Meyxana bu gün həqiqətən Azərbaycanda çox sevilir. Çünki bu bizim canımızda, qanımızda sözün qüdrətinin olduğunu göstərir. “Söz” Uca Allahın ilk yaratdığı mücərrəd bir varlıqdır.

Bəziləri düşünə bilərlər ki, bədahətən söz söyləyən Meyxana də deyə bilər. Bilirik ki, bədahətən söz söyləmək məharəti bir çox ölkələrdə, ümumiyyətlə bütün insanlarda ola bilər, lakin hər bədahətən söz söyləyən Meyxana deyə bilməz. Ona görə ki, bir söz bədahətən gələr deyər, ikincisini gətirib söyləyə bilməz və yaxud da qafiyələri tuta bilməz. Çünki “Meyxana” tamam başqadır sxemi fərqlidir.

Onu da qeyd edim ki, “Meyxana” bir zaman ölkədə az tanınırdı, sevilirdi, amma diqqət yetirsək bu gün daha çox tanınır, dinlənilir və sevilir, hətta deyərdim ki, pik səviyyədədir. Bir də meyxananın digər ölkələrdə də tanınmasını çox istəyirəm. Necə ki, Rep Çistuska və s. digər yad ölkələrin folkloru bizdə tanınır, istərdim ki, meyxana da o cür tanınsın, buna görə də biz bu işin üzərində daha çox çalışmalıyıq. Ümumiyyətlə rahat əldə olunan bir şey yoxdur, əgər hansısa bir şeyə rahat sahib olunursa onun o qədər də marağı olmur. Ona görə də hər cür çətinlikləri nəzərə alaraq mükəmməl şəkildə çalışmalıyıq ki, istədiyimiz ən yaxşı nəticəyə nail ola bilək.