Azərbaycanda II və III qrup əlillər əmək qabiliyyətli hesab olunacaqlar.

Bununla bağlı Milli Məclisin bu gün keçirilən plenar iclasında deputat Musa Quliyev "Əmək pensiyaları haqqında" qanuna dəyişikliklərdən danışarkən deyib.

O bildirib ki, bunlar insanların işlə təmin olunmasına şərait yaratmaq üçündür: "Əlillərin işə düzəlməsini gündəmə gətirmək lazımdır. Onların çalışmasını diqqətdə saxlamalıyıq".(report)

“Adamlarda pul olmadığına görə alver də ölüb”

“Xlor var, xlor... asiton, kislaata, mebel yağı, ağ neft...” Günaşırı, bəzən də 3-4 gündən bir bu səs həyətimizi başına götürür. Asta yerişli, nurani görkəmli qadın həyəti dolanır, müştəri çağırır, yükünün bir qədər azalmasına, az da olsa pul kisəsinin dolmasına çalışır. Ancaq çox vaxt da istəyinə çata bilmir; əksər hallarda elə gəldiyi kimi də torbaları dolu qayıdır. Son illər artan, marketlərdə də tapılan, keyfiyyət baxımından yaxşı olan bu təmizləyici vasitələri əldən alan azalıb. Özü də etiraf edir, ancaq tələbin azalmasının səbəbini bu vasitələrin marketlərdə artmasında yox, adamlarda pul olmamasında gördüyünü deyir: “Camaat hamısı pis gündədir, nə iş var, nə də dolanışıq, adamlarda pul olmadığına görə alver də ölüb. Heç bilmirəm böyüyümüz hara baxır...”

“Ağşalvarlılar” nəsli...

Dilarə Həsənova bu yazının qəhrəmanıdı. Suraxanıda doğulub. Dediyinə görə, burada 88 saylı orta məktəbdə 5-ci sinfə qədər oxuyub. Sonra məktəbi atıb...
...Dümağ saçları var, çox vaxt da başıaçıq, örpəyi çiyninə düşmüş vəziyyətdə gəzir həyətdə. Köhnə paltar geyinsə də, elə də səliqəsiz görünmür. Uzun illərdir tanıyıram, ancaq heç vaxt təzə ayaqqabıda görməmişəm Dilarə xanımı... Müştəri çağıra-çağıra bir gözü həmişə evlərin pəncərələrinə baxır; bəlkə kimsə nəsə istədi... Bir neçə addım atır, dayanır, müştəri çağırır, təzədən yoluna davam edir. Həyəti dolanır, arada oturacaqlardan birində oturub dincini alır, bəzən həyətdəki qadınlarla dərdləşməyə də vaxt tapır. Ancaq bu çox çəkmir, görünür, iş başında olduğunu unutmur. Yenə qalxır, torbalarını götürür, təzədən xüsusi avazla “Xlor var, xlooor... asiton, kislaata, mebel yağı...” deyə-deyə, həm də bir daha evlərin pəncərəsinə boylana-boylana ləngərli yerişlə həyətdən çıxır.

“Qardaşım rəhmətlik 41-də anadan olmuşdu, müharibə başlayanda, mən də müharibə qurtaranda – 45-də”- deyir Dilarə xanım. “Əslən İçərişəhərliyik”, - deyir,- “ağşalvarlılar” nəslindənəm, eşidərsiz, oxumuş adamlar belə şeyləri bilir... bir tərəfdən də Ağaya (Mirmövsüm ağa) qohumuq. İndi İçərişəhərdəki mənzilimiz də Ağanın evinə yaxındır”.
(“İçərişəhərdə yaşayan “ağşalvarlılar” Bakının ən qədim sakinləri sayılır. Əsl, təmiz bakılı İçərişəhərdəki “ağşalvarlılar”dır (İlqar Fəhmi, “Bakı tarixindən kollaj”. Bakı - 2007). Yeri gəlmişkən, “ağşalvarlılar” o çağ Bakısının dörd ən tanınmış – toyuqyeyənlər, toyuqyeməyənlər və bozbaşlılar nəslindən biri olub - başqa bir mənbədə belə yazılıb).
Sonra elə İçərişəhərə gəlin köçüb. İki qızı, bir oğlu var. “Uşaqların üçü də 11-ci sinfi bitirib” – deyir. Üzündə bir az da sevinc duyulur bunu deyəndə. Ancaq sonra da ah çəkib deyir: “Kişi tez rəhmətə getdi, çətin günlərim başladı... Leçkomissiyada slesar işləyirdi, Şəhidlər xiyabanının yanında xəstəxana var ha, orda”.

- İçərişəhərdəki şəxsi mülkünüzdür?

- Yox, ikiotaqlı hökumət evidir. Deyirlər özəlləşdir, sat. Satmaram, özəlləşdirmək də nəyimə lazımdır, haçan təmirə ehtiyac olsa, yazırıq, gəlib düzəldirlər...
Bu arada kislota soruşurlar. “Var, ancaq yaxındakı həyətlərdən birinə qoymuşam” – deyir, “indi gətirərəm, çox götürəndə ağır olur, gəzdirə bilmirəm, gözləyin”. Sonra dönüb malı mənə tapşıraraq cəld addımlarla tez gözdən itir. Az keçmədən qayıdır. Müştərisini yola salır. Söhbətimizi qaldığı yerdən davam etdiririk.

- Bəs bu satdıqlarınızı hardan alırsız?

- 15 gündə, ayda, elə olur ayyarımda bir dəfə Nasosnıya gedib xlor, kislota, ağ neft, mebel yağı alıb gətirirəm. Sonra burda satıram. Çox yerə getmirəm. Elə buralar mənim obyektimdi,- dediyinə özü də gülür. 

“Deyirəm, bala, telefon nəyinə lazımdır, Lalafo-da sat”

Uzun illərdir bu işlə məşğul olduğunu deyir: “Atam rəhmətlik də bizi alverlə dolandırırdı”. İçərişəhərdə bir laboratoriyada 19 il işləyib, ora başqa yerə köçürüləndən sonra işsiz qalıb. Sovetin vaxtlarında Tiflisdən, İrəvandan mal gətirib satıb. “İnanırsan, sata bilmədiyimi də pay verirdim qonşulara, ehtiyacı olanlara”, – deyir Dilarə xanım. Bir dəfəsə “samalyot”la İrəvana getdiyini deyir, oğlu ilə... Xaraba qalsın oraları, qardaşım oğlu Kamal Qarabağda davada şəhid oldu, tək oğluydu qardaşımın...”

- Bu yaşda belə ağır yüklə çətin deyil?

- Neçə ildir oğlum xəstədir, xəstəxanaya qoymağa da qorxuram. Pensiyamı alandan-alana, ayda, iki ayda bir dəfə aparıram həkimə. Sağ olsun, resepti pulsuz yazır, hörmət eləyir də mənə, bilir ki, heç dərmanlara pul çatdırmıram. İnanırsan, bala, vaxtilə 2 manata aldığım dərman indi 65 manatdır... Çox çətindir, oğul... Gəlinim 35 yaşında ölüb, onda nəvəmin 7 yaşı vardı. Bu yaxında 20 yaşı tamam olacaq. Heç düz-əməlli məktəb də oxumadı. Pasaj bazarının yanındakı məktəbdə oxuyurdu, deyəsən, 189-du. 6-cı sinifdən sonra getmədi dərsə. İndi o da hamı kimi işsiz-gücsüz oturub evdə... Qohumlar, qonşular, yaxşı adamlar əyin-başına yardım eləyir. Biri də telefon alıb. Deyirəm, bala, nəyinə lazımdır, qoy Lalafo-da sat. Deyir, “Ay nənə, kimdir ona pul verən?” Nə bilim, vallah...

- Televizorda nəyə baxırsız?

