Thursday, November 23, 2017

Ölkədə vəhhabi təriqətinə mənsub olanlar yenidən fəallaşıblar. Xüsusilə də bu fəallıq şimal rayonlarında daha çox hiss olunur.  

Bir neçə gündür  Zaqatalada vəhhabilərin törətdiyi əməllər və onlara qarşı müvafiq orqanlar tərəfindən aparılan əməliyyatlar ölkənin gündəmində yer almaqdadır. Yayılan rəsmi məlumatlara görə, son aylarda şimal rayonlarında və xüsusilə də Zaqatalada vəhhabilərin cinayət əməlləri  artıb.  

Xatırladaq ki, mayın 1-də Zaqatalada polis sahə müvəkkilinin iş otağında partlayış baş verib. Nəticədə polis kapitanı qəlpə yaraları alıb.  Doğrudur, rəsmi mənbələr bu partlayışın məhz vəhhabilər tərəfindən törətdildiyini bildirməsələr də partlayışdan sonra, Zaqatalada vəhhabilərə qarşı geniş miqyaslı əməliyyat başlayıb və bölgədə dini dözümsüzlük və bölücülük meylləri yayan, vətəndaşları hədə-qorxu və digər zorakı üsullarla öz sıralarına cəlb etməyə çalışan, əhali arasında pozuculuq işləri aparan Zaqatala rayon sakinləri Elşad Musayev, Abakar Qazıyev, İslam Ağalarov, Vüqar Cəbrayılov, Bəşir Həmzəyev və Vaqif  Padarov saxlanılıblar.

Məsələ ilə bağlı “Yeni Müsavat” a təhlükəsizlik üzrə ekspert İlham İsmayıl danışıb. O bildirib ki, müxtəlif zamanlarda Azərbaycanda bu dini cərəyanın nümayəndələri aktivləşirlər:

“Miqyası böyük olmasa da hər halda hiss olunur ki, bu məsələ nəzarətdə saxlanılır. Hesab edirəm ki, bu kimi aktivləşmələr Azərbaycanı hər hansı bir oyuna qoşmaq anlamını daşımır. Vəhhabilərin indiki haldakı gücü o səviyyədə deyil. Əhali sarıdan da onların tərəf qazanması mümkün deyil. Hazırda Azərbaycan əhalisinin demək olar ki, hamısı cəbhəyə fokuslanıb. Hətta iqtisadi baxımdan nə qədər gərgin günlər yaşasaq da, cəbhədən gələn informasiyalar cəmiyyət üçün daha öndədir. Belə bir məqamda qeyd etdiyim kimi vəhhabilərin hər hansı bir aksiyaları Azərbaycanı oyuna qata bilməz. Ancaq bütün hallarda onlar nəzarətdə saxlanılmalıdır. Din, ideologiya məsələsi həssas mövzudur. Bunu başdı-başına buraxan zaman fəsadlar da çox olur”.

Ekspert həmçinin qeyd edib ki, cəbhədə vəziyyətin gərgin olduğu dönəmdə daxildə də iğtişaşlara cəhdlər ola bilər:

“Bir məsələ də var ki, Azərbaycan onsuz da Qarabağ münaqişəsi fonunda geopolitik oyundadır. Cəbhədə gərginlik fonunda daxildə əsasən radikal dindarların və etnik qrupların separatçılıq fəaliyyətləri hiss olunur. Bu, aprel hadisələrindən əvvəl də var idi,  sonra da var. Düşmən daxildə də bu kimi hadisələrlə Azərbaycan dövlətinin  fikrini yayındırmaq istəyir. Ancaq bunun miqyası böyük deyil.  Hər halda hesab edirəm ki, bu, basdırılmış “mina"lardır və yeri gəldiyində istifadə olunur. Ancaq Azərbaycan dövləti hər şeyi nəzarətdə saxlayır”.

İ. İsmayıl radikal dindarlara xarici qüvvənin təsiri ilə bağlı aşağıdakıları bildirib:

“Vəhhabi məsələsində  bir başa Rusiyanı günahlandırmaq olmaz. Rusiyanın Azərbaycana təzyiq etmək üçün o qədər riçaqları var ki, indiki  halda vəhhabi məsələsi onların əlində güclü silah deyil”.

Ekspert bildirib ki, son zamanlar Azərbaycanda dini radikal qüvvələrin fəaliyyətində aktivləşmə müşahidə olunmur:

“Hələ ki passivləşmə gedir.  Son zamanlar hətta  Suriyaya meyl göstərənlər də, demək olar ki, yox səviyyəsindədir. Ona görə də  hesab edirəm ki, indiki halda radikal dindarların aktivləşmə dövrü deyil”.

Bakıda fahişə şəbəkəsinin toruna düşən türklər və döyülən müştərilər.

