.

Həmid HERİSÇİ

İsveçdə yaşayan Azərbaycanlılar siyasi məhbus olan həmvətənlərinə azadlıq tələb edir. Bu barədə Xeber.İnfo aksiyada iştirak edənlərdən biri məlumat verib. Aksiyada Azərbaycanda baş verən proseslərdən danışılıb və saxta ittihamlarla həbs olunan siyasi və vicdan məhbuslarının azad olunması tələb edilib.

Hesablama Palatasının kollegiyası müvafiq qanunvericiliyin tələblərinə uyğun olaraq 2014-2015-ci illərdə və 2016-cı ilin yanvar-sentyabr aylarında Masallı Rayon İcra Hakimiyyəti və onun tabeliyində olan idarə, müəssisə və təşkilatlar tərəfindən dövlət büdcəsindən ayrılan vəsaitlərin proqnozlaşdırılması və istifadəsi vəziyyəti ilə bağlı həyata keçirilmiş auditin nəticələri üzrə hesabatı müzakirə edərək təsdiq edib.

Palatadan BakiPost.az-a verilən məlumata görə, auditlə müəyyən edilib ki, Masallı rayon İcra Hakimiyyəti və tabeliyində olan idarə, müəssisə və təşkilatlar tərəfindən proqnozların tərtibi bir sıra hallarda iqtisadi əsaslandırmalar aparılmadan, həmçinin real tələbatlar müəyyən edilmədən aparılıb, mənzil fondunun maliyyə təsərrüfat planı tərtib edilməyib, mənzil fondunun hər m²-ə düşən xərclər araşdırılmayıb, mənzil fondunun gəlirləri, o cümlədən mənzil haqqı az hesablanıb. Küçələrin süpürülməsi, işıqlandırılması, yaşıllıq sahəsinə qulluq edilməsi xərcləri üzrə təqdim olunmuş proqnoz bu sahəni tənzimləyən müvafiq normalara uyğun müəyyən edilməyib, şəhərdə olan işıq nöqtələrinin və yaşıllıq sahələrinin uçotu aparılmadan və müvafiq illər üzrə "Abadlaşdırma xidmətləri haqqının ödənilməsi” paraqrafı üzrə xərclər tam araşdırılmadan proqnozlar tərtib edilərək təsdiq edilib.

"Yolların əsaslı təmiri” xərc maddəsi və "Abadlaşdırma xidmətləri haqqının ödənilməsi” paraqrafı üzrə vəsaitlərin istifadəsi zamanı işlərin dəyərinin və iş həcmlərinin artırılması hallarına yol verilib, müqavilə şərtlərinə riayət edilməməsi səbəbindən büdcə vəsaiti podratçılara artıq ödənilib, quraşdırılmış işıq dirəkləri və xətləri əsas vəsait kimi uçota alınmayıb. Təsərrüfat gəlirləri hesabına maliyyələşməli bəzi xərclər büdcə vəsaiti hesabına ödənilib, artıq yanacaq və material silgisinə yol verilib, bir halda vergi qanunvericiliyinə əməl olunmayıb, məişət tullantılarının daşınması üzrə marşrut və manevr xətləri müəyyən edilməyib, bərk məişət tullantılarının yığılması, daşınması və zərərsizləşdirilməsi məqsədilə bağlanmış bəzi müqavilələr Tarif Şurasının müvafiq qərarına uyğun olmayıb.

Qurumlar tərəfindən satınalmalar üzrə qanunvericiliyin bəzi tələblərinə əməl edilməyərək satınalma proseduru keçirilmədən müqavilələr bağlanıb, keçirilən satınalmalarda isə iddiaçılardan müvafiq məlumatlar tələb edilməyib, podratçılarla bağlanılmış müqavilələrin xüsusi şərtləri tərtib olunmayıb, müqavilənin yerinə yetirilməsinin təminatı alınmayıb.

Hesablama Palatasının kollegiyası Masallı Rayon İcra Hakimiyyəti və onun tabeliyində olan idarə, müəssisə və təşkilatlar tərəfindən yol verilmiş nöqsanların müəyyən hissəsinin audit dövründə aradan qaldırıldığını nəzərə almaqla bu istiqamətdə fəaliyyətin daha da gücləndirilməsi, həmçinin nöqsanlara yol vermiş vəzifəli şəxslərin Azərbaycan qanunvericiliyi ilə nəzərdə tutulmuş qaydada məsuliyyətə cəlb edilməsi barədə qərar qəbul edib, icra olunması və həyata keçirilmiş tədbirlər barədə Hesablama Palatasına məlumat verilməsi məqsədilə kollegiya qərarının surəti İcra Hakimiyyətinə göndərilib.

Auditin nəticələri ilə bağlı Milli Məclisə məlumat verilib.

ABŞ-İsrail cütlüyünün sürətlə silahlanması bütün dünyaya təhlükədir; onlar vuruşmağa yox, vuruşdurmağa çalışırlar – TƏHLİL

"İran bizim varlığımız üçün təhdiddir". Bunu İsrailin Türkiyədəki baş konsulu Şai Kohen deyib. Türkiyə və daha bir neçə ölkənin də rəsmi Tehranın fəaliyyətindən narahatlığını dilə gətirən diplomat, İraq və Suriya böhranlarının İransız həllini mümkün sayıb. Hətta bir qədər də irəli gedərək bildirib ki: "Dünya güclərinin, xüsusilə, ABŞ və Rusiyanın dəstəyi sayəsində bu dövləti təkləmək mümkündür. Ağıllı addımlarla İranın Yəmən, İraq, Bəhreyndəki fəaliyyətlərinə maneçilik törətmək olar. Amma hər yerdə qolları var. Buraya Azərbaycan, Türkmənistan və digərləri də aiddir; bir sözlə, şiələrin olduğu hər yerə qolu uzanır".   

        

İsrailin Türkiyədəki baş konsulu Şai Kohen

Əziz oxucu! Mübarək nəzər-diqqətinə ərz olunanların kimə məxsusluğunu bilməsəydin, hansısa terror təşkilatının rəhbəri tərəfindən söyləndiyini düşünərdin, elə deyilmi?

Amma çox təəssüf ki, ifrat düşmənçiliyə, qarşıdurmaya, qisasçılığa, birini digərinin üzərinə hücuma səsləyən sözləri ölkələrarası normal münasibətlərin qurulması və bölgədə əmin-amanlığın təmininə mükəlləf, sülh missiyası daşımalı bir elçi söyləyir. Yükləndiyi mənfilikləri, kökləndiyi vəhşilikləri, zahiri maskaların örtə bilmədiyi batini şeytansifətlikləri, təmsil elədiyi ideologiyanın mürtəceliklərini beş-altı cümləlik mətbu məlumat vasitəsilə faş eləmək də özəl istedad, qabiliyyət göstəricisidir...

El arasında "aravurmaq", "bir budaqda oturub, min budağı silkələmək", "dünyanı qana çalxamaq" kimi təfsirlənir. Bizim kənddə belə xüsusiyyətlərə malik, azca da mənəvi-əxlaqi cəhətdən problemli qız, gəlin, arvadla ehtiyatlı davranmağa, elələrinin yaşadığı, olduğu yerdən kənar durmağa çalışardı camaat - nahaqdan şərə düşməkdən qorxduqları üçün.

Lakin müasir geopolitikada həmin qəbildən nəsnələr – düşüncələr, sayıqlamalar, əməllər siyasət adlanır. Mütərəqqi beynəlxalq aləm, dinclik, hüzur, səadət arzulu ictimaiyyət sözügedən mübahisəli, münaqişəli situasiyalardan nə qədər uzaq qaçmağa səy göstərsələr də, cəhdləri nəticə vermir. Şər özü gəlib buynuzunu çomağa sürtür, qaşınmayan yerdən qan çıxartmaq istəyir.