- Zaura baxırdım. İndi də nəsə eləyiblər, heç göstərmir ki mənim televizorum. Oğlumun televizoru göstərir, onunku təzələrdəndi. O da qoymur baxmağa, mənə görə... Zaurun verilişinə baxıram axı... Deyir, ay ana, baxıb ağlayırsan. Mən də sənin ağlamağına dözə bilmirəm...

- Kinoya, teatra getmisiz?

- Cavanlığda getmişik. Uşaqları evdə qoyub gedirdik kişiylə. Gəlib görürdük yatıblar. Ancaq indiki uşaqları qoyub getmək olar? Yamandılar... İndi də yadımdadır: “Zita və Gita”, “Fillər mənim dostumdur” kinolarına baxmışıq. Qoşa qala qapısından çıxıb aşağı düşürdük, orda kinotetr vardı, indi söküblər... Ancaq kişi öləndən sonra getməmişəm...
Bu vaxt həyətə post-patrul maşını gəlir. Ənənəvi gəlişdir... Bu gəlişi gözləyən satıcılar maşına yaxınlaşır... Dilarə xanım da bayaqdan sərgiyə düzdüyü butulkaları tez torbaya atır... 
“Burda iki dəfə aldadıb pulumu alıblar”

- Heç olub ki, “xlor var, xlor...” deyib müştəri çağıranda kimsə eyvana çıxıb üstünüzə qışqırsın?

- Yox, Allah var adamın başının üstündə, hamı hörmət eləyir, ancaq elə buralarda iki dəfə aldadıblar məni. Sizin bu həyətdə biri aldadıb 45 manatımı alıb.

- Necə aldadıb?

- Həyətdə durmuşdum, odey, bax orda, o qapının qabağında (bloku göstərir), bir kişi gəlib xlor soruşdu, sonra da yuxarı baxıb kimisə adıyla çağırdı, indi ad yadımda qalmayıb, dedi arvadım gəlib 5 manatlıq xlor götürəcək. Mənə 45 manat ver, bir də yuxarı qalxmayım, arvadım gətirib sənə 50 manat verəcək. Elə bil ovsunladı məni, dilimi-ağzımı bağladı. Verdim, getdi. Gözlədim, adam gəlmədi. Yuxarı qalxdım, dedilər, burda o adda adam yaşamır... Halal eləmirəm, dedim də, seyid nəslindənəm, o pulu yeyə bilməz, Allah baxır axı göydən...
Susur. Gözləri yol çəkir, çətinliklə qazandığı pulun bir anın içində əlində çıxması, görünür, onu hələ çox göynədəcək. Üzü elə görkəm alır ki, sanki pulu indi əlindən verib... Mən də susuram, təskinlik nəyi dəyişər ki?!.

- Yaxşı, mən gedim,- söhbətimizi də, görünür, vaxt itkisi saydığından tələsik ayağa durur, hələ satılıq mal var torbada; bir butulka ağ neft, bir butulka da kislota... Qalan iki xlor butulkasını aldım, yükünü yüngülləşdirmək üçün...

Yol aldı getməyə, ancaq çağırışı elə əvvəlkiydi, “Xlor var, xlor... asiton, kislaata, mebel yağı...”

Rövşən Hacıbəyli

 «Mədən Sənayesində Şəffaflığın Artırılması» (MSŞA) Koalisiyası Şurası adından qurumun fevralın 2-də keçirilmiş iclasının qeyri-legitim olması ilə bağlı açıqlama yayılıb.

Açıqlamada deyilir ki, bu il fevralın 2-də Mədən Sənayesində Şəffafıq Təşəbbüsü üzrə Çoxtərəfli Qrupun (ÇTQ) növbəti toplantısı olub. İclasa MSŞT üzrə Komissiyanın rəhbəri, Neft Fondunun icraçı direktoru Şahmar Mövsümov sədrlik edib.

Bildirilir ki, hökumətdən vətəndaş cəmiyyəti, şirkətlərlə işləmək və MHŞT-nin tətbiqinə nəzarət etməkdən ötrü ÇTQ təşkil etmək tələb olunur. MHŞT-yə ÇTQ-nin üzvləri kimi cəlb edilən vətəndaş cəmiyyəti qrupları siyasət baxımından dövlət və ya şirkətlərdən azad olmalıdırlar.

Müəlliflərin fikrincə, fevralın 2-də keçirilən ÇTQ iclasına yeni üzvlərlə yanaşı, səlahiyyət müddəti bitmiş keçmiş üzvlər də dəvət edilib. İki köhnə və altı yeni üzvün iştirakı ilə təşkil edilən iclasın gedişində əvvəlcədən üzvlərə göndərilən gündəliyin təsdiqinə Qrupun keçmiş üzvü Əliməmməd Nuriyev mane olub.

Açıqlamada deyilir ki, iclasda sədr Şahmar Mövsümov ÇTQ üzvü olmayan kənar şəxsin iştirakına şərait yaradıb və onun təkidi ilə gündəlik dəyişdirilib.

Vurğulanır ki, iclasın belə şəraitdə keçirilməsi mümkünsüz olduğundan yeni seçilmiş Şura üzvləri oranı tərk ediblər. Beləliklə də ÇTQ-nin fevralın 2-də təşkil olunan iclası baş tutmamış sayılır.

Müəlliflər bildirirlər ki, bu münasibət bu il martın 8-i və 9-da Boqotada keçiriləcək MSŞT üzrə Beynəlxalq İdarə heyətinin iclasında Azərbaycanın mövqeyini daha da zəiflədir.

Bundan irəli gələrək sənəd müəllifləri seçilmiş təmsilçilərin ÇTQ-də fəaliyyətinə və mövqelərinin nəzərə alınmasına şərait yaradılmasını tələb edirlər.

Ə.Nuriyev: "Qrup marağı ifadə edirlər"

Açıqlamada adı çəkilən Əliməmməd Nuriyevin Azadliq Radiosuna dediyinə görə, hazırda 11 nəfərdən ibarət Koalisiya Şurası parçalanmış durumdadır: «Bir tərəfdə Qubad İbadoğlu və tərəfdarları, digər tərəfdə isə 5 nəfər Şura üzvü. Həm də bu siyasətlə məşğul olan, öz maraqlarını güdən qrupdur. Özü də bu parçalanma indi baş verməyib .2016-cı il aprelin 30- da keçirilən iclasın sabahı günü baş verib».

Ə.Nuriyev deyir ki, bu qrupla hər hansı bir işi sona çatdırmaq mümkün olmur.

O vurğulayır ki, ümumi iş naminə dəfələrlə birgə fəaliyyətə çalışsalar da, bu baş tutmayıb: «Ona görə də, son iclasda gündəliyin onlar deyən kimi qəbul olunmasına razı olmamışam».

Ə.Nuriyev deyir ki, ÇTQ-un sədri Ş.Mövsümov Şurada mübahisə olduğundan məsələnin həlli naminə Koalisiyanın bütün üzvlərinin iştirakını vacib sayıb: «Bundan başqa da yol yoxdur. Şurada ikitirəlikdir, yeganə çıxış yolu bütün Koalisiya üzvlərinin iştirak etməsidir. Q.İbadoğlu bunu əvvəl qəbul etsə də, sonradan bunun əleyhinə çıxdı. Çünki, çoxluq bu qrupun əleyhinədir».

Ə.Nuriyev deyir ki, bu durumla bağlı Ş.Mövsümov fevralın 7-də bütün Koalisiya üzvlərini görüşə çağırıb.