İnterpress.az-ın redaksiyasına üz tutan 3 türkiyəli turist, Bakıda işbazların toruna düşüb. Onlar da əksər kafe-barlarla əlbir olan əxlaqsız qadınların qurduqları tələyə düşüb. Belə ki, gecə saatlarında könlünə qadınlarla vaxt keçirmək düşən turistlər “odnoklassniki” sosial şəbəkəsində tanış olduqları qadınla əlaqə saxlayaraq görüş təyin ediblər: "Qadın, söhbət zamanı 25 manata görüşdüyünü bildirdi. Yerləşdirdiyi şəklin altında da şəklin ona aid olduğunu yazmışdı.

Nömrəyə zəng edəndə bizi Nizami metrosunun qarşısına çağırdı. Metronun yanında olanda təkrar mənə zəng edin dedi və biz də elə etdik. Bizə Nizami metrosundan köhnə avtovağzal istiqamətində yuxarı tərəfə qalxmağımızı istədi və oradaki marketdən iki qutu siqaret və "RedBull" almağımızı istədi. Biz tapşırılanları alanda onlar artıq bizi gördülər və Mustafa Sübhi küçəsində yerləşən “Kera” kafeyə dəvət etdilər. İçəri girən kimi masanın üstünü biz sifariş vermədən doldurdular. Qızlar içdi, söhbət etdilər. Biz artıq işin nə yerdə olduğunu anladıq və qızlara gedmək istədiyimizi deyəndə bizə hesab gətirildi. Baxdıq ki, 205 manat yazılıb. 105 manat içki, 50 manat da kabinet pulu. Biz hesabın məbləğinə mat qaldıq. Etiraz etdik ki, axı biz sifariş verməmişik, ikincisi də bizəgətirilən içkilər bu məbləğdə deyil. Belə deyəndə içəridən iri cüssəli oğlanlar çıxıb bu məbləği ödəmədən burdan çıxa bilməzsiniz dedilər. Uzun mübahisədən sonra pulumuzun olmadığını izah edə bildik. Bizim üstümüzü axtardılar. Nəyimiz varsa hamısını stolun üstünə boşaltmağı əmr etdilər. Portmana və cibimizdə pul tapmayanda kafenin müdiri bizimlə belə razılaşdı ki, 50 manat verin çıxın. Biz 50 manat ödəyib kafedən uzaqlaşdıq."

Fahişələrlə əlbir işləyən kafe və barlar 

Zərər çəkən Türkiyə vətəndaşı hadisəni nəql etdikdən sonra jurnalistimiz ondan təkrar o nömrə ilə əlaqə saxlamağı istəyir və eyni nömrəyə zəng olunur. 

Özünü odnoklassnikidə Leyla kimi təqdim edən qız bu dəfə özünü Əsmər kimi təqdim edir və turistdən yerini soruşur. Turist Sahil metrosunun yaxınlığında olduğunu deyir. Qiymətini soruşan müştəriyə gecəsinin 40 manata olduğunu deyir. Əsmər türkiyəli müştərisini Rəssamlar İttifaqının yaxınlığındakı gül mağazasının qarşısına dəvət edir. Biz çağırılan məkana yollanırıq. 

https://soundcloud.com/interpress-az/bakida-priton-sbksi

Biz Rəssamlar İttifaqının yaxınlığındakı gül mağazasına gəlirik. Dəfələrlə zəng etməyimizə baxmayaraq bu dəfə qadına zəng çatmır. Görüş təyin etdiyi yerə biraz göz gəzdirdik. Gül dükanının yanında “Lion” adlı Pub olduğunu gördüyümüz zaman ehtimal etdik ki, Türkiyə vətəndaşlarının növbəti tələsi burada imiş. Çünki bizimlə telefon danışığında evə dəvət etmədiyi üçün ağıla sadəcə bu ehtimal gəlir.

Bu arada qeyd edək ki, bu əxlaqsız həyat tərzi sürən qadınlar bir şəbəkədir. Müxtəlif kafe və barlarla əlbir işlədikləri iddia olunur. Faizlə barların tələsinə müştəri salırlar. İlk olaraq zəng edən müştərilərin harada olduğunu soruşurlar və müştərinin olduğu yerə yaxın bir məkan müəyyənləşdirirlər. 

https://soundcloud.com/interpress-az/bakida-priton-sbksi-2

Hesab ödənilməyəndə belə döyülürlər

Planlarımız baş tutmadığı üçün, Türkiyə vətəndaşları ilə onların tələyə düşürüldüyü ilk məkana müştəri kimi yollandıq. Məkana yaxınlaşdıq, lakin kafeyə daxil olmadan məkanın qarşısında bir qrupun toplandığını və içkili halda mübahisə etdiyinin şahidi olduq. Mübahisəyə uzaqdan qulaq asdıq və sürücü olduğunu deyən bir müştəri də növbəti qurban idi. Qısa mübahisədən sonra gənc oğlan bir neçə nəfər tərəfindən möhkəm döyüldü.

Diqqət: Saytımızın daha əvvəl də belə bir şəbəkənin oyununu aşkarlayaraq içtimaiyyəti məlumatlandırmasından xeyli vaxt keçməsinə baxmayaraq hələ də belə şəbəkələri himəyə edənlər var. Əks təqdirdə bu qədər rahat hərəkət edə bilməzdilər. Bu tələyə düşməmək üçün təsadüfi tanışlıq və sosial şəbəkələrdə paylaşılan nömrələrə inanmayın. Diqqətli olun!