Müsəlman aləmi ayrı-ayrı dövlətlərin, xüsusən ərəb liderlərin siyasi eqoizmi, sərvət hərisliyi, kənardan səpilmiş ixtilaf toxumları üzündən daim vəhdət problemi yaşasa da, dünya jandarmeriyası lazımi anda və yerdə birləşməyi, eyni mövqedən çıxış etməyi, batil ideologiyasını, əməllərini doğru qismində sırımağı bacarır.

Elə bu mövzuda da ağız-ağıza verərək oxunan və səsgücləndiricilər vasitəsilə yayılan yeknəsək ABŞ-İsrail xoru bütün planetin zəhləsini töküb. Neçə gün öncə Nümayəndələr Palatasının komitə rəhbəri, respublikaçı Ed Roysun "aydın səmamızı qara buludların alması" ilə bağlı səsləndirdiyi bəyanat və sərgilədiyi süni həyacan bu qəbildəndir. İslam Respublikasının "bölgə ölkələrinə təhlükəsi" proqnozu onun da sayıqlamalarında yer alıb: "İslam İnqilabı Keşikçiləri Korpusu regional sabitlik üçün narahatlıq doğurur və sanksiyalara məruz qalmalıdır". Konqresmenin bildirdiyinə görə, İran Yəmən, Bəhreyn kimi Yaxın Şərq ölkələrinə təhdid yaradır, husi qiyamçılarını Səudiyyə Ərəbistanına qarşı silahlandırır (?!). Diqqət yetirdinizsə, göstərilən nümunələrdə danışan ayrı-ayrı dövlətlərin yetkililrəidir, amma mətnlər sanki eyni adamın qələmindən çıxıb; kim bilir, bəlkə elə mason lojasında yazılıb?!  

 Başdan-başa yalan, iftira və qızışdırıcı niyyətlərdən ibarət müsahibələrin regionda və müsəlman dünyasında kütləvi xaos, qarışıqlıq törətməyə hesablandığı aydın məsələdir. Rəsmi Ankara və Bakının Tehranla qarşılıqlı anlaşmaya, sağlam əməkdaşlığa söykənən münasibətlərini, nüfuzlu məclislərdə, mötəbər tribunalardan bir-birinin, ən başlıcası isə haqq-ədalətin müdafiəsinə qalxmasını, dövlət rəhbərlərinin yüksək etimaddan qaynaqlanan çoxsaylı görüşlərini, eləcə də cənab İlham Əliyevin qonşu məmləkətə səfərə hazırlaşdığını (o zaman səfər hələ reallaşmamışdı) sadəcə, gözləri götürmür.

O ki qaldı, cari proseslərdə üst-üstə düşməyən müəyyən məqamlara, xarici siyasətdə müxtəlif uyğunsuzluqların mövcudluğu təbiidir; ən əsası, ortada ciddi fikir ayrılığının olmadığını liderlər özləri dəfələrlə bəyan ediblər. Adama deyərlər, Türkiyə, Azərbaycan İrandan, yaxud da əksinə - narazıdırsa elə özləri bir araya gəlib səbəblərini araşdıracaqlar da; daha ortada vasitəçi-yengəyə nə ehtiyac var?! Mason ünsürləri İslam Respublikasının beynəlxalq münasibətlərə verdiyi töhfələri, gərginliyin azaldılması istiqamətindəki xidmətlərini bilərəkdən görməməzliyə vurur, balıqları rahat və sorğu-sualsız qamarlamaları üçün bütün suları bulandırmağa can atırlar.

Axı adını çəkdiyiniz münaqişələrin həllinə bu dövləti sizlər – problemi yaradan ABŞ, İsrail, İngiltərə, Fransa və başqaları dəvət eləyibsiz. İraq və Suriya kələfini dolaşdırıb özünüzü də elə bir bataqlığa salmısız ki, indi nəinki İran, bütün dünya yığılıb dartır, çıxara bilmir; ara yerdə dağılan yaşayış məntəqələri, qədim sivilizasiya məskənləri, mədəni-tarixi abidələr, qırılan da məzlum, günahsız insanlar – qadınlar, qocalar, körpələrdir. Fələstin, Yəmən, Bəhreyn, Qarabağ, digər yüzlərlə çözümümüşkül düyünlərinsə tamam özgə illəti var, mövzunun davamında bir daha üzərinə qayıdacağıq.

         

Ancaq geniş kütlələr üçün qaranlıq qalan və maraqlı suallar doğuran xeyli mətləblər var. Gör, qos-qoca Cümhuriyyət başqanlığı bir konsula nə boyda səlahiyyət verib ki, o da başından böyük qələtlərə cəsarətlənib. Deyəsən, Ərdoğan hakimiyyəti Saxal əsgərlərinin 2010-cu ildə Qəzzaya humanitar yardım aparan "Mavi Mərmərə" gəmisinə azğın hücumunu və ötən ilin 15 iyul darbesini – dünya güclərinin ölkənin, dövlətçiliyin və xalqın başına gətirdiklərini yavaş-yavaş unutmaqdadır. İkincisi, Benyamin Netanyahunun Vaşinqtona son səfəri və birgə bəyanatlar rəsmi Tel-əvivin Ağ Evin yeni sahibinə "xod" tapmasının göstəricisidir. Beynəlxalq sionizm bu fürsətdən nəinki mövsümi layihələr, hətta uzaq perspektivlər üçün bəhrələnə bilib. ABŞ prezidenti qlobal oyunları pərdə arxasından idarə edən qrossmeysterlərə xatir, BMT qətnamələrində vurğulanan və bütün dünyanın dəstəklədiyi İsrail-Fələstin münaqişəsinin "iki dövlət" prinsipindən əl çəkmədimi?

Bundan başqa, son günlər Tramp komandasının ölkəni Birləşmiş Millətlər Təşkilatı İnsan Haqları Şurasından çıxarmağın mümkün variantlarını nəzərdən keçirməsi barədə məlumatlar yayılıb. Yekun qərarın qəbulunda dövlət katibi Reks Tillerson, BMT yanında daimi nümayəndə Nikki Heyli və prezidentin özünün iştirakı gözlənilir. Rəncidəliyin səbəbləri isə çox primitiv və gülməlidir: administrasiyanın Şuraya olan iradları arasında anti-İsrail siyasəti, ümumi təhlükəsizlik və üzvlərin şübhəli tərkibi (Məsələn, Çin və Səudiyyə Ərəbistanı) və sair var.

Ümumiyyətlə, indi dünya jandarmeriyasının öz mahiyyətini gizlətmək, bundan xəbər tutanları susdurmaq, bəd əməllərinin əleyhinə çıxanlardan incik düşüb qabaqlayıcı tədbirlər görmək cəhdləri çox dəbdədir. Sionistlərin müdafiə naziri Avidqor Liberman da Almaniyanın "Die Welt" qəzetinə verdiyi müsahibədə Avropanın Yaxn Şərq mövqeyinə kəskin tənqid yağdıraraq, sözügedən siyasəti qeyri-məhsuldar adlandırır. Sən demə, "avropalılar açıq-aşkar şəkildə fələstinlilərin tərəfində" çıxış edirlərmiş. Onların "münaqişənin həllinə verə biləcəkləri ən böyük töhfə isə Yaxın Şərqi unutmaqdır..."  Liberman İranla nüvə anlaşması imzalayan 6 dövləti (o cümlədən Almaniyanı) sərt tənqidə məruz qoyub. Və maraqlıdır ki, həmin sırada sazişin hazırlanmasının fəal iştirakçısı ABŞ-ın (artıq "qələtini düzəltmək" istiqamətində addımlar atdığından) adını çəkməyib.