Akif Qurbanov: "Şahmar Mövsümovun müdaxiləsi təsdiqləndi"

"Söylədiklərimiz təəssüf ki, öz təsdiqini tapdı. MHŞT standartının, Anlaşma Memorandumunun və Çoxtərəli Qrupun(ÇQ) fəaliyyətinə dair reqlamentin tələblərinə tamamilə zidd olaraq MSŞT üzrə Komissiyanın rəhbəri, ÇQ-nin sədri olaraq Neft Fondunun prezidenti Şahmar Mövsumov prosesə açıq və qanunsuz müdaxilə etməkdədir. Belə ki, bu gün MHŞT üzrə ÇQ-nin sədri adından Katibliyin rəhbəri Farid Farzaliyev elektron məktub göndərərək 7 fevralda MSŞA üzrə QHT Koalisiyasının bütün üzvlərini ÇQ-də təmsilçiliyə dair yaranmış problemlə bağlı Hökumət Komissiyasının sədri ilə görüşə dəvət edib. Görüşün Dövlət Neft Fondunun inzibati binasında keçirilməsi planlaşdırılır". 

Arqument.Az xəbər verir ki, bunu isə Koalisiya üzvü Akif Qurbanov deyib. 

"Koalisiya Şurasının öz mandatını onu seçənlərin iradəsi və Koalisiyanın qüvvədə olan sənədləri əsasında icra etməsi, həmçinin qanuni olaraq səahiyyətlərini itirmiş, özlərinin keçirdiyi seçkidə uduzan tərəfin sonradan yaratdıqları gərginliklə məsələni hakimiyyətin xeyrinə dəyişə bilməməsi, sonda hakimiyyətin açıq-aşkar prosesə müdaxiləsinə gətirib çıxarıb. Bu, faktiki yenidən Ümumi Yığıncağın çağırılması deməkdir. Həmçinin bir daha gerçəkliyi ortaya qoyur ki, məsələ heç də koalisiya üzvləri arasında yaranan konflikt deyil. Bu məhz hakimiyyətin və onun icraçılarının yaratdığı süni və siyasi gərginlikdir", - deyə Akif Qurbanov bildirib. 

Xatırladaq ki, Mədən Hasilatı üzrə Şəffaflıq Təşəbbüsü (ingiliscə EITI) İdarə Heyətinin sədri Fredrik Reinfeldt və qurumun beynəlxalq katibliyin sədri Jonas Moberg bu günlər Azərbaycanda səfərdə olublar. Onlar həm prezidentlə, həm də Koalisiya üzvləri ilə görüşüblər.

EITI şirkətlər, hökumətlər, sərmayəçilər və vətəndaş cəmiyyəti təşkilatlarının dəstəklədiyi könüllü təşəbbüsdür. O, neft, qaz və mədən hasilatı sahəsində şəffaflığın təmin edilməsində qlobal standartdır.

Azərbaycan EITI prosesinə 2003-cü ildə qoşulub. EITI 13 illik üzvü olan Azərbaycanın statusunu 2015-ci ilin aprelində tamhüquqlu üzvlükdən namizədə qədər azaldıb.

O zaman qurum qərarını vətəndaş cəmiyyətinə basqılarla əlaqələndirərək, durumun yaxşılaşdırılmasının zəruriliyini bəyan etmişdi.

Ötən il oktyabrın 26-da EITI üzrə beynəlxalq rəhbər komitə Azərbaycanın öhdəliklərini yenidən qiymətləndirmiş və ölkəni namizəd statusunda saxlamışdı.

Həmin qərarla İdarə Heyəti hökumətə növbəti iclasa qədər islahedici tədbirlər planı təqdim etmişdi.

EITI-nin beynəlxalq İdarə Heyətinin növbəti toplantısının martın 8-də keçirilməsi planlaşdırılır.

Fazil Qəzənfəroğlu: "Heydər Əliyev şəxsiyyətcə natamam insanların fenomenal sistemini yaradıb"

Dekabrın 26-da Böyük Quruluş Partiyasının I (təsis) qurultayı keçiriləcək. Qeyd edək ki, bu, 15 oktyabr seçkilərindən sonra Azərbaycan siyasətində ilk rəsmi siyasi toplantıdır. BQP-nın Təşkilat Komitəsinin sədri Fazil Qəzənfəroğlu cəmiyyətə yeni nəzəriyyəyə söykənən partiya təqdim edəcəklərini deyir...

 - Heydər Əliyevin ölümü Azərbaycanda gedən siyasi proseslərə sizin dediyiniz yeni münasibətlər sisteminin yaranmasına nə dərəcədə təsir edə bilər?

- Hər halda, böyük təsiri olacaq. Çünki Heydər Əliyev son 10 ildə Azərbaycan dövlətinin feodal ənənələrinin formalaşmasında müstəsna rolu olan simalardan biridir. O, şəxsiyyət natamamlığı olan insanların idarə olunmasının fenomenal bir sistemini yaradıb. Amma öz şəxsiyyət bütövlüyünü tanıyan, insan komleksini tam görmək istəyənlər üçün Heydər Əliyev sistemi məhdudlaşdırıcı, boğucu sistem kimi qəbul olunub. Azərbaycanın gələcəyi isə azad düşünən, şəxsiyyətinin bütövlüyünü dərk edə bilən insanların cəmiyyəti olmalıdır. Ona görə də Heydər Əliyevin ölümü ilə bu sistemin ən azı drijoru ortadan gedib. Orkestrdə bütün çalğılar, çalğıçılar var. Amma simfoniyanı uzun müddət drijorsuz ifa etmək çətin məsələdir. Ona görə də hesab edirəm ki, orkestrin digər üzvləri də müasir dünyann tələblərinə uyğun şəkildə özlərini dəyişməyə məhkumdurlar. Bunu yeni bir mərhələnin başlanğıcı kimi də qiymətləndirmək olar.

- Yeni mərhələyə keçid üçün iqtidar-müxalifət dialoqunun zəruliliyi barədə fikirlər səslənir. Sizin bu fikirlərə münasibtiniz necədir?

-  Bilirsiniz, dialoq anlayışının özünə də baxış fərqlidir. Cəmiyyətdə dialoqdan öncə ictimai münasibətlərin  normal tənzimlənməsi baş verməlidir. Heydər Əliyev bu ölkədə həmin hüququ ortadan qaldırıb. Heç bir insanın, hətta bu gün hakimiyyətdə olan ən imkanlı şəxsin də sabah hər hansı şəkildə mülkiyyətinin dağılmasına qərar verilsə, onu qoruyacaq mexanizm yoxdur. Bunu hansı məhkəmədə qorymaq mümkündür ki? Hüquq olmayan cəmiyyətdə dialoq olmur. Birinci o hüququ bərpa etmək, insan münasibətləri formalaşdırmaq lazımdır. Müxtəlif düşərgələrdə olan insanlar bir-birinin yasına, toyuna gedə bilmirlər. Heydər Əliyev bu münasibətləri zədələyib. Ona görər də yeni mərhələdə insanı münasibətlərinin bərpa olunması öz həllini tapmalı, ondan sonra isə seçki müstəvisində dialoq olmalıdır. Yoxsa mən hakimiyyəti götürmüşəm, gəl mənə sözün de, çıx get, bununla dialoq anlaşma olmur. Növbəti seçki müstəvisində anlaşma olmalıdır. Anlamaq lazımdır ki, bircə demokratik seçkidən dialoq başlanır. Ən azı bilirəm ki, məsələn, parlament müstəvisində dialoq oldu, hakimiyyət demokratik dəyərlərin icrasına məhkum ediləcək. Amma islahatçı kimi özü bunu başlasa, onların daha çox faydasına olacaq. Çünki indiki vəziyyətdə ən çox qazanan onlardı, onların itirəcəyi də bizdən daha çoxdur. Mən o baxımdan seçki müstəvisində dialoqun başlanmasının tərəfdarıyam.

- Müxalifət liderlərinin Heydər Əliyevin dəfn mərasiminə qartılmamasını insani münasibətlərin zədələnməsinin başlıca təzahüründən biri saymaq olarmı?

