ABŞ dövlət katibi Marko Rubio bu gün Vaşinqtonda İsrail və Livan səfirləri arasında birbaşa danışıqlara ev sahibliyi edəcək.

Bu barədə “Axios” mənbələrinə istinadən məlumat yayıb.

Məlumata görə, ABŞ Dövlət Departamentində baş tutacaq görüşdə İsrail səfiri Yeçiel Leiter və Livan səfiri Nada Hamadeh Moavad iştirak edəcək.

Mənbələrin bildirdiyinə görə, görüşdə əsas diqqət atəşkəs imkanlarına, uzunmüddətli perspektivdə “Hizbullah”ın tərksilah edilməsi məsələsinə və tərəflər arasında mümkün sülh razılaşmasına yönələcək.

Danışıqlar İsrail ilə “Hizbullah” arasında davam edən hərbi qarşıdurma və İsrailin Livanın cənubunda genişmiqyaslı quru əməliyyatları fonunda keçirilir.

ABŞ rəsmisi bildirib ki, bu, 1993-cü ildən bəri İsrail və Livan arasında keçirilən ilk açıq və yüksək səviyyəli birbaşa diplomatik danışıqlardır.

Eyni zamanda, “Hizbullah” lideri Naim Qasım danışıqları başlamazdan əvvəl “faydasız” adlandırıb və onun ləğvinə çağırıb.

ABŞ tərəfi vurğulayıb ki, bu proses İsrailin şimal sərhədlərinin uzunmüddətli təhlükəsizliyini təmin etmək və Livanın öz ərazi bütövlüyü üzərində tam suverenliyini bərpa etməsinə dəstək vermək məqsədi daşıyır.