Beləliklə İsrailin cığal rəhbərliyi və məmuriyyəti hamıdan küsür, inciyir, obyektiv mövqe sərgiləməyə çalışanlara barmaq silkələyir... Təkəbbürü elə həddə çatıb ki, dünyada hamı günahkardır – ondan və ABŞ-dan başqa; ali irqə mənsubluqları kimi cəfəng iddiaları var. Eyni sərsəmliklə Hitlerin nasional-sosialistləri ötən əsrin 40-cı illərində Yer kürəsini qana boyadı, indi sionizm on qat artığını törədir və tərəqqipərvər bəşəriyyəti daha böyük təhlükələr qarşısına atır.

Okeanın o tayına zəhər ötürmələri də faktlarla təsdiqlənən və zaman-zaman aşkara çıxan reallıqdır. Sadəcə, yeni rəhbər siyasətdə naşılığı üzündən diqtələri, sifarişləri gizlətmək, nəsə bir siyasi don geyindirmək iqtidarında deyil. Tramp Vaşingtonda nümayiş zamanı hava ilə doldurulmuş nüvə silahı maketini göstərərək, nüvə arsenalını genişləndirmək niyyətini bəyan edib: "ABŞ nüvə silahı gücü ilə geridə qalıb və o zirvədə olmalıdır". Özərinin 6,800 nüvə silahının, Rusiyanın isə 7000 belə raketinin mövcudluğuna toxunan ABŞ Silahlara Nəzarət Assosiasiyası, prezidentin belə arzuolunmaz sahədə rəsmi Moskva ilə qorxulu yarışa girdiyini təsdiqləyir. Məsələ bundadır ki, ABŞ və Rusiya arasında silahların məhdudlaşdırılması üzrə "Yeni başlanğıc" adlanan müqavilədə gələn ilin fevralın 5-dək hər iki ölkənin 10 il ərzində nüvə silahlarının sayını bərabər səviyyədə azaldılması istənilir.

Lakin Donald Tramp strateji hücum silahlarının məhdudlaşdırılması haqqında müqaviləni ölkəsi üçün uğursuz sayır, birtərəfli adlandırır və yenə də sələfini tənqiq atəşinə tutur: "İranla bağladıqları saziş kimi, olduqca faydasız müqavilədir. Mənim dövrümdə daha yaxşı anlaşmalar imzalanacaq”. Ekspertlərin fikrincə, tərəflər dünyanın təhlükəsizliyi üçün kritik önəm daşıyan "Orta və kiçik mənzilli raketlərin ləğvi" haqqında sazişlə əlaqədar böhran yaranmayacağı təqdirdə, bu müqaviləni də qüvvədə saxlaya bilərlər. Xatırladaq ki, 2010-cu ildə Rusiya prezidenti Dmitri Medvedev və ABŞ prezidenti Barak Obama arasındakı razılaşmaya görə, tərəflər nüvə başlıqlı raketləri 1550 ədədə qədər məhdudlaşdırmaq qərarına gəliblər. Bundan başqa, qitələrarası və ağır bombardmançıların 700- qədər endirilməsi də nəzərdə tutulub.

Hər hansı nüvə sazişinə qoşulmayan, bu səbəbdən də MAQATE ekspertlərini qapıdan içəri buraxmayan, kütləvi qırğın silahlarının məhdudlaşdırılması tələblərini birmənalı şəkildə saya salmayan İsrailsə dəhşətli atom arsenalına malikdir və arada İranın “uranı lazımi sentrafuqadan artıq zənginləşdirməsindən narahatlığını” dilə gətirməyi də unutmur. Lakin İslam Respublikası böyük səbr, təmkin və əzmkarlıqla elmi-texniki tərəqqi yoluna davam etməkdədir. Zəhmətsevər və mütərəqqi fikirli müsəlman qardaş və bacılarımız hətta “nüvə başlığı istehsalına hazırlıq” bəhanəli qadağalar, sanksiyalar dövründən də yaxşı mənada, yararlanmağı bacardılar: özləri üçün lazımi hər şeyin daxildə istehsalı düşmənlərin məkrli niyyətlərini alt-üst elədi; iqtisadi blokada əks-effekt verdi.

İİR-nın ali rəhbəri Seyid Əli Xamneyi cənablarının mütəal Allahın buyruqları, İslam humanizmi və Qurani-kərimin tövsiyələrinə tamamilə zidd sayılan kütləvi qırğın vasitələrinin əldə olunması və yayılmasını dəfələrlə pisləməsi belə, xofluların müxtəlif fitnələrlə dolu qəlblərini aramlaşdıra bilmədi. Beynəlxalq Atom Enerjisi Agentliyinin mütəxəssisləri Buşəhrdə, digər atom reaktorlarında yenidən yoxlamalara başlamaq qərarına gəliblər.

Təzadlısı odur ki, indiyədək hər hansı qövm İslam dövlətinin nəinki tətbiqi yasaqlanmış silahı, adi hücumundan da əziyyət çəkməyib. Şəhidpərvər xalq yalnız müdafiə məqsədilə, İslam inqilabının nəticələrinin məhvindən ötrü üzərinə qaldırılmış Səddam rejiminə və digər xain basqınlara sinə gərib. Hazırda İran hərbçilərinin Suriyada, İraqda görünməsi də daha çox həmin ölkə rəhbərlərinin dəvəti və ərazidə yerləşən müqəddəs ziyarətgahların mühafizəsi məqsədilədir. ABŞ-ın 1945-ci ilin avqustunda – faşizmin neçə ay öncə təslimçilik aktını imzaladığı və müttəfiqlərinin də heç bir təhlükə törətmədiyi bir zamanda Yaponiyanın Xirosimo və Naqasaki şəhərlərinə atdığı atom bombalarının fəsadları isə üstündən 72 il ötüşməsinə baxmayaraq, silinib getmir. Vyetnamda dinc insanlara – qocalara, qadınlara, uşaqlara qarşı işlətdiyi "napali" kimyəvi-bioloji silahları bu gün də bəşəriyyətin yaddaşını və vicdanını qarsımaqda, yandırmaqdadır...           

Yaxın keçmişdə baş vermiş, unudulmayan cinayətlər seriyası azmış kimi, rəsmi Vaşinqton yenidən sürətli silahlanmaya start verib. Donald Tramp federal idarələrə "müdafiə xərclərinin" kəskin artırılmasını nəzərdə tutan büdcə hazırlamağı tapşırıb, bunun müqabilində daxili agentliklərin xərcləri xeyli kiçiləcək. "The New York Times" qəzetinin yazdığına görə, Tramp yeni büdcədə ətraf mühitin mühafizəsi üzrə agentliyin və Dövlət Departamentinin məsrəflərini 10 milyardlarla dollar azaltmağı düşünür. Bundan başqa, sosial təminat proqramlarında da ciddi ixtisarların baş verəcəyi gözlənilir. Birləşmiş Ştatlar öz cəbbəxanasını ölümsaçan yeni modellər hesabına sürətlə zənginləşdirir və köhnəlmiş, sıradan çıxmış qurğularını bazara çıxarır.

Yer üzünə çeşidli faciələr və bədbəxtliklər gətirən “matah”a müştəri bolluğu isə müxtəlif regionlarda həssas münasibətləri qızışdırmaq və məhəlli münaqişələrə, müharibələrə yol açacaq yeni konfliktlər yaratmaqla mümkündür. Amerika xalqı özlərinə heç bir aidiyyatı olmayan ucqarlarda övladlarının ölümü ilə barışmadığından belə hallar kəskin daxili təlatümlərə (anaların etiraz nümayişləri zamanı Ağ Ev qarşısına əsgər çəkmələri düzmələrini yada salın) rəvac verməklə yanaşı, liderlərin reputasiyasına da mənfi təsir göstərir. Deməli, rəsmi Vaşinqton vuruşmaqda yox, vuruşdurmaqda maraqlıdır. Onun İŞİD-i öz hərbçilərini qorumaq və digər səbəblərdən meydana çıxardığı da generalitetin etirafları sırasındadır. General Vesli Klark terror qruplaşmasının ABŞ tərəfindən dünyada zombiləşmiş qorxunc qüvvə formalaşdırmaq, Səudiyyə Ərəbistanından pul "sağmaq" və ölkələrin işğalına bəhanə yaratmaq məqsədi ilə qurulduğunu bildirib. 11 sentyabr hücumundan 10 gün sonra Pentaqona getdiyini deyən Vesli, İŞİD-in qurulması barədə qərar verilən görüşdən söhbət açıb.

