Şənbə, 23 Dekabr 2017 00:00

Azərbaycanda daha bir bank bağlandı

Yazan

Azərbaycan Respublikasının Maliyyə Bazarlarına Nəzarət Palatasının (Palata) Direktorlar Şurasının 22 dekabr 2017-ci il tarixli qərarına əsasən "DəmirBank” ASC-nin lisenziyası 23 dekabr 2017-ci ildən etibarən ləğv edilir.

Palatadan verilən məlumata görə, bu qərar bankın məcmu kapitalının miqdarının banklar üçün müəyyən edilmiş məcmu kapitalının minimum miqdarından və məcmu kapitalın adekvatlıq əmsalının qanunvericiliklə nəzərdə tutulmuş 3 (üç) faizdən az olduğuna, eləcə də kreditorları qarşısında olan öhdəliklərini yerinə yetirə bilmədiyinə görə "Banklar haqqında” Azərbaycan Respublikası Qanununun 16.1.6-16.1.8-ci maddələrinə əsasən qəbul edilib.

"DəmirBank” ASC Əmanətlərin Siğortalanması Fonduna üzv bankdır və əhalinin bu bankda qorunan əmanətləri Fond tərəfindən ödəniləcək. Palatanın qərarına əsasən, banka müvəqqəti inzibatçı təyin edilib. "DəmirBank” ASC-barəsində iflas prosedurana başlanması ilə əlaqədar Palata məhkəməyə müraciət edib.

Göyçay rayonunda məktəb direktoru intihara cəhd edib.

APA-nın xəbərinə görə, hadisə bu gün axşam saat 21:30 radələrində Göyçay şəhərinin Heydər Əliyev prospektində yerləşən 9 saylı orta məktəbin qarşısında baş verib. 

Rayon sakini, 1961-ci il təvəllüdlü Qəribov Akif Mövsüm oğlu rəhbərlik etdiyi şəhər 9 saylı orta məktəbin qarşısında qolunun şah damarını kəsərək intihara cəhd edib. 

Çoxlu qan axması səbəbindən huşunu itirərək yerə yıxılan Akif Qəribov təcili yardım stansiyasının avtomobili ilə Göyçay rayon Mərkəzi Xəstəxanasının cərrahiyyə şöbəsinə çatdırılıb. Təcili əməliyyat olunan direktorun hazırda vəziyyəti ağır olaraq qalır.

Rayon sakinlərinin məlumatına görə, uzun illərdir ki, məktəb direktoru işləyən Akif Qəribov ondan yüksək məbləğdə pul tələb olunduğu üçün və pulu verə bilmədiyinə görə özünə qəsd edib.

Faktla bağlı Göyçay rayon Prokurorluğu tərəfindən araşdırma aparılır.

İsrailin baş naziri Benyamin Netanyahu BMT-nin İsraillə bağlı siyasətini kəskin tənqid edib

B. Netanyahu BMT-ni yalançılar evi adlandırıb.

Onun sözlərinə görə, BMTtanısa da, tanımasa da, Qüds İsrailin paytaxtıdır: “ABŞ-ın Yerusəlimi bizim paytaxtımız kimi tanıması üçün 70 il lazım oldu, indi də BMT-nin eyni qərar verməsi üçün bir neçə il lazımdır. Müxtəlif qitələrdə İsrailə olan münasibət sürətlə dəyişir və bu, BMT-yə təsir edə bilməz, lakin vaxt lazımdır”.

O, ABŞ-dan sonra digər ölkələrin də səfirliklərini Yerusəlimə köçürməklə bağlı qərar qəbul edəcəyə dair ümidvar olduğunu ifadə edib.

Qeyd edək ki, bu gün BMT-nin Baş Assambleyasının təcili iclasında ABŞ-ın Qüdsü İsrailin paytaxtı qismində tanınması ilə bağlı qərarı müzakirə ediləcək. ABŞ-ın qərarına dair səsvermə keçiriləcək. Qərarı pisləyən qətnamənin qəbulu gözlənilir.