"May ayında toy etməzlər", "May boş aydır", "Bu ayda evlənənlərin sonu olmur" kimi "məsləhətlərlə", yəqin ki, toy etmək istəyən hər kəs qarşılaşıb.

Xüsusən də orta və yaşlı nəsil nümayəndələrinin bu tövsiyələrinin əslində heç bir elmi, tibbi əsası da yoxdur, batil bir inancdır. Buna baxmayaraq, keçmişdən bu günümüzə qədər gətirilən bu qəribə ənənəyə bu gün də çoxları əməl edir. May ayı ərzində tək-tək adamlar olar ki, toy etsinlər.

Maraqlıdır, bu inancın kökü haradan gəlir? Niyə may ayında toy etmək olmazmış? Bunun Azərbaycana, islama bir aidiyyəti varmı?

Belə iddialar da var ki, guya ermənilərin qondarma soyqırımından sonrakı ay may ayına düşdüyündən - onlar mayda da yas saxlayıb toy etməyiblər. Sovetlər dönəmində isə bu kütləvi hala çevrilib. Bir başqa mənbələrdə deyilir ki, xristian ayinlərinə görə, may ayı ağır ay kimi qiymətləndirilir. Maraqlı burasıdır ki, əgər lap belədirsə, sovet imperiyası dağıldıqdan sonra niyə biz hələ də bu ənənəni yaşadırıq?! May ayında toy edilməməsinin bir səbəbini də may ayında yağışların çox olması ilə əlaqələndirirlər və bu dövrü təbiətin ağlayan dövrü adlandırırlar. Təbiət ağlayarkən şadlıq etmək olmazmış. Bəzi mənbələrdə isə bu adətin köklərinin Qədim Romaya gedib çıxdığı deyilir. Bəzi fikirlərə görə, "may" sözü "Maius" latın sözündən götürülüb. Bu söz isə öz kökünü qədim Romada "Mayi ilahəsi"nin adından götürüb. Başqa bir versiyada isə deyilir ki, Qədim Romada may ayında "Lemuriya" deyilən tədbir keçirilirdi. Bütün ay ərzində məbədlər bağlanır, camaat ölənlərini yada salır, dua oxuyur, məclislər verirdilər. Kəbin kəsilməsi və toylar məbədlərdə keçirilirdi. Bu mərasimlə əlaqədar may ayında toylar keçirilmirdi. Bəzi ekspertlər isə may ayında toy olmamasının səbəbini yasəmənin çiçək açması ilə izah edirlər. Yasəmən gülü isə uğursuzluq gətirir... 

Maraqlıdır, may ayının uğursuz bir ay olduğunu sübut edən hansısa psixoloji, astroloji əsas varmı?

Atroloq Firudin Qurbansoy bunun başqa xalqların batil inancları olduğunu dedi: "Bunun yeni düşüncə tərzimizə, əxlaqımıza qətiyyən dəxli yoxdur. Bu, sırf insanlarla bağlıdır. Qədim yunanların kökləri ilə bağlı bir düşüncədir. May ayı qədim Misirlə bağlı bir vaxtdır. Ona görə də qədim zamanlarda dediyim ərazilərdə toy eləmirdilər. Toy edəndə bolluq olmalıdır. Ona görə də onlar həmin vaxtlarda toy eləmirdilər. Çünki bütün ərzağı yeyib qurtarmış olurdular. Bu səbəbdən də toyları əsasən sentyabr ayında edirdilər. Bu ənənə bütün xristian aləminə yayılmışdı. Ruslar vasitəsilə gəlib bizə də çatmışdı. Əslində may ayı Buğa bürcünə düşür. Bu ayda evlənənlər dünyaya qəşəng uşaq gətirirlər. Mən insanlara məsləhət bilərdim ki, mənasız inanclara uymasınlar. May ayında toy eləmək əslində xeyir gətirər, nəinki ziyan. Belə bir inanc da var ki, guya may ayında evlənənlər axırda peşman olurlar. Bu boş bir deyimdir. Bizim xalqımız başqa xalqların batil inanclarına uymasın və may ayında toy etsin".

Psixoloq Dəyanət Rzayev bu düşüncəni insanları başından çıxartmağın çətin məsələ olduğunu dedi: "Bu ənənə Azərbaycana aid deyil. Biz sovet məkanında rusların tərkibində yaşamışıq. Bu söz də ruslarda "mayetsa", yəni avaralanmaq mənasındadır. May ayı da "avara ay" sayıldığına görə bu ayda toy etmirdilər. Biz də bunu özümüzə təlqin etmişik. Amma bu absurd bir şeydir. Halbuki may ayı toylar üçün çox yaxşı ay olardı.  Bunu insanların başından çıxartmaq çətin məsələdir. Bəlkə, kimlərsə inanmır belə şeylərə. Amma öz-özünə düşünür ki, birdən mayda toy edər, camaat gəlməz, "nə deyərlər" kimi yanaşmalar yaranır. Mənə elə gəlir ki, bir neçə nəfər mayda toy etsə, gələcəkdə bu geniş tendensiya halını alacaq. Kütləvi informasiya vasitələri bu istiqamətdə maarifləndirmə işi aparmalıdır".