- Yox, elə hesab eləmirəm. Çünki mən şəxsən elə düşünürəm ki, insan rəhmətə gedibsə, hamı onun ailəsinə baş sağlığı verməyi öz borcu hesab etməlidir. Düşmən kimi qəbul etdiyin adam olarsa belə, ona başsağlığı verməli, hüzrdə iştirak etməlisən. Amma Heydər Əlieyin dəfni bir qədər fərqli məsələdir. O, insanlara, müxalifətə yaxınlıq yarada biləcək mühit yaratmayıb. Bir insan kimi Heydərt Əliyevə münasibətdə çox neqativ məsələlər ortaya çıxıb. Məsələn, Ayaz Mütəllibovun atası rəhmətə gedib, Heydər Əliyev özü xahiş edib onun Bakıya gəlməsinə şərait yaratmalı idi. Amma nəinki bunu etmədi, üstəli, onun Bakıya gəlməsinə imkan vermədi. Dövlət başçısı kimi yanaşanda isə o, halal yolla seçilməmişdi. Halal yolla seçilən dövlət başçısı olsaydı, hətta onu istəməyənlər də dəfndə iştirak edib, ona xüsusi sayğı göstərərdilər. Heydər Əliyev bir qrupun, tayfanın liderinə çevrilib. Ona görə də məsələ ilə bağlı ziddiyyət burdan yaranır. Müxalifət liderlərinə qarşı olan hörmətsizlik, onların şəxsiyyətinin alçaldılması ənənəsini məhz Heydər Əlieyv qoyub. Amma buna baxmayaraq, müxalifət də kompleksləri aşıb, müəyyən addım atmalıdır, vəfat edən insanla bağlı başsağlığı vermək olar. Onlar bir çadır qursaydılar, hamı ora gəlib başsağlığı versəydi, bu, başqa məsələ olardı. İndi elə bir vəziyyət yaradıblar ki, gəlin, Heydər Əliyevin qəbrinin qarşısında baş əyib keçin. Yaxud kamera qoyublar ki görək kim keçir, kim keçmir. İnsanları bununla qorxu altında saxlayırlar. Seçkilərdə də kameralarını seçki qutusu olan yerə tuşlamışdılar. 15 oktyabrda “seçki karuseli”ndən istifadə edirdilər. İndi “dəfn karuseli” qurublar. Heydər Əliyevin dəfni zamanı da onun Azərbaycan cəmiyyətindən kənarlaşdırmaq yolu ilə getdilər. Bu, olduqca təhlükəlidir. Hesab edirəm ki, Azərbaycan cəmiyyətinin içində Heydər Əliyevə münasibət dəyişmədi. Siz ona baxmayın ki, insanlar bir dəfə papaqlı, bir dəfə papaqlarını çıxarıb, gah bığlı, gah bığsız Fəxri Xiyabandan keçirlər. Bununla həm də çox insanın gəldiyini sübut etmək istəyirlər. Amma mənə elə gəlir ki, müxalifət bu məqamda kifayət qədər ləyaqətli mövqe nümayiş etdirdi. Əksəriyyət onu sevənlərə ailə üzvlərinə başsağlığı verdi.   

“Yeni Müsavat”,  №340 (2267) 23 dekabr 2003 

"Cənab Prezident, biz niyə işdən çıxarılırıq, məmurlar niyə bizi ac qoymaq istəyir?"-Vətəndaşlar etiraz etdilər

Biləsuvar sakini Bisütun Hüseynov səbəbsiz yerə işdən çıxarıldığını deyir. 

"Mən qazel sürürdüm gömrükdə, oğlum da orda işləyirdi. Təzə rəsi Elçin Quliyev bizi işdən çıxardır. Biləsuvar sakini Bisütun Hüseynov səbəbsiz yerə işdən çıxarıldığını deyir. Dediyinə görə Biləsuvarın yeni gömrük rəisi kohnə işçilərin hamısına məcburi ərizə yazdıraraq işdən azad edir. Onların yerinə isə öz qohumlarını yerləşdirir.
Qarşı tərəfin mövqeyini verməyə hazırıq

Məhkəməsində Nardaran hadisələrindən sonra həbs olunan 12 nəfərdən ibarət 3-cü qrup hakimlərin önünə çıxarılıb. Bu məhkəmədə hələ hazırlıq mərhələsidir.

Cinayət işinə Zeynal Ağayevin sədrlik etdiyi hakimlər kollegiyası baxır.

Fevralın 2-də keçirilən hazırlıq iclasında təqsirləndirilən şəxslər yalançı ittihamlardan, Baş Mütəşəkkil Cinayətkarlıqla Mübarizə İdarəsində (el arasında “bandotdel” deyilir) işgəncələrə məruz qalmalarından danışıblar. Onların vəkilləri bir sıra sənədlərin sübutlar siyahısından çıxarılması barədə vəsatətlər qaldırıblar.

Təqsirləndirilən Elxan Həsənovun vəkili Ramiz Məmmədov deyir ki, Nardaranda 26 noyabr əməliyyatı keçirilərkən, müdafiə etdiyi şəxs ölkədə olmayıb. Dekabrın 11-də ölkəyə qayıdanda onu gömrük-keçid məntəqəsində saxlayıblar: “Bir gün saxlayandan sonra guya onda silah-sursat olması haqda məlumat daxil olub, Lənkəranda evinə gedib axtarış aparıblar və guya evdən silah-sursat və “Taleh Bağırzadənin müraciəti” kitabçası çıxıb. Əvvəla, yalandır. İkincisi, axtarış aparmaq üçün məhkəmə qərarı olmalıdır, amma belə bir qərar olmayıb. Xahiş edirəm, axtarış-götürmə haqqında protokol qanunsuz tərtib edildiyi üçün sübutlar siyahısından çıxarılsın”.

“İcra başçısı məhkəməyə gəlsin”

Ramiz Məmmədov müdafiə etdiyi şəxs haqqında xasiyyətnamədən də danışıb. Müdafiəçi deyir ki, xasiyyətnamədə Elxan Həsənovu Ben Laden kimi tanıdıblar. Bu xasiyyətnaməni Lənkəranın icra başçısı Taleh Qaraşovun imzaladığı üzə çıxıb. Ona görə də vəkil icra başçısının məhkəmədə dindirilməsi haqda vəsatət qaldırıb.

Təqsirləndirilən Elman Ağayevin vəkili Akif Əliyev müdafiə etdiyi şəxsin Lənkərandakı mənzilində axtarışda Lənkəranın keçmiş polis rəisi Möhübbət Hüseynovun, onun müavininin və digər əməkdaşların iştirak etdiyini deyib. Amma iş materiallarında axtarışı BMCMİ-nin əməliyyat müvəkkili Elman Bayramovun keçirdiyi yazılıb: “Elman Ağayevi tutub Baş Mütəşəkkil Cinayətkarlıqla Mübarizə İdarəsinə gətiriblər. Orada polkovnik Moşu Paşayevin iştirakı ilə ona işgəncə verilib. Hələ də bədənində işgəncə izləri var. Elə işgəncələr verilib ki, burada danışmaq olmur. İşgəncə verib, guya evdən silah və “Taleh Bağırzadənin müraciəti” kitabçaları tapılması barədə etirafedici ifadə almaq istəyiblər. Elman Ağayev onlara deyib ki, dindar adamdır, silah ittihamını qəbul etmək istəmir. Bundan sonra məcbur olub, “Taleh Bağırzadənin müraciəti” kitabçası ilə bağlı ittihamı qəbul edib”.

Müdafiəçi bildirib ki, Elman Ağayevi 19 gün BMCMİ-də saxlayıblar, amma bu haqda ailəsinə, vəkilinə məlumat verməyiblər: “Onun öz vəkili ola-ola, təyinatla vəkil təqdim edib, sənədləri saxtalaşdırıblar”.

Vəkil çıxışının sonunda Elman Ağayev haqqında cinayət işinə xitam verilməsi üçün vəsatət qaldırıb.