Görüşə müdafiə naziri Donald Ramsfeld və müavini Paul Volfovitz də qatılıbmış: "Sonra Ramsfeld məni aşağıdakı otağa çağıraraq, İraqa qarşı savaşa başlayacaqlarını bildirdi. O, müharibənin səbəbini bilmədiyini, rəhbərliyin başqa çarəsi qalmadığını vurğuladı. "Səddam və Əl-Qaidə qruplaşması arasında əlaqə tapa bildinizmi?" - sualıma nazir belə cavab verdi: "Yox. Bu məsələdə yeni bir şey yoxdur. Sadəcə, İraqa qarşı müharibə aparacağımız barədə qərar verdilər. Terrorçulara qarşı nə edəcəyimizi bilmirəm, amma yaxşı bir ordumuz var. Dövlətləri zəiflədə, çevrilişlərlə birdəfəlik silə bilərik. Bizə bir çəkic lazım idi. Buna görə də İŞİD-i qurduq". Vesli Klark devriləcək hökumətlərin siyahısını da açıqlayıb: "Biz Əfqanıstanı bombalayırdıq. Bir neçə həftədən sonra məsələni müdafiə nazirindən soruşdum. Bir kağıza 7 il ərzində çevriliş hazırlanacaq ölkələrin - Suriya, Liviya, Livan, Somali və İranın adını yazdı”.

Ötən illər ərzində İŞİD xeyli güclənərək saysız-hesabsız vandallıqlar törətdiyindən, beynəlxalq aləmdə terrorizmin xaç atası kimi dillərə düşmək zəminində labüd rüsvayçılıqdan yaxa qurtarmaqdan ötrü indi də faciə-tamaşanın ikinci pərdəsini oynamağa başlayıblar: “Biz müsəlman ölkələrini İŞİD-ə qarşı savaşdıracağıq. Şəriətçi düşməni Yer üzündən silmək üçün İslam dünyasındakı dost və müttəfiqlərimiz kömək olacaqlar” (D.Tramp). Guya İŞİD-ə qarşı mübarizədə 11,7 milyard dollar xərcləndiyi üçün iqtisadi çətinliklər yaşandığını söyləyən biznesmen-prezident, Müdafiə Nazirliyinə qruplaşmanın məhvi üçün xüsusi plan hazırlamağı da tapşırıb.

Necə də Bin Laden ssenrisini xatırladır? Əfqanıstanda SSRİ-yə qarşı yaratdılar, hansı əraziyə girmək lazımsa, "1 nömrəli terrorçu oradadır" - deyə bəhrələndilər, qudurub, cızığından çıxıb üzlərinə ağ olanda aradan götürdülər. Ən qəribə və gülünc isə adı İŞİD-in memarı qismində hallanan birisinin, İslam İnqilabı Keşikçiləri Korpusunu (SEPAH) terrorçular siyahısına (?!) salmaq istəməsidir...

Okeanın o tayından çalınan havalara indi bu tərəfdən Aviqdor Liberman züy tutur:

"İsrail Səudiyyə Ərəbistanına Yaxın Şərqdə NATO-ya bənzər alyans yaratmağı təklif edir. Terrora qarşı bütün mötədil güclərin birləşməsinin vaxtı gəlib çatıb". Tehran "rejimini" yəhudi dövlətinə təhdid sayan sionist nazirin sözlərinə görə, mötədil sünni dövlətləri onlara yönəlik ən böyük təhdidin İsrail, sionizm və ya yəhudilər deyil, İran olduğunu anlayırlar. Əgər həqiqi koalisiya qurulsa, bununla bağlı öhdəliklərdən də danışmaq olar: "Baxın NATO-ya. Alyans hər bir üzvün digərlərini müdafiə etməyə hazırlığı, digərləri tərəfindən də eyni təminat verilməsi prinsipi üzərində dayanıb". Libermana görə, yəhudi dövləti ərəblərə texnologiyalarla yardım göstərə bilər: "Onlar nə terrorizmlə mübarizə, nə hərbi plan, nə də elmi araşdırmalar sahəsində bizdəki imkanlara malik deyillər".

Dəhşətli müharibə layihələri cızılıb. Qərbdən qaynaqlanan irtica yenidən şahə qalxmaq, zəhərli dalğaları ilə fərqi yuyub aparmaq niyyətindədir. Həmin sunami çəkiləndən sonra yerində qalan viranə isə yeni dünya düzəni adlanacaq və (əgər şüurlu varlıqlar yaşasa) ona təzə nizam vermək üçün konfranslar keçiriləcək. Bundan ötrü əksər resurs və vasitələr – kütləvi qırğın silahları, zombilər qrupu, çeşidli bəhanələr, təbliğat mexanizmi, milli satqınlar sürüsü və sair çoxdan hazırdır. Sadəcə, mürtəce qüvvələrin öz təbirincə desək, "dikbaş", "təhlükəli", "naqolay", "ramolunmayan" bir dövlət yolları üstündə keçilməz maneəyə çevrilib. İslam Respublikası 38 ildir nəinki zalıma boyun əyməyərək müstəqil siyasət yeridir, hətta dünya məzlumlarının hüquqlarının bərpasına çalışır. Və bu mübarizənin haqq-ədalətin qələbəsi ilə yekunlaşacağına heç bir şübhə yoxdur.

Məni yalnız ölkəmdən havalanan "xaric" səslər – bozbaş politoloqlar və psevdovətənpərvərlər dəstəsinin vay-şivəni narahat edir. Kim təminat veriri ki, "antiterror əməliyyatı aparan" düz hədəfi nişan alaraq, "terrorçu siyahısına salınanı" sıradan çıxaracaq. Məgər Əfqanstanda, İraqda min dəfələrlə hərbi bazalar əvəzinə, yaşayış məntəqələri vurularaq, dinc sakinlərin qətliamı törədilmədi? Özünü millətçi sayan, o taydakı 30 milyon soydaşımızın başına bomba yağdırılmasını qəbul görən kəslər, imperializmin İrana hücumunun ikinci günü ərazilərimizi bütövləşdirəcəyi xülyasını unudun getsin.

Bundan ötrü ən əlverişli şərait İkinci Dünya savaşının gedişində yetişmişdi, gördünüz ki, heç nə alınmadı. Qərbə əyilməz, inkişaf edən, İslami İran kimi, böyük, güclü Azərbaycan da sərfəli deyil. Hələ qorxun ki, erməni daşnakları tərəfindən işğala məruz qalmış Qarabağımızda kürd dövləti yaratmaq niyyətlərini gerçəkləşdirsinlər. 30 ilə yaxındır, yüz minlərlə məcburi köçkünün təminatında çətinlik çəkən dövlətimiz, Allah eləməmiş, cənubdan gələn qaçqın selini necə yerbəyer edə bilər? Hücuma məruz qalan tərəf də təbii ki, əl-qolunu salıb oturmayacaq və indiki halda İranın Suriya, İraq, Əfqanıstan olmadığını azyaşlı uşaq da yaxşı bilir – deməli, cavab tədbirlərinin nə ilə nəticələnəcəyi... məlumdur.

Ona görə Azərbaycan Respublikasının dövlət, hökumət rəhbərliyi və xalqı bölgədə hər hansı hücum əməliyyatının birmənalı şəkildə əleyhinədir.

 

Qurban Cəbrayıl

"MEHRİBAN XANIM HƏR YERDƏ AĞAC ƏKDİRİR, BUNLAR İSƏ AĞACLARI KƏSİB OBYEKT TİKİRLƏR”

 Metronun "Neftçilər” stansiyasının yaxınlığı, Nizami rayon İcra Hakimiyyətinin beşaddımlığındakı yaşıllıq zonası məhv edilir.