Yeri gəlmişkən, müxtəlif xalqlarda bundan başqa bu günümüzə qədər gəlib çıxan toyla bağlı digər batil inanclar da mövcuddur. Məsələn iki bacının iki qardaşla evlənməsinin həmişə uğursuzluq gətirdiyi düşünülürdü.  Bəziləri gəlinin və ya bəyin öz ad günündə evlənməsinin də uğursuzluq gətirəcəyinə inanırlar. 

Meksikada isə belə bir inanc var: gəlin toy günündə mirvari taxsa, evliliyi boyunca ağlayacaq, çünki mirvari göz yaşlarının işarəsidir. 

Bolqar dağının ətəklərində belə bir inanc mövcuddur: nişanlanacaq oğlan qız evinə gəldikdə evlilik həyatı uğurlu olsun deyə qızın qardaşları tərəfindən döyülərmiş. 

Yaponiyada nə gəlin, nə də bəy evliliyin qısa sürməsini istəmədiyi müddətdə bənövşəyi rəngli geyimdən istifadə etmir. 

Braziliya, Meksika, Kolumbiya və daha bir çox yerdə bəyin gəlini toydan əvvəl görməsinin gəlinə şanssızlıq gətirəcəyinə inanılır.

Türkiyədə isə gəlin ayaqqabısının altına rəfiqələrinin adını yazır, bu adlardan hansı silinsə, onun qısa zamanda evlənəcəyinə inanılır.(musavat.com)

"Dolmanın bişirilmə ənənələrinin YUNESKO-nun siyahısına daxil edilməsi üçün fayllar hazırlanır"

Bunu mədəniyyət və turizm naziri Əbülfəs Qarayev Milli Kulinariya Mərkəzinin yaranmasının 25 illik yubileyi münasibəti ilə keçirilən tədbirdə çıxış edərkən deyib.

Öz fikirlərini Azərbaycan dilində çox çətinliklə ifadə edən Mədəniyyət naziri Əbülfəs Qarayev bu durumu ilə görəsən dünyaya nəyi anladacağını düşünür? Ermənilər artıq illərdir ki, dolma festivalı keçirib bunu bütün dünyada təbliğ edəndə Əbülfəs Qarayev hardaydı və nə işlə məşğul idi? 
Hər il ermənilər bu dolma festivalında dünyanın ən uzun dolmasını hazırlayaraq Ginnesin Rekordlar Kitabına salmağa çalışanda bizim məmurlar yəqin ki, xarici ölkələrə daşıdıqları pullarını hansı banka yerləşdirəcəklərinin dərdinə qalmışdılar. 
Paytaxtımızda keçirilən Avropa Oyunları zamanı qonaqlara pulsuz paylanan yeməklərin arasında da dolma yox idi. Niyəsini bir Allah bilir. 
Ermənilərin hər il İrəvanda düzənlədiyi dolma festivalı haqqında iki videonu və fotoları təqdim edirk:

Məlum olduğu kimi, bir neçə gün əvvəl Bakının Suraxanı rayonunda, "Baku Bus" avtobuslarının saxlanıldığı yerin yaxınlığında ayı balası peyda olub. Fövqəladə Hallar Nazirliyi (FHN) qəhrəman əməkdaşları çətin, amma şərəfli mübarizədən sonra ayı balasını tutmağı bacarıblar. 

Qaynarinfo.az-ın əməkdaşı ayı balasını danışdıra və ictimaiyyəti maraqlandıran suallara cavab ala bilib.

- Hörmətli ayı balası, sizi paytaxtın küçələrində görmək xeyli gözlənilməz oldu. Vətəndaşlarımız əməlli-başlı panikaya düşdülər...

- Çox nahaq yerə! Məndən niyə qorxsunlar ki! Mən özüm onlardan yaman qorxmuşdum, gizlənməyə siçan deşiyi axtarırdım.

- Niyə?

- Hələ indiyədək bir ayının insan kəsib kabab çəkdiyini eşitmisinizmi? Amma ölkənizdə adamlar ayı kababına hətta 1 milyon da xərcləyə bilirlər. Qorxmayıb neyləydim?!

- Hər halda şəhər küçələrində ayı görmək adi məsələ deyil.

- Yenə sizinlə razılaşmıram. Siz küçədə özünü apara bilməyənlərə, böyürə-böyürə danışanlara, yolu düzgün keçə bilməyənlərə, səkidə bir-biri ilə təpikləşə-təpikləşə gedənlərə “elə bil ayıdır” demirsinizmi? İndi həqiqi ayı görmək sizə niyə təəccüblü gəlir, başa düşə bilmirəm (gülür).

- Xalqı narahat edən suallardan biri də sizin haradan küçədə peyda olmağınızdır. Sirr deyilsə, buna aydınlıq gətirə bilərsinizmi?

