27 Sentyabr 2021-ci il tarixdə Vətən müharibəsində qəhrəmancasına döyüşərək şəhid olmuş, ölkəmizin ərazi bütövlüyü uğrunda canlarınından keçmiş əsgər və zabitlərimizin xatirəsinə ehtiram olaraq 27 sentyabr – Anım Günü ilə əlaqədar Masallının Qəhrəmanlar Parkında tədbir keçirilib.

Qəhrəmanlar Parkında I və II Qarabağ müharibəsində canlarını fəda etmiş 242 Masallı şəhidinin xatirəsi 70 saylı Masallı Seçki Dairəsinin deputatı Məşhur Məmmədovun təşkilatçılığı və maliyyə dəstəyi ilə əbədiləşdiriıib.
Anım mərasimində Masallı Rayon İcra Hakimiyyətinin başçısı Şahin Məmmədov və aparatı, hüquq-mühafizə orqanlarının rəhbərləri, Milli Məclisin deputatları, şəhid ailələri, qazilər, idarə, müəssisə, təşkilat rəhbərləri və rayon sakinləri iştirak ediblər.
Vətənimizin ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib. Şəhidlərimizin ruhuna dualar oxunub.
İlk olaraq Müzəffər Ali Baş Komandan, Azərbaycan Respublikasının Prezidenti cənab İlham Əliyevin Anım Günü ilə əlaqədar yayımlanan xalqa müraciəti canlı olaraq izlənilib.

Mərasimdə 44 günlük Vətən müharibəsinin qəhrəmanlarının xatirəsi ehtiramla yad olunub, Azərbaycanın dövlətçilik tarixinin ən şanlı səhifələrindən olan Zəfərimiz barədə iştirakçılara geniş məlumat verilib.
Masallı RİH başçısı Şahin Məmmədov, Milli Məclisin deputatları- Məşhur Məmmədov, Anar İsgəndərov Milli Qəhrəman Səfəralı Məmmədovun anası Şahdəstə Məmmədova, şəhidlər anası Ziba Əsgərova, Masallı Ağsaqqallar Şurasının sədri, 3-cü dərəcəli “Vətənə xidmətə görə” ordenli, yazıçı Ələşrəf Niftiyev, müharibədə sağ qolunu itirən qazı Daməd İbrahimli, QMİ-nin Masallı üzrə qazısı Hacı Ağa Rəşid Talıbov və başqaları böyük Zəfərin qazanılmasında, müharibədən sonrakı proseslərdə, o cümlədən şəhid və qazilərə, Vətən müharibəsi iştirakçılarına dövlət qayğısının təmin edilməsi istiqamətində atılan addımlardan danışıblar. Çıxışlarda Azərbaycan Prezidenti, Müzəffər Ali Baş Komandan cənab İlham Əliyevin rəhbərliyi ilə rəşadətli Azərbaycan Ordusunun keçdiyi şanlı döyüş yolu, böyük Zəfərin qazanılmasında qardaş Türkiyənin göstərdiyi siyasi-mənəvi dəstək yüksək qiymətləndirilib. Vurğulanıb ki, qədirbilən Azərbaycan xalqı böyük Zəfəri bizə yaşadan şəhid və qazilərimizin qəhrəmanlığını heç zaman unutmayacaq.
Azərbaycan xalqının Ümummilli Lideri Heydər Əliyevin “Bir millət, iki dövlət!” ifadəsinin reallaşdığı xatırlanıb.
Çıxış edənlər ölkəmizdə müharibə iştirakçılarına, şəhid ailələrinə göstərilən diqqət və qayğıya görə Azərbaycan Prezidenti, Ali Baş Komandan İlham Əliyevə minnətdarlığını bildiriblər.
Bir qrup döyüşçü və ailələrinə «Cəbrayılın azad olunmasına görə» və «Füzulinin azad olunmasına görə» medalları təqdim edilib.
Sonra Masallı Dövlət Regional Kolleci tələbələrinin ifasında Vətən müharibəsindən bəhs edən «Vətən var olsun!» ədəbi-bəii kompozisiya nümayiş olunub.
Tədbirin sonunda Vətən müharibəsində qəhrəmancasına şəhid olmuş əsgər və zabitlərimizin xatirəsinə həsr olunmuş ağacəkmə aksiyası keçirilib.

Aksiyada Masallı rayon İcra hakimiyyətinin başçısı Şahin Məmmədov və aparatı, hüquq-mühafizə orqanlarının rəhbərləri, Milli Məclisin deputatları, şəhid ailələri, qazilər, idarə, müəssisə, təşkilat rəhbərləri və rayon sakinləri iştirak ediblər.

Qəhramanlar unudulmur! Allah cəmi şəhidlərə rəhmət eləsin!