“Videodan da görünür ki, silahları polislər özləri gətirib”

“Adamı “bandotdel”də elə həddə çatdırırlar ki, intihar etmək istəyirsən. Əgər mən dindar olmasaydım, intihar edərdim. Həbs qərarı verəndə, məni sürüyüb məhkəməyə apardılar. Hakim də gördü ki, ayaq üstə dura bilmirəm. İşgəncə izləri hələ də qalır. Məndən sonra qardaşımı həbs etdilər, məni ailəmlə hədələdilər. Siz heç düşməninizə də bunu arzu etməzsiniz. Mənə təyinatla təqdim edilən vəkil Rəhim Qurbanov idi. O da gəlib ifadə versin”, – təqsirləndirilən Elman Ağayevin sözləridir.

O, Lənkəranın icra başçısı Taleh Qaraşovun verdiyi rəydə onu “separatçı”, “təhlükəli ünsür” adlandırdıını söyləyib: “Halbuki, Lənkəranda məmurların özbaşınalığına görə sabitlik pozulanda icra başçısı bizdən kömək istəyirdi. Hamı bilir ki, Lənkəranda narkomaniya, “SPİD” (AIDS – red.) xəstəliyi yayılıb. Biz çıxışımızda pis nə demişik? Narkomaniya və pis vərdişlərlə, radikal təriqətlərlə mübarizə aparmışıq. Əgər bizi çıxışımıza görə həbs ediblərsə, buna uyğun da maddə versinlər. Bu ittihamlar bizə yaraşmaz”.

Zülfüqar Mikayılovun vəkili Rüstəm Zülfüqarov da müdafiə etdiyi şəxsin “bandotdel”də işgəncələrə məruz qaldığını deyib: “İşgəncəylə də kifayətlənməyiblər. Zülfüqar Mikayılova deyiblər ki, əgər tələb olunan ifadəni imzalamasa, soyundurub lüt videosunu çəkib, internetdə yayacaqlar”.

Vəkilin sözlərinə görə, Zülfüqar Mikayılovun evindəki axtarışın videosundan da görünür ki, tapıldığı iddia olunan əşyaları gələnlər özləri gətiriblər: “Videodan görünür ki, polislər qara torbalarda evə nəsə daşıyırlar. Buradan aydındır ki, onlar axtarışdan əvvəl evə silah qoyub, sonra da onu çıxarıblar”.

Zülfüqar Mikayılovun özü də hazırlıq iclasında bildirib ki, haqqı deməkdən başqa heç bir günahları yoxdur: “Bu gün məhkəmələrin müstəqil olmaması şəhidlərin qanına hörmətsizlikdir. Mən evimin qarşısında həbs olunmuşam. Ömrümü Quran öyrənməyə sərf etmişəm ki, terrorçu olum?”.

Məhkəmənin vəsatətlərlə bağlı qərarı fevralın 6-da keçiriləcək növbəti iclasda məlum olacaq.

Bazar ertəsi, 10 Aprel 2017 00:00

«Talana son!» başa çatdı - FOTO

Yazan

Xeber.İnfo-nun verdiyi məlumata görə demokratik qüvvələrin Milli Şurası aprelin 8-də “Talana son! şuarları ilə mitinq keçirib.

Mitinqdə siyasi məhbusların azad olunması və sosial problemləri əks etdirən şuarlar səsləndirilib. Mitinqdə siyasi hakimiyyətin yanlış davranışı kəskin tənqid olunub. Hökumətdən talançı siyasətə son qoyulması tələb edilib. Mitinq qətnamənin oxunuşu ilə başa çatıb

Xeber.İnfo

İbrahim ibrahimli 

Cümə axşamı, 02 Fevral 2017 00:00

Bu gün xanim Zeynəbin (s.ə) mövlud günüdür

Yazan

Həzrət Əli (ə) və Fatimeyi-Zəhra (s)-ın Həsən, Hüseyn, Zeynəb, Ümmi Gülsüm və Möhsin adlı beş övladı olmuşdur. Bu xanədanın üçüncü övladı Zeynəb Hicrətin 6-cı ilində Mədinə şəhərində dünyaya göz açdı

ATANIN ZİNƏTİ

Zeynəb atanın zinəti deməkdir. Allah tərəfindən belə adlanan bu qız öz vəzifəsini yerinə yetirməklə tarixin zinəti və ailəsinin fəxri oldu. Odur ki, Zeynəb adı məhz onun fədakarlığı hesabına həmişə gözəl, müqəddəs və əbədidir. Bu vilayət dürrünün ad qoyma mərasimi haqda tarixdə belə oxuyuruq:

SƏMAVİ AD

Zeynəbi-Kubranın təvəllüdü zamanı həzrət Peyğəmbər (s) səfərdə olduğundan Fatimə(s.ə) Əlidən(ə) istədi ki, övladları üçün ad qoysun. Əli (ə) buyurdu: Mən atandan qabağa keçmərəm. Səbr edək Peyğəmbər (s) səfərdən gəlsin.
Peyğəmbər (s) səfərdən qayıtdıqdan sonra Əli (ə) Zəhranın(s.ə) uşağı olmasını xəbərini Peyğəmbərə çatdırıb, ondan uşaq üçün ad qoymasını xahiş etdi. Peyğəmbər (s) buyurdu: Fatimənin övladları mənim övladlarımdır, lakin onlar barəsində qərara gəlmək yalnız Allaha məxsusdur.
Ondan sonra Cəbrail nazil olub xəbər gətirdi ki, Allah buyurur: Bu qızın adını Zeynəb qoy! çünki, Mən bu adı Lövhi-məhfuzda yazmışam. Bunu eşidən Peyğəmbər (s) Zeynəbi öpdü və buyurdu: Tövsiyə edirəm hamı bu qıza hörmət etsin. çünki, o, Xədiceyi-Kubra kimidir.
Yəni həzrət Xədicənin fədakarlıqları kimi, həzrət Zeynəbin Allah yolunda dözüm, səbr, şücaət və mübarizəsi İslamın əbədiliyi üçün xüsusi əhəmiyyətə malikdir.

PEYĞƏMBƏR İLƏ BİRLİKDƏ

Həzrət Zeynəb(s.ə) beş ilə qədər Peyğəmbərlə(s) bir zamanda yaşamışdır. Bu müddət onun Peyğəmbər (s) səhabələrindən hesab olunmasına kifayətdir və bu da bu barədə yazılmış kitablarda qeyd olunmuşdur.
Bu beş il fürsət idi ki, Həzrət Zeynəb(s.ə) Peyğəmbərin (s) mübarək vücudundan səbr və dözüm hədisini yazsın. Çünki o, Zeynəbin(s.ə) həyat yolunun bütün müsibətlərindən xəbərdar idi və bilirdi ki, bu çətinliklərə yalnız böyük ruh, dağ kimi möhkəm qəlb və Allah eşqi ilə dolu ürək dözə bilər. Elə bil müsibət, çətinlik Zeynəbin(s.ə) taleyi ilə qarışmış və Allah-təala səbr və dözümü ondan cilvələndirmişdir ki, bütün Allah adamları üçün nümunə olsun.

DƏRDLİ YUXU

Zeynəb(s.ə), onu gözləyən qəmli macəraları uşaq vaxtında yuxuda görüb babası Peyğəmbərə (s) söyləyir. Peyğəmbər (s) onu gözləyən bu hadisələri təbir edir ki, Əlinin yetişdirməsi və Zəhranın(s.ə) qucağında böyümüş olan bu qız özünü həmin hadisələrlə görüşə hazır etsin. Bu yuxunu tarixdə belə oxuyuruq:
Peyğəmbərin (s) vəfatı yaxınlaşırdı. Bir gün Zeynəb(s.ə) onun yanına gəlib uşaqlara məxsus şirin dillə dedi:
«Ey Peyğəmbər, bu gecə yuxuda gördüm ki, şiddətli bir külək əsib bütün dünyanı zülmətə qərq etdi. Mən küləyin şiddətindən o tərəf-bu tərəfə düşürdüm. Axırda məcbur qalıb böyük bir ağacdan yapışdım. Amma külək onu da yerindən qopardı. Mən ikinci dəfə onun bir budağından tutdum, amma o da davam gətirmədi. Üçüncü dəfə onun başqa bir budağından yapışdım, lakin külək onu da sındırdı. Sonra bir-birinə yapışmış iki budağa üz tutdum ki, birdən onlar da sındı və mən yuxudan ayıldım.»
Peyğəmbər(s) Zeynəbin(s.ə) yuxusunu eşidəndən sonra ağlayıb buyurdu:
«Sənin ilk yapışdığın ağac babandır ki, teziliklə dünyadan gedəcək. Sonrakı iki budaq da ata və anandır ki, onlar da dünyadan gedəcəklər. Bir-birinə yapışmış iki budaq isə qardaşların Həsən və Hüseyndir ki, onların müsibətində dünya zülmətə qərq olacaqdır.»