-Mənim sahibim öz halal maaşı ilə yaşayan bir məmurdur. Onun böyük bir malikanəsi var. Qonaqlarına dediklərindən bilirəm ki, bu malikanənin 3-4 milyon dollar qiyməti var. 

- Axı quru maaşla bu qiymətə malikanə necə tikmək olardı?

- (acıqla mırıldanır) Sənə nə? 

- Üzr istəyirəm, davam edin...

- Mən orada xoşbəxt yaşayırdım. Bunun üçün sahibim hər cür şərait yaratmışdı. Ürəyim ət istəyirdi ət yeyirdim, ot istəyirdi ot, bal istəyirdi bal. Qulluqçularım gecə-gündüz xidmətimdə “ləbbeyk” dayanırdılar. Ehh... Necə kef çəkməli əyyam idi!

- Bəs niyə qaçdınız?

- Bu yaxınlarda sahibim məni özü ilə başqa bir məmurun malikanəsinə aparmışdı. Həmin malikanənin həyətində böyük bir cəngəllik düzəldilmişdi. Sən demə, həmin məmur da orada timsah saxlayırmış.

- Aha...

- Biz geri qayıtdıqdan sonra mən sahibimə dedim ki, necə olur, həmin məmur timsahına cəngəllik düzəldir, mən isə qəfəsdə yaşayıram. Dedim, gərək o da mənim üçün malikanəsinin həyətində meşə saldırsın. O isə cavab verdi ki, devalvasiyadır, mümkün deyil. Bu mənim bərk xətirimə dəydi. Acıq eləyib qaçdım.

- İndi necə, özünüzü xoşbəxt sayırsınız?

- Qətiyyən! Çöldə adamların gün-güzəranını görüb qaçmağıma peşman oldum. İnsanlar yeməyə çörək tapmırlar, mənsə kef-damaq çəkirdim. Bu naşükürlüyümə görə sahibimdən üzr istəyirəm. Əminəm, o məni bağışlayacaq. 

- Oxucularımıza sözünüz varmı?

- Onlara demək istəyirəm, özlərini yaxşı aparsınlar. Şayiə buraxıblar ki, guya meşədə armudun yaxşısını ayılar yeyir. Yalandır! Bu saat meşələri vəzifəlilər özəlləşdiriblər, mənim qohum-əqrəbam yeməyə çürük armud da tapa bilmirlər. Amma aranızda ağıllı adamlar da az deyillər. Onlar körpünü keçənəcən ayıya dayı deyirlər. Onlara böyük hörmətim var. Belə də qalsınlar. Beşgünlük dünyadı, özlərinmə bir gün ağlasınlar.

- Maraqlı müsahibə üçün təşəkkür eləyirəm.

- (yenə də acıqla mırıldanır) Ağzının danışığını bil! Sən mənə heç nə eləyə bilməzsən!

 

ABŞ İslam və İrana qarşı mübarizə aparır. APA-nın verdiyi xəbərə görə, bunu İranın ali lideri Ayətullah Əli Xamenei Tehranda müsəlman ölkələrin səfirləri, yüksək vəzifəli məmurlar və adi vətəndaşlarla görüşündə deyib.

“Bu gün Amerikanın siyasəti aşkar sürətdə İslam və İranla mübarizə aparmaqdan ibarətdir. ABŞ liderləri hesab edirlər ki, İran onların siyasətinə əngəl yaradır”, - deyə Xamenei qeyd edib.

İranın ali lideri Vaşinqtonu İslan və İrana qarşı dağıdıcı siyasət apardığına görə sərt tənqid edib: “Amerikalılar bu günlərdə bəyan etdilər ki, İranın siyasəti bölgədə sanksiyaların tətbiqinə və vəziyyətin gərginləşməsinə səbəb olub. Onlar demək istəyirlər ki, siz, iranlılar, sayıq və məlumatlı xalqsız, siz geri çəkilməlisiniz və bizə işimizi görməyə imkan verməlisiniz. Bu gün İslam adı altında iyrənc cinayətlər törədən satqın qruplaşmalar məhz qərb dövlətləri tərəfindən dəstəklənir”, - deyə İranın ali lideri vurğulayıb.

“Qərb ölkələri guya İŞİD-ə qarşı koalisiya yaradıblar, lakin, əslində, onlar bu qruplaşmanı dəstəkləyirlər”, - deyə Xamenei əlavə edib.

Cinayətkar qrup yaratmaqda, banditizm, korrupsiya və adam oğurluğu cinayətlərində ittiham olunan Akif Çovdarovun və ləğv olunmuş MTN-in digər generallarının işi üzrə istintaq başa çatıb, prokurorluq materialları məhkəməyə verməyə hazırlaşır.

İstintaqa yaxın mənbələrdən virtualaz.org-a məlum olub ki, mühakimə olunanların hamısı hərbçi olduğundan onların işinə Hərbi Məhkəmədə baxılacaq. Bundan başqa, o da bildirilir ki, generalların məhkəməsi qapalı keçiriləcək.