BakiPost.az xəbər verir ki, əsasən gecə saatlarında ağaclar kəsilərək, ərazidən təmizlənir. Sakinlərin sözlərinə görə, ağaclar yeni ticarət obyektlərinin tikilməsi üçün məhv edilir.

Bildirilir ki, Qara Qarayev prospektində bu işlər Ramin Əhmədov adlı şəxs tərəfindən həyata keçirilir: "Bu ərazilərdəki bütün obyektlər onundur. Əvvəllər buradan "Xalqlar Dostluğu” metrosuna kimi ağaclıq idi. Həmin o Ramin bütün ağacları kəsdirib, yerində obyektlər tikdirdi”.

Bir müddət əvvəl sakinlər ağacların məhv edilməsinə görə aksiya keçiriblər, yolu bağlayaraq, aidiyyəti qurumlardan bu "yaşıl soyqırımı” dayandırmağı tələb ediblər: "Həmin vaxt icra başçısı Arif Qasımov gəldi. Guya, heç nədən xəbəri yoxmuş kimi məsələyə əncam çəkəcəyini bildirdi. Görəndə ki məsələ ictimailəşir, kəsilən hündür ağacların yerinə balaca kollar əkdirdi. İndi o kolların yeri də maşın dayanacağına çevrilib, yavaş-yavaş kollar yoxa çıxır. Yəqin bir müddət sonra Ramin Əhmədovun yeni obyektinin inşası başlayacaq”.

Şikayətçilər bildiriblər ki, bu azmış kimi, həmin ərazinin davamı olan meşə zolağının da məhvi başlayıb: "Gecəylə ağacları kəsib daşıyırlar. Artıq bir obyektin tikintisi başlayıb. Digərlərinin yeri isə hazırlanır. Deyilənə görə, Ramin Əhmədov burada icra başçısıyla şərik çay evi açır. Bütün aidiyyəti qurumlara müraciət etmişik. Burada xeyli adam yaşayır. Yeganə nəfəs alacağımız yer idi bu ağaclıq. Onu da alırlar əlimizdən. Fikir versəniz görərsiniz ki, hətta yolun kənarını, düz asfalta qədər zəbt edib, obyekt tikiblər. Nəinki istirahət yeri, heç piyada yolu da saxlamayıblar. Qanunları pozurlar, bunlar bir tərəfə, burada yaşayan insanların əsəbləri, heysiyyətləri ilə oynayırlar. Hər yeri bazar, hər yeri obyekt ediblər. Səs-küydən, tikintinin tozundan yaşaya bilmirik. Bu meşə zolağı, bizim istirahət yerimizdən başqa həm də, bizi səsdən, tozdan qoruyurdu. Onu da aldılar əlimizdən”.

Qara Qarayev prospekti, 69 və 81 saylı binanın sakinləri məsələ ilə bağlı aidiyyəti qurumlara və birinci vitse-prezident Mehriban Əliyevaya müraciət edəcəyini bildiriblər: "Mehriban xanım və Leyla Əliyevanın bir başa təşəbbüsü ilə ölkənin hər yerində ağaclar əkilir, yaşıllıq zolağı salınır. Bu işdə hakim Yeni Azərbaycan Partiyasının və Ekologiya və Təbii Sərvətlər Nazirliyinin tez-tez iməcilik təşkil etdiyini də bilirik. Amma gör bu rayonun rəhbərliyi nə qədər məsuliyyətsiz adamdır ki, Bakının mərkəzində olan ağacları hansısa maraqlarına görə məhv etdirir. Düz gözünün qabağında, bəlkə kabinetinin pəncərəsindən baxsa görə biləcəyi yerdə bu boyda həngamələr baş verir”.

Məsələ ilə bağlı əlavə materiallarımız olacaq... 

Bir müddət əvvəl mediada QHT-lərə Dövlət Dəstəyi Şurasının faliyyətinə dair tənqidi materiallar dərc edildi. AFN olaraq bir sıra məsələlərdə qaranlıq məqamlar gördüyümüz üçün araşdırma aparmaq qərarına gəldik. Lakin araşdırma aparmaq üçün Şuranın saytında müvafiq məlumatları tapa bilmədik. Buna görə qurumun rəhbəri Azay Quliyevin adına rəsmi sorğu ünvanladıq. Həmin sorğudan iki gün sonra bizim üçün qaranlıq olan məsələlərlə bağlı araşdırma aparmamıza yardımçı ola biləcək məlumatlar Şuranın saytında yerləşdirildi. Bununla belə, sorğu ünvanladığımız üçün qurumun mətbuat xidməti tərəfindən, demək olar ki, ittihamlarla üzləşdik və qərəzdə suçlandıq.


Bu barədə bir neçə gün öncə ayrıca yazı da dərc etmişik. Həmin yazı ilə aşağıdakı linkdən tanış ola bilərsiz:

QHT Şurasının sorğu fobiyası

Beləliklə, sorğumuz nəticəsində Şuranın saytında yerləşdirilən məlumatlar əsasında apardığımız araşdırmanı təqdim edirik. Onu da qeyd edək ki, araşdırmalar zamanı da bir sıra suallar yarandı, lakin Şuranın mətbuat xidməti tərəfindən sorğular qərəzlə qarşılandığı üçün yaranmış suallarımızı QHT Şurasının sədri, hörmətli deputat Azay Quliyevə açıq formada ünvanlamaq qərarına gəldik. Həmin suallarla yazının sonunda tanış olacaqsız.

“Sair xərclər” müəmması, yaxud 3,5 milyon vəsait nəyə xərclənib...

Dövlət büdcəsindən QHT-lərə Dövlət Dəstəyi Şurasına 2011-ci ildə 2 milyon 766 min 324 manat, 2012-ci ildə 3 milyon 812 min 160 manat, 2013-cü ildə 3 milyon 210 min 240 manat, 2014-cü ildə 4 milyon 12 min 800 manat, 2015-ci ildə 6 milyon 619 min 200 manat, 2016-cı ildə 6 milyon 619 min 200 manat vəsait ayrılıb. Bu il isə Şuranın pulu azaldılaraq 5 milyon 16 min manata endirilib. 
2011-ci ildə Şura tərəfindən elan edilən 4 müsabiqə çərçivəsində 338 layihəyə 2 milyon 45 min 416 manat ayrılıb. 2012-ci ildə 2 müsabiqə çərçivəsində 348 layihəyə 2 milyon 31 min manat, 2013-cü ildə 2 müsabiqə çərçivəsində 474 layihəyə 3 milyon 414 min 632 manat, 2014-cü ildə 2 müsabiqə çərçivəsində 386 layihəyə 2 milyon 928 min 292 manat ayrılıb, 2015-ci ildə 2 müsabiqə çərçivəsində 513 layihəyə 4 milyon 750 min 664 manat ayrılıb. Bundan əlavə, xarici QHT-lərin 7 layihəsinə 504 679,0 manat ayrılıb. 
Şura 2016-cı ildə 3 qrant müsabiqəsi üzrə 483 layihəyə 4 541 000 manat vəsait ayırıb. Şuranın hesabatında qeyd olunur: “Bu təşkilatlardan 6-sı Şuraya müraciət edərək müxtəlif səbəblərə görə layihəni icra edə bilməyəcəklərini bildirmişlər. Şura bu müraciətləri nəzərə alaraq ümumi dəyəri 57 000,0 manat olan 6 QHT layihəsi ilə bağlı qəbul etdiyi qərarı ləğv etmişdir.” 
Şuranın qrant olaraq QHT-lərə ayırdığı bu vəsaitlər, bu sahədə vəziyyət, qeydə alınan problemlərlə bağlı araşdırmalarımız davam edir. Hələliksə diqqəti Şuranın və Katibliyinin fəaliyyəti ilə bağlı xərclərə yönəltmək istəyirik.
İlk öncə qeyd edək ki, hər il Nazirlər Kabinetinin müvafiq qərarı ilə Şura Katibliyinin illik smetası təsdiqlənir. Bu qərarlardan aydın olur ki, Katibliyə ayrılan vəsaitlərin əsas hissəsi “sair xərclər” adı altında qeyd olunur . Belə ki, 2011-ci ildə Katibliyin 719 min manatlıq büdcəsinin 596 min 805 manatı, 2012-ci ildə 1 milyon 846 min 189 manatın 1 milyon 647 min 17 manatı, 2013-cü ildə 1 milyon 440 min manatın 1 milyon 92 min 107 manatı, 2014-cü ildə 1 milyon 340 min manatın 896 min 188 manatı, 2015-2016-cı illərin hər birində 1 milyon 156 min 188 manatı “Sair xərclər”ə aid edilib. Bu sair xərclərinsə ən yaxşı halda 50 faizinin açıqlaması, o da ümumi formada Nazirlər Kabinetinin qərarında əksini tapır. 