BİRİNCİ HADİSƏ

Çox keçmədi ki, Zeynəbin(s.ə) yuxusunun bir hissəsi çin çıxdı və istəkli babasının vəfatı ilə o, ilk pənahını əldən verdi. Bu, onun lətif və riqqətli qəlbini incidən ilk müsibət və sanki bir başlanğıc idi. Hələ bilmirdi ki, qarşıda hansı müsibət və bəlalar onu gözləyir. Amma bəşər tarixinin bu yenilməz siması heç vaxt həyatın ağrıları qarşısında baş əyməyəcək, mətanətlə islamın qorunması üçün öz vəzifəsini yerinə yetirəcəkdir.

ANASI FATİMƏ İLƏ GÖRÜŞ

Həzrəti Fatimə (s.ə) atasından bir müddət sonra dünyasını dəyişdi. Buna əsasən, Zeynəb Zəhra(s.ə) kimi bir ananın məhəbbətindən yalnız bir neçə il bəhrələndi.
Bir neçə illik bu qısa müddət Zeynəbi(s.ə) Allah yolunda müsibət və çətinliklərə, cihad və mübarizəyə hazırlayan xatirələrlə doludur. Zeynəb(s.ə) Peyğəmbərin vəfatından sonra anası Fatiməni gülən və hətta təbəssüm edən halda da görmədi. Fatimə atasının ayrılığına o qədər ağlayıb ki, onun adını tarixin Adəm, Yəqub, Yusif və imam Səccad (ə) kimi ən çox ağlayanların sırasında qeyd etmişlər.
Zeynəb bütün bu vaxt ərzində anasının yanında olmuşdur. O, babasının müsibətli vəfat səhnələrini, anasının qəm-qüssələrini və düşmənlərin Əhli-beyt haqqında olan cinayətlərini görürdü. Bu mənfi hallar onun kiçik qəlbini incidir, o isə səbr edib dözür və sanki daha böyük müsibətlərə hazırlaşırdı.

HAQQIN MÜDAFİƏSİ

Zeynəb(s.ə) anası Fatimənin(s.ə) Peyğəmbər məscidində Fədək və Əhli-beytin müdafiə mövzusunda etdiyi çıxışda iştirak edirdi. O, anasının xütbəsini dinləməklə yanaşı, zülm qarşısında necə mövqe tutmaq yolunu da öyrənirdi.
O, anasından öyrəndi ki, düşmənlə necə mübarizə etmək və onu rüsvay etmək olar. O, hazırlaşırdı ki, Kufə bazarında, İbn Ziyad və Yezidin saraylarında öz sözləri ilə onların cinayətlərini ifşa edib İslam və Əhli-beyt vilayətini müdafiə etsin.

SONUNCU GÖRÜŞ

Nəhayət, ana ilə son görüş və vidalaşma zamanı çatmışdır. Zəhranın(s.ə) pak ruhu mələkut aləminə pərvaz edib, cismi isə qüsl olunub kəfənlənmişdir. Atanın göstərişi ilə Zəhranın(s.ə) balaları ana ilə vidalaşır, son dəfə onu qucaqlayıb ayrılırlar. Həzrət Əli (ə) bu qəmli səhnələri belə təsvir edir:
«Zəhranın(s.ə) kəfənini düyünləyərək Ümmü Gülsüm(s.ə), Zeynəb(s.ə), Həsən və Hüseynə dedim: Gəlin son dəfə ananızla görüşün ki, bu ayrılığın başlanğıcıdır. Növbəti görüş isə behiştdə olacaqdır. Həsən və Hüseyn anaları tərəfə gələ-gələ bu sözləri deyirdilər: Babamız Peyğəmbər (s) anamız Fatimənin (s.ə) ölmündə olan qəm və həsrət yanğısı heç vaxt sönməyəcək. Ana can! Bizim salamamızı babamız Məhəmməd Mustəfaya (s) çatdır və de ki, səndən sonra biz dünyada yetim qaldıq».
Əli (ə) buyurur: «O zaman göydən bir səs eşitdim ki, deyirdi: Ey Əbul-Həsən, onları anasının qucağından götür. Bu iki uşaq göyün mələklərini ağlamağa məcbur etdilər.»
Beləliklə, Zeynəb(s.ə) körpə yaşlarında mehriban ana və səmimi dostunu itirdi. ++

ANASINDAN SONRA

Artıq Əli evi Fatimə(s.ə) vücudunun şamı ilə nurlanmırdı. Buna görə də uşaqları öhdəsinə götürən bir qadına ehtiyac var idi. Fatimə (ə) bu əhəmiyyətli işi ömrünün son günlərində duymuş, uşaqları üçün mehriban ana və Əli üçün vəfalı yoldaş tapıb onunla evlənməyi Əli (ə)-a tövsiyə etmişdi. Bu şərəf həzrət Zəhranın(s.ə) ögey bacısı «Əmaməyə» mənsub idi.
Zeynəb(s.ə) anasından sonra Əli(ə) kimi atanın tərbiyəsi sayəsində, Həsən(ə) və Hüseyn(ə) kimi qardaşlarla yanaşı böyüyüb yetkinləşir və elə uşaqlıqdan çoxlu çətinlik və ruhi sıxıntılara dözüb təcrübə toplayır.
Zeynəb(s.ə) Həsən və Hüseyndən kiçik olamasına baxmayaraq, Fatimə(s.ə) qızı və onun yetişdirməsi olduğu üçün qardaşları ilə onun arasında vəsfəgəlməz məhəbbət və bağlılıq olmuşdur. Bu məhəbbətin nəticəsində də o, bir an da qardaşlarından ayrılmır və onların qüssələrinə dözə bilmirdi. Necə ki, görəcəyik o, ömürünün sonuna qədər mehriban ana kimi onları sevir və qəmlərinə şərik olurdu.

ŞƏRİKLİ HƏYAT

Artıq Zeynəbin(s.ə) ailə qurmaq vaxtı yaxınlaşmışdır. O bilir ki, izdivac hər bir insan üçün təbii və şəri vəzifədir və bu sünnətdən imtina etmək Peyğəmbərin (s) dinindən çıxmaq deməkdir.
Lakin Zeynəb(s.ə) izdivac etməklə boynunda olan böyük vəzifəni unutmur. O bilir ki, hər an və bütün səhnələrdə qardaşının yanında olmalıdır. O bilir ki, əzizlərinin qiyamının səmərəsi onun əsir düşməsi, səbr edib dözməsi, qiyamın mahiyyət və səbəblərini bəşəriyyət tarixinə yetirməsindən asılıdır.
Bu səbəbdən Zeynəb(s.ə) izdivac ərəfəsində də vəzifəsini unutmur və ailə qurmaq üçün imam Hüseynlə (ə) birgə olmağı şərt kəsir. Əli (ə) qızına elçi göndərən və Əhli-beyt(ə) dostlarından olan Əbdüllah ibni Cəfər sözsüz ki, bu şərti qəbul edir və nəhayət Zeynəbi-Kübranın(s.ə) əri olmaq şərəfinə nail olur.

