Bəzən bir insanın göstərdiyi qəhrəmanlıq bütöv bir xalqın qüruruna çevrilir. Mübariz İbrahimov məhz belə qəhrəmanlardan idi. O, Vətənə olan sonsuz sevgisini sözlə deyil, canı ilə sübut etdi. Ömrünün ən gözəl çağında Vətən uğrunda ölümün gözünə dik baxaraq adını tarixə əbədi həkk etdi.

2010-cu il iyunun 18-də göstərdiyi misilsiz şücaət Azərbaycan əsgərinin yenilməz iradəsinin, Vətənə sədaqətinin və milli ruhunun parlaq təcəssümü oldu. O, təkcə bir döyüşün qəhrəmanı deyil, bütöv bir xalqın cəsarət, qeyrət və fədakarlıq simvoluna çevrildi.

Bu gün onun əziz xatirəsini dərin hörmət və sonsuz ehtiramla yad edirik. Mübariz İbrahimovun qəhrəmanlığı illər keçsə də unudulmayacaq, çünki Vətən uğrunda canından keçənlər heç vaxt ölmür – onlar millətin yaddaşında, bayrağında və azad səmasında əbədi yaşayırlar.

Azərbaycan Respublikasının Prezidenti İlham Əliyevin sərəncamı ilə ona ölümündən sonra “Azərbaycanın Milli Qəhrəmanı” adı verilməsi xalqımızın ona olan sonsuz ehtiramının dövlət səviyyəsində ifadəsi oldu.

Ruhun şad olsun, igid Azərbaycan oğlu! Sənin qəhrəmanlığın hər zaman qürur mənbəyimiz, Vətənə sədaqətin isə gələcək nəsillərə örnək olacaq. Allah bütün şəhidlərimizə rəhmət eləsin. Əziz xatirən daim yaşayacaq!

Lamiyə Əliqızı
Xeber.info-un baş redaktoru