Qaxda Qarabağ qazisinin evini yandırıblar, özünü isə ölümlə, həbslə hədələyirlər

Bu məqaləni qiymətləndir
(0 səs)
Keçmiş döyüşçü və prezident təqaüdçüsündən şok açıqlamalar; İlqar Cəlilov: "İşıq idarəsinin müdiri hakimin yanında deyir ki, sənin ağzından atdıracağam” 
İyulun 5-də Ali Məhkəmədə hakim Əsəd Mirzəliyevin sədrliyi ilə Qarabağ qazisi, prezident təqaüdçüsü İlqar İbrahimxəlil oğlu Cəlilovun "Azərişıq” ASC və qurumun Şimal-Qərb Enerji Regional Təhcizatı və Satışı İdarəsinin Qax Elektrik Şəbəkəsinə qarşı iddiası üzrə baxış keçiriləcək.
 
Qarabağ döyüşçüsü deyir ki, qarşı tərəf onun Qax rayonu, Qaxmuğal küçəsi ev 5-də yerləşən mənzilinin kül olmasına səbəb olan səhlənkarlıq edib. Nəticədə ona 60 min manatdan artıq ziyan dəyib. Olay 2015-ci il martın 3-də, səhər 10 radələrində baş verib. Həmin gün İlqar Cəlilovun və digər 6 qonşunun mənzilində qəfildən yanğın baş verib. Evdə olan qonşular yanğının qarşısını ala biliblər. İlqar Cəlilov isə həmin vaxt iş yerində olub, ailə üzvləri də evdə olmayıblar. Yanğın vaxtında söndürülmədiyindən 4 otaqlı ev və həyətdəki qaraj yanaraq kül olub. Hadisədən sonra İlqar Cəlilov öyrənib ki, qonşularında bütün elektrik cihazları partlayıb, yanıb sıradan çıxıb. Evdə olan qonşular elektrik naqillərində baş verən yanğını söndürüblər.
 
İlqar Cəlilov hadisə baş verəndən sonra Bakıya gələrək fövqəladə hallar nazirinin qəbuluna düşüb. Hadisənin elektrik naqillərində gərginliyin normadan dəfələrlə artıq verilməsindən şübhələndiyini söyləyib. Ərizəsində yazıb ki, eyni zamanda 7 evdə yanğının başqa səbəbdən olmasına inanmır. 
 
Nasaz transformatorlarda gərginlik dəfələrlə artıb, 7 evdə yanğın başlayıb
Şikayətçi deyir: "Qayıdıb rayona getdim. 2 gün sonra Fövqəladə Hallar Nazirliyinin Əməliyyat İstintaq İdarəsindən və Ədliyyə Nazirliyi Məhkəmə Ekspertiza Mərkəzinin ekspertləri Qaxa ezam olundular. Gəlib araşdırdılar, böyük bir cinayətin üstü açıldı. Araşdırmalar transformatorlara baxış keçirməklə başladılar. Məlum oldu ki, məhləmizi qidalandıran transformatorlar pis gündədir. Rəsmi sənədlərdə həmin transformatorların yeni olduğu göstərilsə də, faktiki orada sovetdən qalma trasformatorlardır. Transformatorlarda yağ vaxtında dəyişmədiyindən nasazlıq yaranıb və gərginlik dəfələrlə artıb. Odur ki, evlərdəki elektrik naqillərində yanğın baş verib. Yəni böyük yeyintiyə görə bu hadisə baş verib. Təxminən bir neçə 100 min manatlıq yeyintinin olması haqda iddialar vardı. Fövqəladə Hallar Nazirliyi gəldiyi nəticə haqda Baş Prokurorluğa rəsmi məktub göndərildi. Baş Prokurorluqda Cinayət Məcəlləsinin 314.2 - səhlənkarlıq - maddəsi ilə cinayət işi başlandı və Qax Rayon Prokurorluğuna göndərdilər, məni Qax Prokurorluğuna dəvət etdilər. Rayon prokuroru İslam Qasımov, köməkçisi Nazim Bağırov qabağıma 10 min manat qoyub dedilər ki, götür, sənə dəyən ziyanın ödənilməsi haqda ərizəyə qol çək. Dedim ki, 10 min manata ev tikmək olmaz. Pulu götürmədim, prokurorun yazdığı ərizəyə də qol çəkmədim”.
 