ZEYNƏBİN(s.ə) HƏYAT YOLDAŞI

Əbdüllah Cəfərin övladlarındandır. Cəfər isə Əbu Talibin oğlu, Əlinin (ə) qardaşı, Mutə döyüşünün fədaisi və İslamın böyük şəhidlərindəndir. Cəfəri-Təyyar adı ilə məşhur olan bu insanın şəxsiyyətini Peyğəmbərin (s) sözləri və ona bağlılığı ilə müəyyən etmək olar. Yəhudilərin Xeybər qalasının fəthi və Cəfərin Həbəşədən qayıtdığı zaman Peyğəmbər (s) onu qucaqladı və alınını öpüb buyurdu: «Bilmirəm hansı iş üçün sevinim. Xeybərin alınması, ya Cəfərin gəlişi üçün?» Sonra Peyğəmbər (s) ona məscidin qonşuluğunda mənzil verdi.
Mutə döyüşündə Cəfərin iki qolu da kəsiləndən sonra bayrağı yerə atmağa razı olmayıb onu dişlərinə aldı. Həzrət Peyğəmbər (s) bu barədə buyurmuşdur: «Allah Cəfərin iki qolunun yerinə ona iki qanad verəcək ki, behiştdə onlarla pərvaz etsin.» Buna görə də ona Cəfəri-Təyyar (uçan) deyiblər.
Əbdüllah Həbəşədə doğuldu. Bu o zaman baş verdi ki. Cəfər öz həyat yoldaşı və bir dəstə müsəlmanla birgə düşmənlərin təzyiqi nəticəsində, Peyğəmbərin (s) təklifi ilə həbəşəyə hicrət etmişdilər.
Əbdüllahın atası Cəfərin şəhadətindən sonra Peyğəmbər (s) onun uşaqlarını yanına gətirib bir ata məhəbbəti ilə qucağına alar, öpüb ağlayar, beləliklə sanki Əbdüllaha və başqa balalara təsəlli verərdi.
Peyğəmbərdən(s) sonra Əbdullah Həzrətin (ə) yanında rəşadət və fədakarlıqlar göstərmiş, Süffeyn döyşündə isə döyüş səhnəsinin xüsusi qəhrəmanlarından hesab olunmuşdur. O zamanlar o, səxavət və əliaçıqlıqda da məşhur idi.

Həzrət Zeynəbin (s.ə) Kərbəla dərsləri

Kərbəla deyəndə, İmam Hüseyn (ə) aşiqi olan hər bir insanın qəlbi çox ağrıyır, çox yanır. Əslində bizi ağladan, qəlbimizi sızladan Kərbəla deyil, çünki Kərbəla adi bir şəhərdir. Bizi ağladan Kərbəla vaqiəsidir. Mən də, bu acizanə sözlərimlə, o hadisələrdən, xüsusən də əziz xanım, Kərbəla qəhrəmanı olan Zeynəbi-Kubra (ə)-dan danışmaq istəyirəm. Əziz Peyğəmbərimizin (s) əziz nəvəsi, Həzrət Əli (ə) və Zəhrayi-Mərziyyə (ə.s)-in ətirli bağlarının nübarı, İmam Həsən və İmam Hüseyn (ə)-in bütün bacılardan seçilən bacısı və nəhayət əziz Ruqəyyanın sevimli bibisi, əmməsi olan xanım Zeynəb (ə), bütün məhəbbətlərin ən üstününə layiq olan bir xanımdır. Elə bir xanım ki, 3 yaşlı o balaca Ruqəyyanın, yaralı qəlbində böyük yer tutmuşdu. Az yaşlı uşaqlar kimin ona məhəbbət, sevgi bəslədiyini çox yaxşı bilirlər. Həzrət Ruqəyya da az yaşlı idi, adi xanım deyildi, imam qızı idi. Onun o kiçik qəlbində böyük bir həyat, nitqində gözəl sözlər vardı. Həzrət Zeynəb (s.ə), belə bir xanımın bibisi, Ruqəyyanın dilindən desək, əmməsi idi. Həzrət Zeynəbin (s.ə) göstərdiyi cəsarəti, dözümlülüyü, Allaha məhəbbəti hər xanım göstərə bilməz. Yezid kimi bir məlunun nitqinə heyran qaldığı Zeynəb, sizcə necə ola bilər? Xanım Zeynəb (ə) qədər iffətli, xanım Zeynəb qədər qeyrətli, xanım Zeynəb qədər Allahına, öz əhli-əyalına məhəbbət bəsləyən bir xanım tapa bilməzsiniz. İmam Səccad (ə) buyurur: «Atam İmam Hüseyn(ə)-in şəhid olan gününün gecəsi, mən xəstə olduğum üçün bibim Zeynəb mənimlə məşğul idi. Atamın öz xeyməsində oturub şer oxuduğunu eşidərkən, məni ağlamaq tutdu, amma sükut etdim. Bildim ki, bəla və müsibət gəlmişdir, amma bibim Zeynəb şeiri eşidərkən, özünü saxlaya bilmədi, pərişan halda atamın yanına gəlib dedi: «Kaş ölüm gəlib mənim həyatımı alaydı». Atam ona buyurdu: «Əziz bacım! Səy et ki, şeytan səbrini əlindən almasın». Sonra isə gözləri dolmuş halda, bu məsəli dedi: «Əgər ovçu Qəta quşunu rahat qoysaydı, yuvasında yatardı. İndi düşmən bizdən əl çəkməyəcək». Sonra bibim dilləndi: «Bizi daha çox ağrıdan sənin üçün bir çıxış yolunun olmaması və çarəsiz ölüm şərbətini içməyindir» – deyib huşunu itirib, yerə yıxıldı. Atam bibimin üzünə su səpib, onu ayıldır və buyurur: «Ey bacım, təqvanı uca tut, səbrli ol! Bil ki, bütün yer-göy sakinləri öləcəklər və Allah-Taalanın müqəddəs Zatından başqa hər şey fani olacaqdır. Babam, atam, anam və qardaşım məndən üstün idilər, lakin onlar da vəfat etdilər. Bacı səni and verirəm və səndən bu andıma əməl etməni istəyirəm, məbada, mənim müsibətimdə üz və yaxanı cırasan və ya mənim şəhadətimdə ucadan nalə və fəqan edəsən». İmam Səccad (ə) buyurur: «Atamın bu tövsiyələrindən sonra bibim mənim yanımda oturdu. Bu tövsiyələr bibimdə dərin təsir qoydu. Bibimin qamətini daha mətin, səbrini daha üstün, mərdliyini daha da qüvvətli etdi». Bu səhnələrdən Xanım Zeynəbin qardaşına olan dərin məhəbbətini dərk etməmək mümkün deyil.
Xanım Zeynəb (ə) Kərbəlaya daxil olanda bilirdi ki, bura onun qardaşı ilə birgə olacağı son mənzildir. Elə ona görə də qardaşından bir an belə ayrılmırdı. Kərbəla, adından göründüyü kimi, Zeynəbi-Kubraya «kərbu-bəla» (yəni qəm və bəla) oldu.
Aşura gecəsi, İmamın mübarək vücudu Əhli-beyt xeymələrinə nur saçdığı son gecə idi. İmam Hüseyn (ə)-dan sonra böyük, ağır yük xanım Zeynəbin öhdəsinə düşürdü. O, qardaşının tövsiyələrinə əməl edirdi. O Xanım hələ yolun əvvəlində idi. Qarşıda isə onu daha dəhşətli bəlalar gözləyirdi. Döyüş başlananda Əhli-beytdən(ə) döyüş meydanına gedən ilk döyüşçü, İmam Hüseyn (ə)-in böyük oğlu Əli Əkbər oldu. O şəhid olarkən döyüş meydanından səsi eşidilir. O, atası ilə vidalaşırdı. Xanım Zeynəb qardaşının ağlamaq səsini eşidir, qəzəb və nifrət qəhəri boğazını sıxır, İmam Hüseyn (ə)-in ağlar səsi canına od salırdı.
Bax, belə bacı idi Zeynəb. O Xanımın Kərbəlada öz övladlarını da şəhid verməsinə baxmayaraq, yenə də dözür, səbr edirdi. Kərbəlada olan hər bir müsibətli səhnəyə tamaşa etmək Zeynəbin ürəyinə bir dağ qoyurdu. Bəlkə də övlad şəhadəti onun üçün Seyyidiş-şühəda və onun övladlarının şəhadəti qarşısında çox asan idi. Çünki Zeynəb özünü qardaşının yolunun fədaisi bilirdi. Sonra o xanım Əhli-beytin(ə) məzlumiyyəti və Yezidin alçaqlığı nəticəsində ən acı səhnənin şahidi oldu. Belə ki, İmam Hüseyn (ə) son anlarda Zeynəbi-Kubranın xeyməsinin yanına gəlir və deyir: «Bacı, Əli Əsğəri mənə ver vidalaşım». Zeynəb qardaşının altı aylıq südəmər oğlunu ona verir. Susuzluqdan halı pərişan olmuş o balaca körpənin halını təssəvvür edirsinizmi? Hansı ata belə bir faciəyə dözər? Ata susuz körpə ilə vidalaşmamış, məlunların oxu Əli Əsğərin boğazına saplanır. İmam Hüseyn (ə) uşağı Zeynəbə verir. İndi Zeynəb bu səhnəyə necə dözsün?! Bəli, Zeynəb dözdü. Allaha görə, Əhli-beytə(ə), namaza görə, bizə görə. Kərbəlada o xanımın bir qulağı hərəm əhlinin «əl-atəş» (su, su) nalələrində, bir qulağı isə döyüş meydanında idi.
Şəhriyar öz şerində belə deyir:
Kərbəla faciəsi bəzrin əkib başlandı
Ta Qiyamət nə qopa, Zeynəbi Kubra başına
Qardaşının acı səhnəsinə tamaşa edən Zeynəb(s.ə), ürək yanğısı ilə fəryad edirdi: «Kaş yer-göy dağılaydı, kaş dağlar əzilib çölləri dolduraydı» – deyir və qardaşının yanına gəlir.Qanına qəltan və bədəni tikə-tikə olmuş qardaşının başı üstündən üzünü Mədinəyə çevirib ata-anasını, baba və əcdadını səsləyir, ah və nalələr çəkir. Camaat şivən qoparıb ağlayırdı. Xanım Zeynəb (s.ə) onları sakitləşdirib elə bir xütbə oxudu ki, kufəlilərin yatmış vicdanı oyandı. Əzizə xanım elə bəlağətlə danışırdı ki, elə bil Əli (ə) nitq söyləyirdi. Ravi belə deyir: «Mən heç vaxt belə şücaət və əzəmətlə danışan iffətli və həyalı qadın görməmişdim. Xanım Zeynəb(s.ə) ibn Ziyadın sarayında öz gözəl nitqi ilə məclisdəki camaatın gözləri qarşısında ibn Ziyadı rüsvay etdi. Zeynəbin(s.ə) kəsərli sözlərindən sınan məlun ibn Ziyad elə atıldı ki, sanki Zeynəbi(s.ə) öldürəcəkdi. İbn Ziyadın ətrafındakılarından biri dilləndi: «Ey əmir, bu qadındır!» Zeynəbin(s.ə) dağlı qəlbindən gələn sözlər Kufə camaatına od vurdu. Ravi deyir: «And olsun Allaha, o gün camaatı çox heyran və pərişan gördüm. Narahatlıqdan əllərini ağızlarına qoyub, təəssüflə ağlayırdılar. Yanımda ağlamaqdan üzünün tükləri göz yaşları ilə islanmış bir kişi, Əhli-beytə(ə) xitab edərək belə deyirdi: «Atam-anam sizə qurban olsun!Sizin yaşlılarınız yaşlıların ən yaxşısı, cavanlarınız cavanların ən üstünü, qadınlarınız qadınların ən yaxşısıdır və nəsliniz nəsillərin ən yaxşısıdır. Onlar hamıdan üstündürlər». Xanım Zeynəbin (s.ə) sözü qurtarmağa az qalmış İmam Səccad (ə) buyurdu: «Bibican sakit ol, gərək qalanlar keçmişlərindən ibrət alsınlar. Həmd olsun Allaha ki, sən təlim görməmiş alim, öyrədilməmiş müdriksən! Ağlamaq və nalə şəkmək gedənləri qaytarmaz».
Gəlin, xanım Zeynəbin(s.ə) qəhrəmanlıqlarından, xanım Zeynəbin(s.ə) şücaətindən örnək alaq! Gəlin, bunu bir dərs kimi, xanım Zeynəbin(s.ə) «Kərbəla dərsləri» kimi oxuyub, öyrənib layiqincə əməl edib, xanımı özümüzdən razı salaq! Həzrət Zəhra(s.ə) və Həzrət Zeynəb (s.ə) hicabını, onlara layiq qoruyub saxlayaq. Saxlayaq ki, Qiyamətdə o əzizə xanımların mübarək vücudlarının qarşısında üzü qara qalmayaq və mövlamız İmam Zaman (ə.c) ağanın zühurunu səbirsizliklə gözləyənlərdən, zühur gününü görənlərdən və ağanın köməkçilərindən olaq, inşaallah!
(faktxeber.com)

