Hər il 2 iyul ölkəmizdə Polis Günü kimi qeyd olunur. Bu əlamətdar gün cəmiyyətin təhlükəsizliyi, qanunun aliliyi və ictimai asayişin qorunması naminə gecə-gündüz fədakarlıqla çalışan polis əməkdaşlarının zəhmətinə verilən dəyərin ifadəsidir.

Polis peşəsi böyük məsuliyyət, cəsarət və yüksək peşəkarlıq tələb edir. Polis əməkdaşları insanların həyat və sağlamlığının qorunması, cinayətkarlığa qarşı mübarizə, ictimai asayişin təmin edilməsi və hüquq qaydasının möhkəmləndirilməsi istiqamətində mühüm vəzifələr yerinə yetirirlər. Onların əməyi sayəsində vətəndaşlar özlərini daha təhlükəsiz hiss edir, cəmiyyətdə sabitlik və əmin-amanlıq qorunur.

Azərbaycan polisi hər zaman dövlətə və xalqa sədaqətlə xidmət etməyi özünün əsas vəzifəsi hesab etmişdir. Müasir dövrdə polis orqanlarının fəaliyyəti yeni texnologiyaların tətbiqi, peşəkarlığın artırılması və vətəndaş məmnunluğunun təmin olunması istiqamətində daha da inkişaf edir. Bu, hüquq-mühafizə orqanlarına olan ictimai etimadın möhkəmlənməsinə mühüm töhfə verir.

Polis olmaq təkcə peşə deyil, həm də Vətənə və xalqa xidmət missiyasıdır. Xidmət zamanı qarşılaşdıqları çətinliklərə baxmayaraq, polis əməkdaşları öz vəzifə borclarını vicdanla yerinə yetirir, insanların təhlükəsizliyi naminə böyük fədakarlıq göstərirlər. Bu müqəddəs peşənin nümayəndələri arasında şəhidlik zirvəsinə ucalan qəhrəmanlarımızın xatirəsi hər zaman dərin ehtiramla yad edilir.

Polis Günü münasibətilə bütün polis əməkdaşlarını və bu şərəfli peşənin veteranlarını səmimi qəlbdən təbrik edir, onlara möhkəm cansağlığı, ailə səadəti, xidmətdə uğurlar və daim əmin-amanlıq arzulayırıq. Qoy onların şərəfli fəaliyyəti hər zaman xalqın etimadı və dövlətimizin diqqəti ilə qiymətləndirilsin.

2 İyul – Polis Günü mübarək!

Lamiyə Əliqızı
Xeber.info-un baş redaktoru