Şuranın xərclər smetasına nəzər yetirdikdə, görmək olur ki, 2012-ci ildə “Sair xərclər” bölməsi üzrə nəzərdə tutulan vəsaitlər 3 dəfə artıb – 2011-ci ildəki 596 min 805 manatdan 1 milyon 647 min 17 manata. Və bu məbləğin yalnız 276 min manatının ümumi açması var - Şuranın mətbu nəşrlərinin təsis olunması, xüsusi bülletenlərin buraxılması, konfransların, simpoziumların, forumların təşkil edilməsi, üzvlərin bu tədbirlərdə iştirakı ilə əlaqədar xidməti ezamiyyə, işin təşkili ilə əlaqədar xidmət haqlarının, ekspertlərin qonorar xərclərinin ödənilməsi və fəaliyyəti ilə bağlı digər xərclər adı ilə. 2013-cü ildə bu xərclərə 338 min manat, 2014-cü ildə 343 min 500 manat, 2015-2016-cı illərin hər birində 362 min manat ayrılıb. Bu vəsaitlərin hansı hissəsinin məsələn, bülleten buraxılışına, yaxud konfrans təşkilinə, və ya xidməti ezamiyyəyə sərf olunduğuna dair Şuranın illik hesabatlarında hər hansı məlumat verilmir. Bu məlumatlara Şuranın İnternet saytında da rast gəlmədik.
Eyni zamanda “sair xərclər” bölməsi üzrə yerdə qalan çox böyük məbləğlərin də xərc istiqamətləri demək olar ki, tamamən ictimaiyyət üçün qaranlıq olaraq qalmaqdadır: 2011-ci ildə bu məbləğ 386 min 805 manat, 2012-ci ildə 1 milyon 371 min 17 manat, 2013-cü ildə 754 min 107 manat, 2014-cü ildə 552 min 688 manat, 2015-2016-cı illərin hər birində 794 min 188 manat, qeyd olunan 6 ildə ümumilikdə isə 3 milyon 419 min 93 manat təşkil edib.

Şübhəli tender əməliyyatları QHT Şurasından da yan keçməyib...

Şuranın xərclərinin kiçik bir hissəsi tender yolu ilə aparılır, yaxud tenderlərin rəsmi qeydiyyat sistemində qeydə alınır. Belə ki, araşdırmamız zamanı məlum oldu ki, tenderlərin qeydiyyatı sistemində 2011-ci ildə bu qurumun qeydə alınan alqı-satqılarının sayı 7 olub. Ümumi məbləği isə cəmi 63 508 manat təşkil edib. 2012-ci ildə Şuranın rəsmi qeydə alınan 6 alqı-satqısının dəyəri 128 914 manat olub. 2013-cü ildə qeydə alınan alqı-satqıların məbləği 158 211,56 manat təşkil edib. Bu alqı-satqılarda diqqətimizi cəlb edən 2 məsələ oldu. Belə ki, 2013-cü ildə Şura 10 000 manatı Online ekspertiza proqram təminatının və elektron modulların hazırlanması xidmətlərinin, 48 000 manatı isə Ofis üçün mərkəzi havalandırma və soyuducu sistemin quraşdırılması xidmətlərinin satın alınması üçün "Bakı İnvest LTD" MMC-yə verib. Bir MMC-nin iki tamamilə fərqli xidməti təmin etməsi diqqətçəkicidir. Daha maraqlısı budur ki, 2014-cü ildə bu MMC Şuraya 18 min 550 manatlıq mebel də tədarük edib. Digər tərəfdən, 2013-cü ilin fevralında dövlət qeydiyyatına alınan bu şirkətə elə həmin il 2 işi həvalə etmək üçün yəqin ki, Şura rəhbərliyinin xüsusi əsasları olub. Eyni sözləri “Servis-C.H.” MMC barədə də söyləmək olar – nə halətdirsə, bu MMC də 2013-cü ilin fevralında qeydiyyata alınıb, elə həmin il də Şuraya 14563,56 manatlıq mebel sata bilib. 

Şuranın 2013-cü ildəki alqı-satqıları arasında ən maraqlısı isə Elektrik avadanlıqlarının satın alınmasıdır. Bu işi Şura üçün 6249 manat müqabilində fiziki şəxs Qurbanov Fərasət Şəkur oğlu həyata keçirib(?!) Düzü, tenderlərin reyestrində bu adı oxuyanda söhbətin məhz Şura Katibliyinin rəhbəri olan F.Qurbanovdan getdiyini güman etmədik. Lakin Şuranın saytında Fərasət müəllimin ata adının Şəkur olduğunu oxuyanda xeyli təəccübləndik: bir qurumun keçirdiyi tenderdə birbaşa elə həmin qurumun rəhbərinin qalib çıxması təcrübəsinə yəqin ki, Azərbaycanda belə rast gəlmək mümkün deyil. Əlbəttə, indiyədək rəhbərlərin müxtəlif qohum-qardaşların şirkətləri vasitəsilə tenderlərə qatılıb qalib ayrılması halları yüz dəfələrlə qarşımıza çıxıb. Amma beləsini, sözün düzünü desək, nə eşitmişik, nə da şahidi olmuşuq...

2014-cü ildə Şuranın rəsmi reyestrdə qeydə alınan 2 alqı-satqısının ümumi məbləği cəmi 23 min 800 manat olub. 

Maraqlıdır ki, 2015-ci ildə Şuranın heç bir alqı-satqısı rəsmi qeydiyyat siyahısında əksini tapmayıb. Həmin il üzrə Şuranın xərcləri barədə sədr Azay Quliyevin QHT-lərin Ümumrespublika Forumunda çıxış edərkən verdiyi bir açıqlama var. Həmin açıqlamadan məlum olur ki, "QHT-lərə maliyyə yardımı fondundan, eyni zamanda şura və katibliyin saxlanılması xərclərindən 360 min manat vəsaitə qənaət olunub və bu vəsaitin dövlət büdcəsinə qaytarılması nəzərdə tutulur”.

Qeyd edək ki, Şuranın 2015-ci il üzrə hesabatında həmin Forumda Şura katibliyi rəhbərinin çıxışına istinadən məlumat verilir ki, “Şuranın Katibliyi müqavilə öhdəliyini pozan QHT-lərə qarşı sərt tədbirlər görmüş və onlar haqqında müxtəlif qərarlar qəbul etmişdir. Belə ki, 89 yerli və xarici QHT-dən 135 843 manat vəsait tutulmuşdur. 2015-ci ilin sonuna qədər bu istiqamətdə intizam tədbirləri davam etdiriləcək.” 