Əli Əliyev: "Hakimiyyət nəyin baş verdiyinin fərqindədir"

AzTV srağagündən ənənəvi müxalifətə savaş açıb. Müxalifət ənənəvi şəkildə hədəfə alınıb, tənqid olunur. İqtidarın çoxdan “unutduğu” siyasi rəqiblərini yenidən xatırlamasının səbəbləri nə ola bilər? Müxalifət düşərgəsi hücumları necə dəyərləndirir?

VİP sədri Əli Əliyev bildirdi ki, AzTV-yə yalnız rəsmi xronikanı izləmək məqsədilə gün ərzində 5-7 dəqiqə müddətində baxır. Bu səbəbdən siyasi xətdəki dəyişikliyi sezməyib. Amma müxalifətin hədəfə alınması təəccüblü də deyil: “Sərbəst mətbuatın qıtlığı xarakterik olan antidemokratik cəmiyyətlər üçün düşmən axtarışı xas xüsusiyyətdir. Görünür, sosial problemlərdən, 2 manatı haqlamış dollardan, idarəolunmaz hala gələn iqtidardaxili problemlərdən diqqəti yayındırmaq üçün müxalifətə müharibə elan olunması başa düşüləndir. Hakimiyyət nəyin baş verdiyinin fərqindədir. Anlayırlar ki, yaradılmış böhranı aradan qaldırmaq asan olmayacaq. Vəziyyəti ağırlaşdıran iç konfliktlər situasiyanı tarıma çəkir. Siyasi prosesin içində olanlar gizli mexanizmlərin hərəkətə gətirildiyini duymamış deyillər. 

Belə şəraitdə ”Parçalansaq, müxalifət gəlir" tezisi işə yarayan kimi görünə bilər. Hakimiyyət ideoloqları müxalifətin mövcudluğunu yada salmaqla daxili konsolidasiyaya nail olmağa çalışırlar həm də. İnanmıram ki, bununla nəyə isə nail olmaq mümkün olsun. Mənə görə, müxalifət onsuz da zəif fəaliyyətini bir az da səngitməli, siyasi meydanda görünməməyə çalışmalıdır. Müxalifətin fəallaşması iç savaşı zəiflədir. Mane olan hakimiyyətdaxili maneçilik törədənlər radikal şəkildə neytrallaşdırılmalıdırlar. Belə olmasa, korrupsioner heyət ölkəni dağılmağa qədər sümürəcək və sabotajla məşğul olacaq. Unutmayaq ki, bu adamların bir qismi sadə gözlə görünəcək dərəcədə Azərbaycanı sevməyən, xəritədən silməyə çalışan kənar dövlətlərin oyunçularıdırlar".

82 -dən səhifə 198