İclas İslam Əməkdaşlıq Təşkilatı adından çıxış edən Türkiyə və Yəmənin təşəbbüsü ilə çağırılıb.

Xatırladaq ki, ABŞ Prezidenti Donald Tramp dekabrın 6-da Qüdsün İsrailin paytaxtı kimi tanınması barədə bəyanatla çıxış edib. Ağ evin başçısı, həmçinin ABŞ səfirliyinin Təl-Əvivdən Qüdsə köçürülməsi üçün Dövlət Departamentinə göstəriş verib. Bu addım bir çox dünya liderləri və beynəlxalq təşkilatlar tərəfindən etirazla qarşılanıb. (apa)

Bakı Dövlət Universitetində laborantla dekan müavini arasında qalmaqal baş verib. 

Hadisəsnin səs yazısını “Meydan TV” paylaşıb.
Səs yazısından məlum olur ki, universitetin Şərşunaslıq fakültəsinin dekan müavini Cavanşir Məmmədzadə laborantı təhqir edir.
“Bu dəfə səninlə sözlə danışıram, amma gələn dəfə əl-ayaqla danışacam.
Mənim elə səbrim yoxdur. Özünü küçədəki kimi aparırsan. Bundan sonra iş vaxtı dərs keçmək qadağandır”, - deyə dekan müavini bildirib.
Laborant isə cavabında “siz hələ məni yaxşı tanımırsınız” cavabını verib: “Siz mənimlə belə danışa bilməzsiniz. Bu məsələni qanunla həll etmək lazımdır”
Dekan müavini isə deyib ki, qanunu yoğurub bir yerinə soxurlar.
Məsələ ilə bağlı Cavanşir Məmmədzadə ilə əlaqə saxladıq.
Dekan müavini BAKU.WS-ə açıqlamasında bildirdi ki, həmin hadisə dərs bölgüsü zamanı baş verib.
Cavanşir Məmmədzadə qeyd etdi ki, laborant danışıqların sonuncu hissəsinin səs yazısını paylaşıb.
“Bu səs yazısı təhrif olunmuş variantıdır. Paylaşılan səs yazısı tam deyil. Buna qədər söhbətimiz olub və o məni təhqir edərək əsəbiləşdirib. Laborant danışığımızın özünə sərf edən hissəsini paylaşıb”, - deyə dekan müavini bildirdi.

ABŞ prezidenti Donald Tramp BMT-nin Baş Assambleyasında müzakirə ediləcək Qüdsün statusu ilə bağlı məsələyə münasibətdə Amerikanın mövqeyini dəstəkləməyən ölkələrə maliyyə yardımının kəsiləcəyi ilə hədələyib.

“Times of Israel” nəşri xəbər verir ki, Tramp bununla bağlı deyib: “Onlar bizdən milyonlarla, hətta milyardlarla dollar vəsait alır, sonra isə əleyhimizə səs verirlər. Əladır, qoy səs versinlər – biz bunu nəzərə alıb xeyli pula qənaət edərik. Bu bizi narahat etmir”.

BMT-nin Baş Assambleyasının Qüdsün statusuna həsr olunmuş təcili iclası dekabrın 21-də keçirilməlidir. Belə toplantılar BMT Təhlükəsizlik Şurasının hər hansı məsələ üzrə yekdil qərara gələ bilmədiyi hallarda keçirilir. Xatırladaq ki, ABŞ BMT TŞ-nin Qüdslə bağlı qərarına veto qoymuşdu.

AFFA-nın baş katibi Elxan Məmmədov Azərbaycanın İspaniya Futbol Federasiyasına sponorluq üçün 50 milyon avro ödəməyə hazır olduğu barədə AS nəşrinin yazdıqlarına da münasibət bildirib.

Baş katib iddiaları təkzib edib: "Xeyr, belə bir şey yoxdu. Bu, marketinq addımlarıdı. Belə edirlər ki, bizim tərəfdən də maraq yaransın. Türkiyə mətbuatında da SOCAR-ın adı hallanmışdı. Sponsorluqdansa, Premyer Liqada 10-14 komanda saxlamaq yaxşı olardı". 