A.Quliyev isə Forumda qeyd edib ki, 2016-cı il üçün Şura xarici QHT-lərin layihələrinin maliyyələşdirilməsi üçün dövlət büdcəsindən vəsait ayrılması üçün müraciət etməyib: "2013-2014-cü illərdə xarici QHT-lərin layihələrinin maliyyələşdirilməsi məqsədi ilə ayrılan vəsaitə qənaət edilib və 1 milyon 927 min 788 manat növbəti illərdə istifadə olunması üçün Şuranın hesabında saxlanılıb. Buna görə də 2016-cı ildə də Şura xarici QHT-lərin maliyyələşdirilməsi üçün dövlət büdcəsindən vəsait ayrılmasın istəməyəcək və dövlət büdcəsində bu məqsədlə vəsait ayrılmayacaq”.

Şuranın yenilənmiş saytında “Tenderlər” bölməsində yalnız 2016-cı il üzrə alqı-satqılar barədə məlumat yerləşdirilib. Ola bilər ki, bu yazıdan sonra digər illər üzrə alqı-satqılar da yerləşdirilsin, çünki yazının girişində də qeyd etdiyimiz kimi, materialı hazırlamağa başlayanda bir çox məlumatlar saytda yox idi. Sorğu ilə müraciətimizdən 2 gün sonra yerləşdirildi, üstəlik, biz özümüzə əziyyət verib sayta baxmamaqda ittiham olunduq. 

2 ay əvvəl yaranan MMC 95 min manatlıq tenderi udur...

2016-cı ildəki alqı-satqılara gəlincə, onların bir neçəsi barədə Şuranın saytında elan və nəticəyə dair bildiriş yerləşdirilsə də, məbləğlər açıqlanmayıb. Yalnız sentyabrda 3 lot üzrə elan olunmuş tenderin 2 lotunun nəticələri rəsmi reyestrdə qeydə alınıb. Belə ki, “L Standart” MMC 2016-cı ilin iyununda qeydiyyatdan keçirilib, hüquqi təmsilçisi Əliyeva Lalə Eldar qızıdır. Sentyabrda isə bu MMC “Lot-3:Şuranın fəaliyyətinin həyata keçirilməsi ilə bağlı müvafiq istiqamətlər üzrə tədbirlərin təşkilinin satın alınması” işini Şuradan ala bilib - 95 780 manat dəyərində. 
Həmin tenderdə “Lot-2: Şuranın fəaliyyətinin həyata keçirilməsi ilə bağlı müvafiq istiqamətlər üzrə təlimlərin təşkilinin satın alınması” işini isə “Satman” MMC əldə edib - 55 805 manatlıq. 2008-ci ildə qeydiyyata alınmış bu MMC-nin hüquqi ünvanı Zaqatala şəhəri Ş.Qurbanov, ev 5, mənzil 16-dir. Maraqlıdır ki, Şuradan 2016-cı ildə Konfransın təşkili işini əldə edən “Azlut” MMC də eyni hüquqi ünvanda, eyni ildə qeydiyyatdan keçib. Bu MMC Şuranın sentyabrda elan etdiyi tenderin “Lot-1: Şuranın elektron resurslarının təkmilləşdirilməsi və yeni sahələr üzrə proqram təminatının yaradılmasının satın alınması” hissəsi üzrə də qalib elan edilib. Lakin oktyabrın 26-da Tender komissiyasının verdiyi bu qərarı Katiblik noyabrın 3-də ləğv edib. Şuranın saytında bununla bağlı yerləşdirilən bildirişdə tender nəticəsinin nədən ləğv olunduğu isə açıqlanmır. Qeyd edək ki, Şuranın İnternet saytında Tender komissiyası adından elan və bildirişlər yerləşdirilsə də, komissiyanın tərkibi barədə də heç bir məlumat açıqlanmır. 

Bəzi fiziki şəxslərə “sədaqət” hardan qaynaqlanır?

Şuranın keçirdiyi və rəsmi reyestrdə qeydə alınan tenderlərdə 3 fiziki şəxs davamlı olaraq bir neçə ildir sifarişlər əldə edirlər. Bunlardan biri Fiziki şəxs Əsgərov Eldar Tohid oğludur. O, Şuradan 2011-ci ildə kompüter və ofis avadanlığının alınması üçün 15 924 manat, 2012-ci ildə Ofis texnikası, kompüter, printer, faks, kseroks və digərlərinə texniki-təmir xidmətlərinin satın alınması üçün 17 100 manat, 2013-cü ildə Ofis texnikası, kompüter, printer, fask, kseroks və digərlərinə texniki-təmir xidmətlərinin və Şuranın internet səhifəsinə texniki xidmətlərin satın alınması üçün 18100 manat alıb. 2016-cı ildə isə Komputer avadanlıqlarına texniki xidmət işini əldə edib, amma məbləğ açıqlanmayıb. 
Fiziki şəxs Əliyev Orxan Novruz oğlu Şuradan 2012-ci ildə Mətbəə xidmətlərinin satın alınması üçün 17 000 manat, Dəftərxana ləvazimatlarının satın alınması üçün 18 376 manat, 2013-cü ildə Dəftərxana ləvazimatlarının satın alınması üçün 18382 manatlıq sifariş alıb. 2016-cı ildə fevralda dəftərxana mallarının alınması üçün keçirilən 2 günlük sorğudan qalib ayrılıb, amma məbləğ açıqlanmayıb. 
Fiziki şəxs Səmədov Nişat Nazim oğlu Şuranın ən “uzunömürlü” tədarükçüsüdür. Belə ki, o, 2011-c ildə mebel avadanlığının satın alınmasına 3850 manat, dəftərxana mallarını almaq üçün 13 334 manat, mətbəə xidmətləri üçün 16 200 manat, 2012-ci ildə Kompüter avadanlıqlarının satın alınması üçün 42 408 manat, 2013-cü ildə Kompüter avadanlıqlarının satın alınması üçün 5250 manat alıb.
Maraqlıdır ki, 2016-cı ildə Bakı şəhərində və regionlarda tədbirlərin təşkili işi “Mühasibat NS” adlı MMC-yə həvalə olunub. Və bu MMC-nin hüquqi təmsilçisi də məhz Səmədov Nişat Nazim oğludur. Təəssüf ki, Şuranın saytında alqı-satqının dəyəri açıqlanmayıb.

“QHT Nəşriyyatı”na ayrılan vəsaitlərin qaranlıq taleyi

Şuranın 2012-ci il xərclərinin bir hissəsini mətbəənin yaradılması xərcləri təşkil edir. Düzdür, mətbəənin yaradılmasına nə qədər vəsait xərcləndiyinə dair nə tenderlərin reyestrində, nə də Şuranın İnternet saytında məlumat verilməyib. Amma İnternetdə axtarış verərkən Şuranın saytında yerləşdirilmiş 17 mart 2012-ci il tarixli elan diqqətimizi cəlb etdi. Həmin elanda 1 lot üzrə tenderə dəvət yer alıb ki, bu da Mətbəə avadanlığının (Xüsusi sifarişlə yığılmış adakontrol idarə sisteminə, CP3 proqram təminatına malik 4 rəngli yüksək keyfiyyətli və 1 saatda 10000 A2 format çap məhsulu istehsal etmək gücünə malik müasir standartlara cavab verən çap maşını, kəsim bıçağı (Perfecta), rəng ayırma avadanlıqları, 1 ədəd 4 rəngli A3 çap maşını, 2 ədəd kompyuter, 1 ədəd faks, 4 ədəd printer, 1 ədəd surətçıxarma aparatı, 1 ədəd biqovka və perferasiya, 1 ədəd rens (təqvim deşiklərini açan), 1 ədəd laminator, 2 ədəd xüsusi kağız stolu, 1 ədəd kəsim bıçağı) tədarükü ilə bağlıdır. Tender reyestrində və Şuranın saytında tenderin nəticələrinə dair hər hansı məlumata rast gəlməsək də, bildiyimiz odur ki, Şura “QHT Nəşriyyatı” adlanan mətbəəsini yaradıb. Vergilər Nazirliyinin hüquqi şəxslərin qeydiyyat bazasındakı məlumatdan aydın olur ki, “QHT Nəşriyyatı” MMC 2012-ci il sentyabrın 9-da qeydiyyatdan keçib. Hüquqi ünvanı Bakı şəhəri, Sabunçu rayonu, Telman küçəsi 6, mənzil 1-də yerləşir. MMC-nin nizamnamə kapitalı 975700.00 AZN-dir, hüquqi təmsilçisi isə Rafiq Hüseynovdur. Şuranın bəzi rüblük hesabat iclaslarına dair məlumatlarda nəşriyyat rəhbərinin hesabatının dinlənildiyi bildirilsə də, bu MMC-nin maliyyə fəaliyyətinə dair hər hansı məlumat açıqlanmır. Şuranın illik hesabatlarında da bu məlumatlara rast gəlmək mümkün deyil. Halbuki Şura layihə ayırdığı QHT-ləri faktiki olaraq məcbur edir ki, layihələr çərçivəsində nəzərdə tutulan bütün nəşr işlərini bu mətbəədə həyata keçirsinlər.