Prokuror böyük bağlamadakı narkotiki qabağıma qoydu
Qarabağda sağlamlığını itirmiş İlqar Cəlilovun sözlərinə görə, prokuror ondan əl çəkməyib: "Prokurorun mənə təklif etdiyi pulu ona zonalar arası işıq idarəsinin müdiri İlham Hüseynov vermişdi. Çünki İlham Hüseynovla prokurorla görüşdən əvvəl mübahisəm olmuşdu. O, FHN-ə müraciət etdiyim və müraciətim əsasında Qaxa komissiya gəldiyi üçün məni təhdid etmişdi. İlham Hüseynov 11 rayonun rəisi idi. Ona da demişdim ki, evimi tikin verin, mən başqa heç nə istəmirəm. 2 gün sonra prokurorla köməkçisi yenidən məni dəvət etdilər. Stolun üstündə həmin ərizə və böyük bir bağlama vardı. Prokuror və köməkçisi dedi ki, ərizəyə qol çəkməsən, bağlamadakı narkotikin sənə məxsus olması haqda protokol tərtib olunacaq, barəndə cinayət işi başlanacaq. Prokurorun köməkçisi üstümə hücum çəkdi, əlimi zorla həmin bağlamaya vurmaq istədi. Amma bacarmadı. İstəyi bu idi ki, bağlamada əl izlərim qalsın və həmin bağlamanın mənə məxsusluğunu sübut etsinlər. Gördülər ki, bu da alınmır, ortada FHN-in rəyi ola-ola, evimin özüm tərəfindən qəsdən yandırıldığını deyib barəmdə Cinayət Məcəlləsinin 186.2-ci maddəsi ilə cinayət işi başladılar”.
 
"Qara Hətəm”i baş prokurorun qəbuluna salıblar ki...
Qarabağ qazisi deyir ki, üzləşdiyi prokuror təhdidi məsələyə 1-ci vitse-prezident qarışdıqdan sonra səngiyib: "Mehriban xanım Əliyevanın qəbuluna düşdüm. Baş verənləri danışdım. 1 sutka sonra Qəbələdə baş prokuror Zakir Qaralov məni dəvət etdi, Qax prokuroru İslam Qasımov və başqa şəxs də vardı. Sonradan bildim ki, digər şəxs İlham Hüseynovun yeznəsi Hətəmdir. Qaxda onu hamı ”Qara Hətəm" kimi tanıyır. Onu baş prokurorun  qəbuluna kim və necə salmışdı sonra bildim. Aydın oldu ki, onu mənimlə eyni vaxtda qəbula Qax prokuroru saldırıb. Qəbulda baş prokuror məni dinlədi, prokuroru danladı. Barmağı ilə prokurorun şişman qarnına vurub danlayırdı. Sentyabrın 9-da Eminov soyadlı prokuror zəng edib Baş Prokurorluğa çağırdı. Səhəri gün Baş Prokurorluqda Rüstəm Usubov qəbul etdi. 3 saat yarım məni 11 general dindirdi və barəmdəki cinayət işi ləğv olundu. İşıq İdarəsinin vəzifəlilərinə qarşı cinayət işi başladılar. Elektrik şəbəkəsinin vəzifəli şəxsləri Elşad İdris oğlu Əlimovu və Xəlil Nəzir oğlu Bayramovu cəlb etdilər. İlham Hüseynov kənarda qaldı".
 