“Azərbaycan hökuməti REAL Hərəkatının lideri İlqar Məmmədovu həbsdə saxlamaqla Avropanın təzyiqini öz üzərinə çəkir. İlqar Məmmədov ciddi siyasi iddiası olan şəxsdir. Normal qaydalar çərçivəsində mübarizədə uduzan hakimiyyət zorakılıqla siyasi opponentlərini sıradan çıxartmağa çalışır”. Bu sözləri ictimai fəal Raul Qurbanov deyib.

R.Qurbanov hesab edir ki, Azərbaycan hökumətinin beynəlxalq təzyiqləri üzərinə çəkməsi dövlətimizin imicini zədələyir: “Avropa İnsan Hüquqları Məhkəməsinin İlqar Məmmədovla bağlı qərarının icra olunmaması başa düşülən deyil. İ.Məmmədovun Avropa konvensiyasının 18-ci maddəsi üzrə hüquqlarının pozulmasının tanınması faktı onun təqib edilməsinin siyasi xarakter daşıdığını təsdiqləyir. Hökumət siyasi məhbusun olmadığını iddia etsə də məhz bu hal iddianın yalan olduğunu təsdiqləyir. Azərbaycan hakimiyyəti üzərinə götürdüyü beynəlxalq öhdəliklərə hörmətlə yanaşmalı, qısa müddətdə İlqar Məmmədovu həbsdən azad etməlidir”.

Avropa Məhkəməsinin qərarının icra olunmamasını İlham Əliyevin real alternativi hesab olunan İ.Məmmədovun və onun sədrlik etdiyi Hərəkatın siyasi fəaliyyətinə qarşı təzyiq vasitəsi kimi qiymətləndirirəm – deyən R.Qurbanov əlavə edib: “Bu həm də Azərbaycan hakimiyyətinin siyasi plüralizmə, fikir ayrılığına və rəqabətə qarşı dözümsüzlüyünün bariz nümunəsidir.
Avropa Məhkəməsinin
qərarı Azərbaycan hakimiyyəti üçün gözlənilməz olub və hakimiyyəti bir daha qeyri-qanuni və ölkə imicinə xələl gətirən yeni ittiham uydurmağa vadar edib”.

Qeyd edək ki, İlqar Məmmədov 2013-cü il yanvarın 23 və 24-də İsmayıllıda baş vermiş aksiyalar zamanı ictimai qaydanı pozmaqda və vətəndaşları iğtişaşlara təhrik etməkdə təqsirləndirilir. O, 7 il azadlıqdan məhrum edilib.

İlqar Məmmədov beynəlxalq hüquq müdafiə təşkilatları tərəfindən vicdan məhbusu kimi tanınıb.

Aprel döyüşləri vaxtı Seysulan istiqamətində şəhid olan Nazim Zəkərəyevin ailəsi acınacaqlı duruma düşüb. Dövlətdən verilən pensiyadan başqa gəliri olmayan və vaqonda yaşayan şəhid ailəsi Şamaxı rayon İcra Hakimiyyətindən narazılıq edir.

38 yaşlı Şaxanım Zəkərəyeva bildirib ki, oğlu şəhid olandan sonra xəstəlik tapıb: "Nəfəs ala bilmirəm, ürəyimdə problem var, ayaqlarım da ki, sözümə baxmır. Bu yaşımda 60 yaşlı adam kimi xəstəliklərdən əziyyət çəkirəm”

Şəhid anası deyir ki, oğlu şəhid olduqdan sonra müalicəsi üçün evlərini satıblar, indi isə çay qırağında qaz və işığı olmayan vaqonda yaşayırlar.