Şura QHT-ləri məcbur edir ki...

Şura Katibliyinin rəhbəri F.Qurbanovun 2013-cü ildə “Azadinform” İnformasiya Agentliyinə müsahibəsi də aydın göstərir ki, Şura QHT-ləri öz mətbəəsindən istifadəyə məcbur edir. Müsahibədən bir hissəni təqdim edirik: “Bildiyiniz kimi, artıq Şuranın “QHT Nəşriyyatı” adı altında poliqrafik mərkəzi fəaliyyət göstərir. Bu nəşriyyatın yaradılmasında məqsəd Şuranın, eləcə də QHT nəşrlərinin həyata keçirilməsi, QHT nəşrlərinin keyfiyyətinin yüksəldilməsi, QHT-lərə bu sahədə xidmətin təşkilindən və bu xidmətdən əldə olunan gəlirin yenidən QHT-lərə qrant şəklində verilməsindən ibarətdir. Hər ilin sonunda Şura tərəfindən maliyyələşdirilən layihə xərclərinin təsnifatını apardıqda orta hesabla 400 minə yaxın vəsaitin müxtəlif nəşrlərə sərf edildiyini görürük. Deməli, dövlətin vətəndaş cəmiyyətinə ayırdığı vəsaitin 400-minə yaxını hər il kommersiya qurumlarının hesabına köçürülür. Bu gün həmin kommersiya qurumları QHT-lərə hansısa bir dəstək verirmi və yaxud onlar QHT-lərə hansısa bir güzəştlər tətbiq edirlərmi? Əlbəttə, yox. Bunu nəzərə alaraq, Şura xüsusi olaraq QHT nəşriyyatının yaradılması təşəbbüsü ilə çıxış etmiş və bu təşəbbüs də yüksək qiymətləndirilərək, belə bir nəşriyyatın yaradılmasına dövlət tərəfindən Şuraya vəsait ayrılmışdır. Artıq nəşriyyatın işi təşkil edilmiş və nəşriyyat istənilən materialın çapını yüksək keyfiyyətlə həyata keçirə bilir.”
F.Qurbanovun dedikləri həqiqətdirsə, aşağıdakı bir neçə suala böyük məmnuniyyətlə cavab almaq istərdik:

1. Mətbəənin fəaliyyətindən ildə nə qədər gəlir əldə olunur? Nəzərə aldıqda ki, hər il ayrılan qrantların orta hesabla 400 min manatı nəşrlərə yönəldilir, bu halda gəlirlərin elə də az olmadığını söyləmək olar.
2. Bu gəlirlərin nə qədəri qrant şəklində QHT-lərə qaytarılır? 

F.Qurbanovun qeyd olunan müsahibəsindən daha bir hissə: “Şuranın 2013-cü il birinci maliyyə yardımı müsabiqəsinin qalibi olmuş və layihəsində kitab, buklet, broşur və digər nəşrlərin olduğu QHT-lərə, bu nəşrlərin Şuranın mətbəəsində çap olunması tövsiyə edilmişdir. Həmin təşkilatların bəziləri bu tövsiyəni nəzərə almaq əvəzinə hər vəchlə öz nəşrlərini başqa mətbəədə çap etməyə çalışırlar. Bəzi təşkilatlar isə layihənin büdcəsində olan nəşr xərclərini ümumiyyətlə çıxarırlar.
Kommersiya qurumlarından heç bir dəstək almayan bəzi QHT-lərin bu hərəkətləri başa düşülən deyil. Niyə dövlətimizin QHT-lərə ayırdığı bu vəsaitdən daha çox kommersiya qurumları faydalanmalıdır, niyə bu QHT-lər Şuranın öz əli ilə verdiyi vəsaiti başqa qurumlara verməlidir?

Şura digər mətbəələrdə çap işlərini həyata keçirən bu təşkilatların layihələrini ciddi nəzarətdə saxlayacaq. Həmin təşkilatların çap etdiyi məhsulların sayı və keyfiyyəti Şura tərəfindən yoxlanılmadan bu nəşrlər paylana bilməz. Bu qaydaları pozan QHT-lərə müqavilə üzrə nəzərdə tutulan ikinci ödəniş həyata keçirilməyəcək.
Bir məsələ də bizdə çox ciddi narahatlıq doğurur. Belə ki, bir qayda olaraq layihənin büdcəsindən çıxarılan nəşr xərcləri təlim və seminarların təşkilinə, yemək, çay-kofe, tədbir üçün zalın icarəsi, mobil rabitə, tədbir üçün dəftərxana xərclərinə yönəldilir. Bununla əlaqədar həmin QHT-lərə xəbərdarlıq edirəm. Şura katibliyinin müvafiq əməkdaşının razılığı olmadan heç bir təlim, seminar və digər tədbir keçirilə bilməz. Təlim keçən QHT-lərin təlim materialı, təlim iştirakçılarının siyahısı, digər paylanma materialları, təlimçinin kimliyi, təlim iştirakçılarına nahar və digər iaşə xidmətlərinin təşkili kimi məsələlər mütləq şəkildə Şura katibliyi ilə razılaşdırılmalıdır. Əks təqdirdə, bu layihələr üzrə verilən hesabatlar qəbul edilməyəcək və həmin təşkilatlara müqavilə üzrə nəzərdə tutulan ikinci hissə ödənişlər verilməyəcəkdir. Eyni məsələ seminar, dəyirmi masa və digər tərdirlərə də aiddir.”

Bizim isə Şura rəhbərliyinə başqa suallarımız var:

1. Niyə QHT-lər özəl biznes qurumlarına nəşr işini sifariş verə bilməzlər? 
2. Özəl biznesə bu, yumşaq desək, barışmaz münasibətiniz nədən qaynaqlanır?
3. Sizcə, bu yanaşmanız ölkə rəhbərliyinin sahibkarlığa dəstək sahəsində həyata keçirdiyi davamlı siyasətə nə qədər uyğundur?
4. Siz QHT-ləri nəşr işi ilə bağlı seçim imkanından məhrum edirsiniz. Bu, sizin öz mövqeyinizdən istifadə edərək monopoliya yaratdığınızı göstərmirmi?
Qeyd edək ki, Şuranın bu ilki qrant elanında bir istiqamət “İctimai aktuallıq kəsb edən məsələlərlə bağlı video çarxların və sənədli filmlərin hazırlanması” adlanır. Nəşriyyat “təcrübəsini” nəzərə alsaq, yaxın aylarda Şuranın öz prodakşn şirkətini də yaradacağını gözləmək olar.

P.S. Araşdırmamızın növbəti hissəsi Şuranın qrant siyasəti ilə bağlı olacaq. Bu istiqamətdə çox maraqlı məlumatlar əldə etməkdəyik. Tezliklə araşdırmanın nəticələrini diqqətinizə təqdim edəcəyik. 

AFN.az

57 -dən səhifə 181