İlqar Cəlilovun sözlərinə görə, iş araşdırılıb Qax rayon məhkəməsinə göndərilib. 1 neçə ay davam edən proses boyu qarşı tərəf 3 dəfə vəsatət verib, ekspertiza təyin olunub: "Hər 3 ekspertiza rəyi də FHN-in verdiyi qərarı təsdiqlədi. Hakim Atabəy Kiçibəyov vurnuxurdu ki, qərar qarşı tərəfin xeyrinə olsun. Ataxan Kiçibəyov da məni 2 dəfə kabinetinə çağırıb pul təklif etdi. Ona da dedim ki, evimi tikin verin, mən elektrik şəbəkəsi rəhbərliyinin məsuliyyətsizliyi ucbatından evimi itirmişəm. Razı olmalıdılar. Qarşı tərəfin vəkili Qardaşxan Sadıxov məhkəmədə mənə yaxınlaşıb 30 min təklif etdi. Ona dedim ki, mənə dəyən ziyan hesablanıb və 61 min 886 manatdır, həmin ziyanı ödəyin, məsələ bitsin. Evimdə yanğın zamanı 6 min manat pulum yanmışdı. Onun davasını aparmadığımı dedim. Məhkəmə zalında hakimə dedim ki, evimi tikib versinlər, mən Qarabağ əliliyəm, aldığım pensiya ilə ailəmə ev tikə bilmərəm. Qardaşxan Sadıxov Qarabağ veteranlarının və şəhid ailələrinin ünvanına təhqiramiz ifadə işlətdi. Hakim də onun tərəfini tutdu. Aramızda mübahisə düşdü. Qardaşxan Sadıxov ölkə rəhbərliyinin ünvanına xoş olmayan sözlər işlətdi, prosesi pozmağa çalışdı. Amma alınmadı. Məhkəmə xeyrimə qərar çıxardı.
 
Evimi yandıran odur!
Həmin qərarı Ali Məhkəməyə qədər mübahisələndirdilər. Amma məhkəmə qərarı qüvvədə saxladı. Buna baxmayaraq mənə yanğın zamanı evimin yanmasına görə dəyən 61 min 886 manatı 3 ildir ödəmirlər. İlham Hüseynov Qaxda gəzib dolaşır. Mənim evimi yandıran odur! Əgər onun mənim evimin yandırılmasında günahı yoxdursa, baş prokurorun qəbuluna niyə yeznəsi "Qara Hətəmi” salırdılar? Mən 1-ci vitse prezidentdən xahiş edirəm, bu məsələni nəzarətə götürsün. İlham Hüseynov bu gün Qəbələdə elektrik şəbəkəsində satış şöbəsinin rəisidir. Barəsində xüsusi ittiham qaydasında cinayət işi başlanmasını tələb etmişəm. Qax Rayon Məhkəməsinin hakimi iclas zalında İlham Hüseynova çox loyal idi. İlham Hüseynov məhkəmə zalında, hakimin yanında iclas getdiyi bir vaxtda deyir ki, sənin ağzından atdıracağam. Sənin canın çıxacaq, mənim pulum. Sinəsinə vurub gəzir ki, bu günə qədər 300 min pul xərcləmişəm, 300 min də xərcləyəcəyəm, evini tikib verməyəcəyəm. Niyə belə etdiklərini soruşdum. Deyirlər ki, sənə ev tikib versək,  camaat belə hadisələr olanda iddia qaldıracaq. Ona görə də pulunu verməyəcəyik, evini də tikməyəcəyik. İlham Hüseynov məni həbslə hədələyir. Deyir ki, həbs etdirəcəyəm. Bu adam ölkə rəhbərliyini söyməkdən,  təhqir etməkdən də çəkinmir. Məhkəmələr də onun vəkili kimi çıxış edirlər. Sanki mən gedib bunların evlərini yandırmışam. Ölkə rəhbərliyinə xahiş edirəm ki, İlham Hüseynovun özbaşınalığına son qoyulsun, mənə dəyən ziyanın ödənilməsi üçün tədbirlər görülsün".
 
Qarşı tərəfi də dinləməyə hazırıq. (musavat.com)


Oxu 189 dəfə

Şərh verin

Siz (*) tələb olunan məlumatı daxil etdiyinizə əmin olun.Hansı ki, HTML kodu iczə verilmir.