Xatırladaq ki, "MTN işi” ilə bağlı həmin qurumun yüksək vəzifəli onlarla generalı və zabiti həbs olunub. Onların hamısı cinayətkar qrup yaratmaqda, banditizm, korrupsiya və adam oğurluğu cinayətlərində ittiham olunurlar.

A.Çovdarov Cinayət Məcəlləsinin 308.2 (Vəzifə səlahiyyətlərindən sui-istifadə, bu məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (Rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (Rüşvət alma (passiv rüşvətxorluq) təkrar törədildikdə), 311.3.3 (Rüşvət alma (passiv rüşvətxorluq) külli miqdarda törədildikdə), 311.3.4 (Rüşvət alma (passiv rüşvətxorluq) hədə-qorxu tətbiq olunmaqla törədildikdə) maddələri ilə ittiham olunur.

Bundan başqa, onun barəsində Cinayət Məcəlləsinin 145.3-cü (Qanunsuz azadlıqdan məhrum etmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə də cinayət işi açılıb.

O, ötən ilin noyabr ayında həbs edilmiş və barəsində dörd aylıq həbs-qətimkan tədbiri seçilmişdi.

Cümə, 06 May 2016 00:00

Cəbhədən xəbər var

Yazan

Erməni silahlı bölmələri cəbhənin müxtəlif istiqamətlərində iriçaplı pulemyotlardan və 60 millimetrlik minaatanlardan da istifadə etməklə sutka ərzində atəşkəs rejimini ümumilikdə 112 dəfə pozub.

 Müdafiə Nazirliyi xəbər verir ki, Ermənistan Respublikası İcevan rayonunun Paravakar, Berkaber kəndlərində və adsız yüksəkliklərdə yerləşən mövqelərdən Ağstafa rayonunun Köhnəqışlaq, Qazax rayonunun Qızılhacılı kəndlərində və adsız yüksəkliklərdə, Berd rayonunun Mosesqex, Çinari kəndlərində yerləşən mövqelərdən Tovuz rayonunun Əlibəyli, Ağbulaq kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.
Tərtər rayonunun Çiləbürt, Ağdam rayonunun Şıxlar, Baş Qərvənd, Sarıcalı, Kəngərli, Novruzlu, Nəmirli, Qaraqaşlı, Mərzili, Yusifcanlı, Xocavənd rayonunun Kuropatkino, Füzuli rayonunun Qaraxanbəyli, Horadiz, Qorqan, Aşağı Seyidəhmədli, Cəbrayıl rayonunun Mehdili kəndləri yaxınlığında, həmçinin Göygöl, Goranboy, Xocavənd, Füzuli və Cəbrayıl rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.
Azərbaycan Silahlı Qüvvələri əməliyyat şəraitinə uyğun olaraq düşmənin mövqeləri və səngərlərinə 117 dəfə atəş zərbəsi endirib.

Lerik rayonuunun bir qrup sakini Aztoday.az-a şikayət məktubu göndərib.

Rayon sakinləri bildirirlər ki, icra başçısı Rövşən Bağırov və rayonun deputatı İqbal Məmmədov rayonu özlərinin özəl mülkiyyətinə çeviriblər.

Aztoday.Az-a yazan sakinlər rayonda Rövşən Bağırov, icra başçısının müavini Cəlil Baxşıyev və deputat İqbal Məmmədovun yaratdığı anarxiyanın pik həddə çatdığını bildiriblər.

Aapardığımız araşdırmalar zamanı isə əməkdaşımız 2014-cü ildən bu günə kimi Lerikdə qeydə alınan büdcə cinayətlərini, maliyyə xəyanətlərini, ayrı-ayrı korrupsiya faktlarını araşdırıb, ölkə başçısına verilən vədlərə əməl edilmədiyini üzə çıxarıb.

Talanan büdcə və dağıdılan milyonlar…

Aradırma zamanı məlum olub ki, rayon rəhbərliyi indiyə qədər dövlət başçısına yalan danışıb. Eyni zamanda büdcə vəsaitləri ilə yanaşı sosial problemlərin həllinə yönəlik addımlar lazımi səviyyədə atılmayıb, yerli sakinlərin şikayətləri həllini tapmayıb. Araşdırmanın nəticələrinə keçməzdən qabaq bir nüansı da qeyd edək ki, sadalanacaq faktlar jurnalist təhqiqatı və leriklilərin verdiyi məlumatlar əsasında toplanıb.

Sakinlər iddia edirlər ki, Lerikin icra başçısı Rövşən Bağırov və deputatı İqbal Məmmədov rayonda monarxiya yaradıb, rayonu yazılmamış qanunlarla idarə edir, prezidentin tapşırıqlarını qulaqardına vurur. Lerikin ucqar dağ region olmasını nəzərə alan icra başçısı və deputat öz istəklərini arxayınlaşmış şəkildə realizə etməkdə fasilə vermirlər.
Beləliklə, ilk növbədə fermerlərə çatacaq subsidiyaların mənimsənilməsinə diqqət yetirmək lazımdır. Lerik rayon İcra Hakimiyyətinin rəsmi saytında 2014-cü ildə fiziki və hüquqi şəxslərə hər hektar əkin sahəsinin və çoxillik əkmələrin becərilməsinə görə 40 manat hesabı ilə dövlət büdcəsinin vəsaiti hesabına veriləcək yardım haqda məlumat yerləşdirilib. Bu vəsaitlərdən nə qədər və hansı kəndlərə ayrıldığı açıqlanıb.