Ailə başçısı Nadir Zəkərəyev 1 ildən çoxdur ki, əkin-biçinlə məşğul olmaq üçün icra hakimiyyətindən bir neçə sot torpaq istədiklərini, lakin ala bilmədiklərini əlavə edib.N. Zəkərəyev İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri Sərdar Ömərovun da qəbulunda olduqlarını bildirib: "Sərdar müəllim icrada torpaq verilmə işlərinə baxır. Deyir torpaq yoxdur. Deyirəm necə olur axı bu boyda Şamaxıda torpaq yoxdur?”

Zəkərəyevlərin sözlərinə görə, rayonun Şəhriyar qəsəbəsində şəhid ailələri üçün 36 mənzilli bina tikilib, onlar ev növbəsinə yazılsa da, bu binadan onlara pay düşməyib.

Nadir Zəkərəyev daha bir ilginc məsələ barədə danışıb: "Uşaq şəhid olanda Rabitə və Texnologiyalar Nazirliyindən 7 mərasiminə gəlmişdilər. Nazirlik nümayəndəsi dedi ki, sizə iş verəcəyik, yas bitəndən sonra işə başlayarsınız. Bu vaxt orada İcra Hakmiyyətinin nümayəndəsi Ceyhun da var idi, dedi ki, ona iş vermək mənlikdir, mən düzüb-qoşacağam. Hüzürdən sonra getdim Ceyhunun yanına, dedim belə-belə, cavab verdi ki, iş yoxdur. Mən də kor-peşman qayıtdım geri. Nə imkan verdi nazirlikdə işə düzəlim, nə də özü bir iş verdi. Hər yerdən əlimiz üzülüb, indi də şəhid ailəsinə verməyə bir neçə sot yer tapılmır”.

Çərşənbə axşamı, 19 Dekabr 2017 00:00

“Turan” agentliyinin iddiası təmin edildi

Yazan

Bu gün, dekabrın 19-da «Turan» İnformasiya Agentlıyinin Vergilər Nazirliyinin Bakı Şəhər Lokal Gəlirlər Departamentindən şikayəti üzrə 1 Saylı İnzibati-İqtisadi Məhkəməsində növbəti prosesi keçirilib. Prosesdə yekun qərar çıxarılıb.

Vəkil Fuad Ağayev deyib ki, məhkəmə agentliyin şikayətini təmin edib.

F.Ağayev vurğulayıb ki, onlar departamentin agentliyə qarşı qərarının ləğvini istəyirdilər:

«Bu qərar 2014-cü, 2015-ci və 2016-cı ilə vergi hesablanması qaydaları ilə bağlı idi. Bakı Şəhər Lokal Gəlirlər Departamentinin sentyabrın 11-də agentliyə göndərdiyi bildirişdə bu qərarın ləğv edildiyi bildirilirdi. Amma sonradan departament yenidən qərarın qüvvədə olduğunu açıqlamışdı. Odur ki, məhkəməyə müraciət etməli olduq».

Agentliyin yaydığı məlumata görə, bundan əvvəl keçirilən prosesdə nazirliyin nümayəndəsi artıq həmin qərarın qüvvədən düşdüyünü açıqlayıb. Ancaq «Turan» agentliyinin vəkilinin israrına baxmayaraq, ləğv qərarının sürəti məhkəməyə təqdim edilməyib.

Vəkil deyib ki, dəfələrlə bu proses yubadılıb. Nəhayət, bu gün, dekabrın 19-da həmin qərarın əsassız olması və ləğv edilməsi haqda məhkəmə qərar verib.

Çərşənbə axşamı, 19 Dekabr 2017 00:00

Fazil Məmmədovun obyektləri əlindən alınır

Yazan

Sabiq vergilər naziri Fazil Məmmədov vəzifədən çıxarılmasını səhhətindəki problemlərlə əlaqələndirsə də, əldə etdiyimiz məlumatlar məsələnin daha dərin olduğunu göstərir. Bu məlumatlar Fazil Məmmədov hakimiyyətdaxili ziddiyətlərin qurbanı olduğundan xəbər verir.

