Tərtər Regional Qaz İstismarı İdarəsinin Ağdam xidmət sahəsinin bir neçə işçisi bu ilin yanvar ayından etibarən, maaşlarını tam həcmdə ala bilməmələrindən şikayətçidir. Onlar qeyd edirlər ki, 2019-cu ilin yanvar ayından əməkhaqqılarını onlara ödənilmir.
Məsələ ilə bağlı Bizimyol.info-nun informasiya sorğusuna cavab verən “Azəriqaz” İstehsalat Birliyi (İB) bildirib ki, onların verdikləri məlumat tamamilə böhtan xarakteri daşıyır:

““Azəriqaz” İB olaraq deyilənlərin böhtan olduğunu bəyan etməklə qeyd edirik ki, hər ay üzrə Tərtər Regional Qaz İstismarı İdarəsinin Ağdam xidmət sahəsinin fərdi sahibkarlarına xidmət haqları xidmət günlərinə uyğun hesablanıb. Aylıq hesablanan xidmət haqqından 2,50 manat ASAN imza üçün aylıq abunə çıxıldıqdan sonra Dövlət Sosial Müdafiə Fondu (DSMF) ödənişi yanvar-fevral aylarında 16,10 manat, mart-iyun aylarında 22,10 manat və xidmət haqqının təxminən 5% gəlir vergisi çıxıldıqdan sonra qalan məbləğ fərdi sahibkarın xidmət kartına köçürülür. Məhz bu qaydada hesablama aparılıb və ödəniş üçün banka göndərilib. Əgər fərdi sahibkarlar cari hesablarından, vergi və xidmət kartının hesablarından çıxarışları bankdan götürsələr, həmin ödənişləri orda görə bilərlər. O halda dediklərinin böhtan olacağı üzə çıxacaq”.