Qalmaqallı iddia: kəndlilərə ayrılan subsidiyanı kimlər mənimsəyib?

Rayon sakinləri bildirirlər ki, kənd təsərrüfatının inkişafı üçün indiyə qədər ayrılan subsidiyaların heç də göstərilən rəqəmlərlə kəndlərə çatmayıb. Bu yeyinti əməliyyatında rayon rəhbərliyinin xüsusi iştirakı olduğu bildirilir. İcra başçısı Rövşən Bağırovun bu maxinasiya işlərində müavinləri, əsasən də 1-ci müavini Cəlil Baxşiyev müstəsna rol oynayıb.

C.Baxşıyevin dövlət büdcəsinə müdaxiləsi isə deputat qohumu İqbal Məmmədova arxalanması sayəsində baş tutub. Deputatın ona himayədarlıq etdiyi iddia edilir.

Prezidentin sahibkarlar və fermerlər barəsində məmurlara etdiyi xəbərdarlıqlara baxmayaraq R.Bağırov, C.Baxşıyev və İ.Məmmədov nəticə çıxarmayıblar. Məlumatlarda qeyd olunur ki, generalitet həbsləri, səs-küylü Eldar Mahmudov işi və sahibkarların başına açılan müsibətlərin ifşası Leriki idarə edənlərə dərs olmayıb. Yeri gəlmişkən, rayon icra başçısının MTN şefi ilə əlaqələri haqda bir qədər sonrakı araşdırmada qeydlər olacaq. Buna qədər isə Lerikdə digər bir özbaşınalıq faktını qeyd etmək lazımdır – söhbət yolların çəkilişi zamanı mənimsəmələrdən gedir. Və yenə də yuxarıda adıçəkilən üç məmur büdcə vəsaitini talan edib.

Başçı ilə şirkətin 3 milyonluq oyunu və arada itən 4 milyon…

Sakinlər yazır ki, prezident tərəfindən rayonun Noda-Şingədulan-Xanəgah yolunun çəkilməsi üçün 7 milyon manat vəsait ayrılıb. Amma 50 dağ kəndinin və 30 min insanının həyat şəraitini yüngülləşdirəcək olan Noda-Şingədulan-Xanagah yoluna ayrılan vəsaitin yarısı yerli məmurlar tərəfindən mənimsənilib.

Yaranmış vəziyyət yolun tikintisini həyata keçirən “Yoltikintinəqliyyatservis” MMC rəhbərliyini də çətin vəziyyətə saldı. Yola ayrılan 3 milyon vəsaitin 30 faizi Lerik rayon İcra hakimiyyətinin başçısı Rövşən Bağırova nəqd şəkildə çatdırılıb. “Yoltikintinəqliyyatservis” MMC rəhbərliyi bu vəziyyətdən şikayət etsə də, icra başçısı onlarla anlaşa bilib. Başçı əvəzində “Yoltikintinəqliyyatservis” MMC rəhbərliyinə qiymətləri bir neçə dəfə şişirtməyə icazə verdi.
Rövşən Bağırov və Cəlil Baxşıyev cütlüyü “Yoltikintinəqliyyatservis” MMC rəhbərliyi ilə birgə prezidentin ayırdığı 3 milyon manat vəsaiti «yumaqla» məşğul olublar. Sakinlərin sözlərinə görə, rayonda əsasən bu işləri icra başçısının birinci müavini Cəlil Baxşıyev icra edir. O da İqbal Məmmədovun yaxın qohumudur. Hətta icra başçısı Rövşən Bağırov da onun diktəsi ilə hərəkət edir.

Deputat isə rayonda aparıcı qüvvə hesab olunur. Onunla bağlı son qalmaqal maşınlara balon satışında üzə çıxdı. Balon biznesinin deputatın inhisarında olduğu ifşa edildi. Deputata biznes qadağan olunsa da, qeyri-rəsmi şəkildə bu ticarət də Lerikdən seçilən millət vəkilinin nəzarətində imiş.

Ölkə başçısına yalan danışıblar…

Qeyd edək ki, Lerik rayon İcra Hakimiyyətinin müavini Habil Məlikov bir müddət öncə Noda-Şingədulan-Xanəgah yolunun Ağçay kəndinə qədər çəkilməsinə və yarıda saxıalnılmasına münasibət bildirərkən demişdi ki, Prezident tərəfindən ayrılan sonuncu 4 milyon manat köçürülməyib. Pul köçürüləndən sonra yol Ağçay kəndindən Xanagah kəndinə qədər çəkilib yekunlaşdırılıacaq. Amma bir neçə gün bundan öncə Cəlil Baxşıyev ayrılan 7 milyon manatın hamısının yola sərf edildiyini deyib. Maraqlıdır, əgər yol Ağçay kəndinə qədər çəkilibsə, bəs sonradan ayrılan 4 milyon manat hara xərclənib? Axı ondan sonra yol bir metr də çəkilməyib. Əksinə, rayonun 50-ci kilometr deyilən hissəsindən Ağçay kəndinə qədər çəkilən yol da sıradan çıxıb, bir neçə yerdən dağlıb. Bəs 4 milyon hara yoxa çıxıb?