Etibarlı mənbə bildirir ki, ölkə başçısının Fazil Məmmədovu vergilər naziri vəzifəsindən azad etmək barədə sərəncamından dərhal sonra, birbaşa, yaxud dolayısı ilə ona məxsus olan obyektlər əlindən alınıb. 

“Fazil Məmmədov vəzifədən çıxarılması barədə xəbəri özü mətbuatdan oxuyub. Onun üçün tam gözlənilməz olub. Bundan sonra bir günün içində Bakıda və Şamaxıda Fazil Məmmədovun obyektləri boşaldılıb. Hamısına möhür vurulub. Deyirər ki, prezidentə Fazil Məmmədovun hansısa əməli ilə bağlı məlumat ötürülüb”, – mənbə bildirir.

Mənbənin bildirdiyinə dekabrın 17-də Dövlət Yol Polisi əməkdaşlarının peşəkar velosipedçiləri saxlayaraq, cərimə meydançasına aparması da bununla əlaqələndirir, çünki Fazil Məmmədov Velosiped Federasiyasının sədridir. 

Mənbə hesab edir ki, Fazil Məmmədov hakimiyyətdəki Paşayevlər qruplaşması ilə Prezident Administrasiyasının rəhbəri Ramiz Mehdiyevin rəhbərlik etdiyi qruplaşma arasında gedən mövqe dartışmasının qurbanı olub.

Qeyd edək ki, Fazil Məmmədov son vaxtlar hakimiyyətdəki mövqelərini sürətlə itirməkdə olan fövqəladə hallar naziri Kəmaləddin Heydərovun kadrı sayılıb. Kəmaləddin Heydərov Dövlət Gömrük Komitəsinin sədri olarkən, Fazil Məmmədov onun müavini olub. Mənbənin məlumatına görə, həm Paşayevlər qruplaşması ilə, həm də hakimiyyətin Ramiz Mehdiyev qanadı ilə problemləri olan Kəmaləddin Heydərova etimad sıfıra yaxınlaşıb. Kəməladdin Heydərovun həm bu etimadı bərpa etmək, həm də Fazil Məmmədovun ondan uzaqlaşmaq istəyinə cavab olaraq, onun hansısa gizli əməlləri barədə ölkə başçısı İlham Əliyevə məlumat ötürdüyü və keçmiş kadrının vurulmasında həlledici rol oynadığı deyilir. 

Fazil Məmmədovun məhz hakimiyyətdaxili mübarizənin nəticəsi olaraq işdən çıxarıldığı barədə başqa media orqanlarında da yazılar dərc olunub.

24saat.org-un məlumatına görə, Fazil Məmmədov dekabrın 4-də Kəmaləddin Heydərovun yaxın adamı, Vergilər Nazirliyinin İnsan Resursları üzrə Departamentinin baş direktoru Faiq Şahbazovu işdən çıxarıb. Bundan cəmi 2 gün sonra Fazil Məmmədovun özünün qəfildən vəzifədən azad edilməsi bu məsələdə Kəmaləddin Heydərovun rolu  barədə versiyanı inandırıcı edir. 

Qeyd edilir ki, Fazil Məmmədovun işdən çıxarılması ümumilikdə hakimiyyət daxilində yeni düzənin yaradılması istiqamətində atılan addımların tərkib hissəsidir. Bundan əvvəl hakimiyyətin əsas bosslarından sayılan Ziya Məmmədovun rəhbərlik etdiyi Nəqliyyat Nazirliyinin ləğv edilərək, bu səlahiyyətlərin Heydər Əliyev Fondunun təlimatçısı olmuş Ramin Quluzadəyə təhvil verilməsi, Fazil Məmmədovun isə məhz Arif Paşayevin kadrı sayılan Mikayıl Cabbarovla əvəzlənməsi buna sübutdur. Başqa sözlə, hakimiyyət hər fürsətdən yararlanaraq komanda daxilində Paşayevlərin nüfuz dairəsində olan şəxsləri daha önəmli vəzifələrə yerləşdirir. 

13 -dən səhifə 165