Görünən odur ki, İcra hakimiyyəti pulu mənimsəyərək Prezidentə yanlış məlumat veriblər. Sakinlər isə bu məsələni belə qoymayacaqlarını, sona qədər haqlarını müdafiə edəcəklərini, bu məsələni ölkə başçısının diqqətinə çatdıracaqlarını deyiblər.

Onu da qeyd edək ki, mövzu ilə bağlı araşdırmalarımız davam edir. Yaxın günlərdə rayonda “itkin düşən 7 milyon manat”la bağlı yeni faktlar təqdim edəcəyik.

Həbsdəki bankirin ev dustaqlığına buraxılacağı nə dərəcədə realdır?

Azərbaycan Beynəlxalq Bankının hazırda həbsdə olan sabiq rəhbəri Cahangir Hacıyev həbsdən azad edilə bilər. Bu haqda redaksiyamıza daxil olan məlumatlarda deyilir ki, C.Hacıyevi ev dustaqlığına buraxıb sonradan isə “xəstəliyi ilə əlaqədar” istintaqdan, ümumiyyətlə, kənarlaşdırmaq planı var. 

Qaynağımız iddia edir ki, sabiq bankirin həbsdən azad edilməsi onun rəhbərliyi altında Beynəlxalq Bankdan kredit şəklində çıxarılan milyardlarla manat kreditlərin geri alınmasına mane olmayacaq. Kreditorların saxlanılaraq  inzibati üsullarla aparılan profilaktik işlər az-çox bəhrəsini verir. 

Belə olan halda Beynəlxalq Bankda böyük bir paya sahib olan Cahangir Hacıyevin həbsdə qalması ilə azadlıqda olması arasında elə də ciddi fərq yoxdur. Əksinə, Hacıyev çöldə olarsa daha çox kreditin geri qaytarılmasına nail ola bilər. Odur ki, onun azadlığa buraxılması xahişini edən nüfuzlu şəxsi eşidiblər. 

Qaynağımız bildirir ki, C.Hacıyev problemli kreditlər şəklində olan milyardlarla vəsaitin geri qaytarılmasına yardımçı olacağına vəd verib. Bundan başqa, Cahangir Hacıyev Beynəlxalq Bankın İdarə Heyətinin sədri olmaqla yanaşı, bankın əsas səhmdarlarından biri olub. Onu vəzifəsindən azad etsələr də, bankdakı səhmləri qalmaqdadır. “Bizim Yol” yazır ki, Cahangir Hacıyevin nizamnamə kapitalında payı 4 milyon 333 min 476 ədəd səhmdir. Başqa sözlə desək, bankın 5-də biri - 20 faizi C.Hacıyevə məxsusdur.  Onun səhm sayını nominal dəyəri 0,27 manata  vursaq, bu, 1 milyard 170 milyon  38 min 52 manat edir. 

Amma belə məlumatlar da var ki, hakimiyyətdəki bəzi qruplaşmalar “vurulmuş” MTN şefi Eldar Mahmudovun qudası olan Cahangir Hacıyevin azad edilməsinin əleyhinədirlər. Onlar hesab edirlər ki, C.Hacıyevin azad edilməsi Eldar Mahmudovun güclənməsinə xidmət edəcək. 

Qeyd edək ki, C.Hacıyev ötən il martın 18-də “səhhətindəki problemlərə” görə istefaya göndərildikdən sonra maliyyə xəyanətlərində suçlanıb. Lakin onun həbsi bir müddət ertələnib. Ötən ilin oktyabrında Eldar Mahmudov milli təhlükəsizlik naziri vəzifəsindən çıxarılandan 2 ay sonra - dekabrın 4-də Cahangir Hacıyev DİN-in Baş Mütəşəkkil Cinayətkarlıqla Mübarizə İdarəsinə çağırılıb və Nərimanov məhkəməsinə aparılaraq barəsində 4 ay müddətinə həbs-qətimkan tədbiri seçilib. O, Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə) və 179.3.2 (külli miqdarda mənimsəmə) maddələri ilə ittiham edilir. Sabiq bank rəhbəri səlahiyyətlərindən sui-istifadə edərək, dövlət pulunun talan edilməsində, müvafiq sənədlər olmadan yaxın ətrafına milyonlarla dollar məbləğində kreditlər ayırmaqda, mənimsəmə və israfçılıqda, özünə yaxın oliqarxların “çirkli pullar”ının yuyulmasında və digər cinayətlərdə ittiham olunur. C.Hacıyev barədə həbs sanksiyasını şəxsən baş prokuror Zakir Qaralovun imzaladığı deyilir.(musavat.com)  

116 -dən səhifə 149